हेब्रि 8

पूना नियम: येसु मावोर पेर्सोर कटोडल आंदुर

1 ममोट वेह्‍ता गोस्टितगा मुके बतल इत्तेके, स्वर्ग्नगा मंवल सर्वा सक्ति वाले बगवंतना राजा-गादितुन तिना बग्ला उच्चि मंवल पेर्सोर कटोडल येसु मा साटि मंतोर. 2 वोरे, रोपो मंवल बेय पवित्रा जागतगा सेवा कीसेर मंतोर. इद पार्तना-विंति किय्वल डेरतुन माय्नलिर वाट्मकि बति, पर्बुये वाड्तोर.

3 हरियेक पेर्सोर कटोडल नेमे माता पेजे, सेसना अर्पनङ अनि पाप्ना मापितुन साटि, बलिदान्क सिया लागर. अह्‍ने, मावोर पेर्सोर कटोडल येसुनगा गिर अर्पना सियन साटि, बतल तेर मंदना इंवल जुरत अर्ता. 4 उंदि मोका, वेर दुनियतगा इंके मन्जि इत्तेके, सादरन कटोडल गिरे आसि मनोर. बारितेके मोसेना कानुन पिय्सि, अर्पना सिय्वलिर कटोडलिर मंतेर. 5 वूर कटोडलिर, सिरिप स्वर्ग्नगा मंवल बेय पवित्रा जागता नक्लि रूप्नगने सेवा कीसेर मंतेर. पार्तना-विंति किय्वल डेरतुन मोसे वाटन मोदोल, “निमे गुटत पोरो मनेके सम्दो नना तोह्‍तपिनय इद नमुनतुन पिय्सिने दिहंते वाटना” इन्जेर बगवंतल वोन दम्कि सीतोर.

6 बति इंके वूर कटोडलिर किय्वल सेवतुन तेर बेय पवित्रा जागतगा येसु तनकुन बगवंतल सीता सेवा कीसेर मंतोर. अचोरे आय्वा, वोर येसु पडना तेर चोकोट्ना पूना नियमुन सुर्वेर्तल आसि मंतोर. इद नियम पडना नियमुन तेर चोकोट्नङ वाग्दनकुन पोरो निल्सि मंता.

7 उंदि मोका अद पडना नियम्नगा बतय गल्ति सेल्वक मंदु इत्तेके, पूना नियम्ना जुरत अर्सि मनो. 8 बति बगवंतल तंवा पर्जतङ गल्तिङ बारेते,

“इचुला! बविसत्नगा नना इज्रयेल लोकुर सङा

अनि यूदया येरियतुर लोकुर सङा पूना नियम इरंतोन.

9 नना वूरुर तोत्तुरकुन दिहंते

मुने कीसि, ईजिप्टनल तत्तोन.

इद पूना नियम अद गट्कते

वूर सङा कीता नियमुन दात मनो.

बारितेके, वूर नना इर्ता नियमुन पिय्सि ताक्सेर मन्मकि.

अदेन साटि वूरकुन नना पटि किय्मकि.

10 बति अव दिवोस्क वीड्ता पेजे इज्रयेल पर्जतुन सङा

नना टरि किय्वल पूना नियम इद आंद.

नना नावा कानुंतगा मंवलिक आगेन

वूरा मंदगा हेतु इरनल कींतोन.

अवेन वूरा दिलतगा लिहि कींतोन.

नना वूरोर बगवंतना आसि मंदंतोन.

वूर ना पर्जा आसि मंदंतेर.

11 अद वकत्ने, ‘बगवंतन करि कीम्ट’

इन्जेर ना बारेते आजु-बाजुतुरकुन

अनि चुटम-बंदकुन बोरे वेह्‍वल जुरत सेले.

सम्दिर बेद-बाव सेल्वक ना बारेते करि कींतेर.

12 नना दयते वूरङ पापकुन

अनि अव करेबलिक कामकुन उंडे बस्केन हेतु कियोन”

इन्जेर लिहि कियुस्तोर.

13 इदेन, ‘पूना नियम्’ इन्जेर बगवंतल केय्ता काड्कि, मोदोडा नियम पडना आसि सोत्ता. बद्ते पडना आंतयो, अद मयड आय्ले तयर मंदंता.

उंडे करि कीका इंदकिते, www.koyang.in सूडा.