बगवंतन बद तीर्दे आनंद सियना
13
1 दादलिर-बायिक्निट!
मिरट पर्बुनुर बक्तलिरकुन पेर्मते सूड्सेर मंट.
2 कहितुर तम्वकुन करे माय्वक्नेने बगवंतनुर दूतलिरकुन मान-मर्यदा कीतेर.
अदेन साटि, टावा सेलुर वूर पर्बुनुर बक्तलिरकुन मान-मर्यदा किय्वल मरुङ्मट.
3 मिरट गिर जेल बोगे मातपिनय सम्जे मासि, वूरा बरोसतुन हिंदल जेल्क्नगा अर्तुर बारेते हेतु कीम्ट.
अह्ने, तक्लिब्क बोगे माय्वलिरकुन मिरट गिर, वूर बरोबर तक्लिब्क बोगे मातपिनय सम्जे मासि, हेतु कीम्ट.
4 मर्मि पोरोडुन सम्दिर मानि कियना.
आड-माड्सो वोरोन पोरो वोरोर नमकम्ने मंदना.
मर्मिङ आसि, तंवा जोडतुन सङा आय्वा, दुस्रोन सङा पीर किय्वलिरकुन अनि मर्मिन मुने, पीर किय्वलिरकुन गिर बगवंतल तस्वा कींतोर.
5 दन-दव्लतुन पोरो आसा किय्वक्ने पिसट.
मिरट मिह्गा मंता अदेनेने आनंद्ने मंट.
बारितेके,
“नना नीकुन बस्केन सुटि कियोन.
नना नीकुन बस्केन पोसटिन दात इरोन”+
इन्जेर बगवंतल इत्तोर.
6 अदेन साटि मरट दर्यम कीसि,
“बगवंतल नाकुन मदत किय्वल आंदुर.
नना बततुने वेरियोन.
बोरे नाकुन बतय किया परोर”+
इन्जेर इंदा वचो.
7 मीकुन मोदोल बगवंतना बोदा वेह्तुर वूर चर्चितुर पेदोलकुन हेतु कीम्ट.
अनि वूरा पिस्वडा तरिकता चोकोटुन करि कीसि, वूर दात बरोसतुन पिय्सि ताकट.
8 येसु किरिस्तु तोले, इंके अनि बस्केट गिर मारिवक्ने उंदिय तीर मंदंतोर.
9 अदेन साटि, मीकुन बह्कि किय्वलिक दुस्रोक दुस्रोक बोदन बारेते दिहंते मंट.
कानेतङ नियम्क्ने मावङ दिलकुन सक्ति वायो.
बति सिरिप, बगवंतना पेर्मता-दया मावङ दिलकुन सक्ति सींता.
अव नियम्क पिय्सि ताक्तुरकुन बतय पाय्दा पुट्मकि.
10 यूदुल्क पार्तना-विंति किय्वल डेरतुर कटोडलिरकुन, मरट बलि सिय्वल जागता अर्पनतुन, तिंवल अदिकार सेले.
11 पापकुन कंडि किय्ले पेर्सोर कटोडल जंवर्क्ना नेतुडुन बेय पवित्रा जागतगा वोंदुर.
अव जंवर्क्नङ मेंदोलकुन इज्रयेल लोकुरङ डेरना गुब्डतुन बह्रि डुंडुसींदिर.+
12 ते अह्ने येसु गिर, तंवा नेतुडे नरिमन्कन पापनल सुदुड कियना इन्जेर येरुसलेम चहर्ता पाटकुन बह्रि तक्लिबकुन सोसि कीसि, तंवा जीवा सुटि कीतोर.
13 अदेन साटि, बह्रि मंवल वोर येसुनगा सोन्जि, वोना अप्मांतुन तूसि येत्कट.
14 इद दुनिया माकुन बस्केट गिर मंवल चहर आयो बति, बविसत्नगा मंवल चहर्तुन* साटि, सूड्सेर मंतट.
15 अदेन साटि, जिव्रस्ना अर्पनतुन बद्लि, मरट येसु कीततुन हिंदल, बगवंतन पार्तना-विंतिता अर्पना सीसेर मंद्कट.
पार्तना-विंतिता अर्पना इत्तेके, येसुये मावोर पर्बु इन्जेर तोड्दे वोप्वल.
16 दुस्रुरकुन चोकोट सूड्वल अनि वूरकुन, मिह्गा मत्ततुन तूसि सिय्वल मरुङ्मट.
ईतङ अर्पनङ बगवंतन वेले आनंद सींतङ.
17 मी चर्चितुर अदिकारिर वेह्ता तीर कीसेर ताकट.
मीवङ आत्मन केप्सेर मंवल काम वूरा आंद.
वूर बगवंतन मुने, मी बारेते लेका वेहा लागर.
वूर वेह्ता तीर मिरट ताक्तेके, तमा किय्वल कामुन आनंद्ने वूर किया परंतेर.
बति वूर वेह्ता तीर ताक्वेके, वूर दुक्सते काम कींतेर.
अस्के मीकुन बतय पाय्दा पुटो.
18 मा साटि पार्तना कीम्ट.
ममोट सम्दो तीर्क्ने मान-मर्यदते पिसेर, मावङ मन-दिल्क्नगा कसुर सेल्वक मंतोम इंवल बरोसा माकुन मंता.
19 नना मिह्गा वासि, उंडे बेटे मानल, ना साटि पार्तना कीम्ट इन्जेर जुल्मा कीसेर मंतोन.
आक्रिता पार्तना
20 इंके मावोर पर्बुन मरंतल तेह्तोर वोर सांति सिय्वल बगवंतल मदत कीनुर.
चोकोट्नोर गोरेङ गाय्किन दात्नोर, सम्दिर बक्तलिरकुन बचि किय्वल येसु, तंवा नेतुडुन हिंदल, बगवंतना बस्केट मंवल नियमुन पूरि कीतोर.
21 बगवंतल हरियेक चोकोट्नतुन साटि तंवा इचतुन, मी रोपो पूरि कियना इन्जेर कोरंतोन.
वोर बगवंतन इस्टम वातङ अव सम्दिन गिर, येसु पर्बुना केय्दे, मी रोपो जर्गुसियना इन्जेर गिर कोर्सेर मंतोन.
पिडिनङ-पिडिङ वेरि, येसु किरिस्तुने मय्मता डगुर-पान वायना इन्जेर कोर्सेर मंतोन.
आमेन!*
आक्रितङ गोस्टिङ
22 नावुर दादलिर-बायिक्निट!
मिरट बक्तितगा मुने बडे मायना इन्जेर इचुङ्सि गोस्टिङ मंवल, इद चिटितुन दिहन इर्सि, वाचि कीम्ट इन्जेर जुल्मा कीसेर मंतोन.
23 मावोर तमुर तिमोति जेल्दल पेसितोर.
वोर नह्गा वेय्ने वातेके, वोन पिय्सि, मीकुन सूडन साटि वांतोन.
24 मिह्गा मंवलिर मुने ताकुस्वलिरकुन अनि बगवंतनुर सम्दिर बक्तलिरकुन, नावा दंडोस वेहट.
इटलि देस्नुर बक्तलिर मीकुन दंडोस वेह्चेर मंतेर.
25 मी सम्दिर सङा, बगवंतना पेर्मता-दया मंदना इन्जेर कोर्सेर मंतोन.