बगवंतनोर कटोडल मेल्किसेदेक
7
1 वोर मेल्किसेदेक सालेम्नोर राजल सम्दित डगुर बगवंतनोर कटोडल आसि मत्तोर.
कटोडल मेल्किसेदेक
2 अब्राहम तना मेय्सि तत्ततगटल नूटल दहा ईसङ मेल्किसेदेकुन सीतोर.
‘मेल्किसेदेक्’ इत्तेके, नियत्नोर राजल अनि ‘सालेम्नोर राजल्’ इत्तेके, सांतितोर राजल इन्जेर उंडे उंदि अर्तम.
3 वोनुर तादुर-बाबुर अनि अवल-बाबो बूर आंदिरो, बोने टावा सेले.
वोना पुड्ता साता गिर बोने टावा सेले.
बगवंतनोर मरिन दात बस्केट गिरे, वोर कटोडल आसि मंतोर इंवले टावा.
4 वोर मेल्किसेदेक बचोर डगुर आंदुरो, करि कीम्ट.
बारितेके मावोर तोत्तोर अब्राहम गिर, तना लडेयतगा मेय्सि तत्ततगटल, नूटल दहा ईसङ मेल्किसेदेकुन सीतोर.
5 लेविना कांदांतुर कटोडा-पान ताकुसना अनि अब्राहम्ना कांदांतगा पुट्तुर वूर तादल-तमुक आसि गिर, नूटल दहा ईसङ लेविना कांदांतुर कटोडलिरकुन सियना इन्जेर मोसेना कानुंतगा* हुकुम मंता.
6 मेल्किसेदेक लेविना कांदांतोर आयोर.
तेर बति बगवंतनगटल वाग्दन्क येत्तोर.
वोर अब्राहमनल नूटल दहा ईसङ मेल्किसेदेक येच्चि, अब्राहमुन आसिर्वाद सीतोर.
7 आसिर्वाद सिय्वल, आसिर्वाद येत्वन तेर डगुर-पान वाले इंवडगा बतय अनुमानम सेले.
8 लेविना कांदांतुर पिसेर मन्जि, साय्वलिर नूटल दहा ईसङ येच्चेर मंतेर.
बति बस्केट गिर पिस्वल मेल्किसेदेक गिर, नूटल दहा ईसङ येत्तोर इन्जेर मंता.
9 उंदि तीर्दे सूड्तेके, नूटल दहा ईसङ येत्वल लेवि गिर, अब्राहमुन हिंदल, नूटल दहा ईसङ मेल्किसेदेकुन सीतोर इन्जेर वेहा वचो.
10 बारितेके अब्राहम मेल्किसेदेकुन बेटे मातोर अस्के, अब्राहम्ना कांदांतगा लेवि जल्मा आय्लेके मत्तोर.*
येसु मेल्किसेदेकुन दात्नोर कटोडल
11 मोसेना कानुंतगा, लेविना कांदांतुर कटोडा-पान कियना इन्जेर मंता.
बति वूर कटोडलिर तम्वा कार्यतुन बर्पुर किया पर्मकि.
उंदि मोका वूर किय्वल कार्या बर्पुर मन्मड इत्तेके, अहरोंतुन* दात्नोर उंडे वोरोर कटोडन बगवंतल रोह्ंदुर.
बति मेल्किसेदेकुन* दात्नोर उंडे वोरोर कटोडना बारि जुरत अर्ता?
12 कटोडा-पान मारितेके, अदेन बरोबर कानुन गिर मारिया लागर.
13 इव गोस्टिङ दुस्रो कांदांतोर येसुन बारेते वेह्चेर मंतङ.
इद कांदांतुर बस्केने बगवंतना मंदिर्ता बलि सिय्वल जागतगा कटोडा-पान किय्मकि.
14 मा येसु पर्बु यूदना कांदांतल वातोर इन्जेर अनि इद कांदांतुर कटोडलिर आयना इन्जेर मोसे बगन वेह्मकि इन्जेर माकुन टावये.
15 मेल्किसेदेकुन दात कटोडल आंतोर इंवल गोस्टितुन पर्बु उंडे इचुर करल कीतोर.
16 कानुन वेह्ता अद लेविना कांदांतुन पिय्सि, कटोडल आय्मकि बति, तना बस्केट गिर जीवते मंवल सक्तिते कटोडल आया पर्तोर.
17 बारितेके,
“निमे मेल्किसेदेकुन दात
कटोडनि आसि बस्केट मंदंति!”
+
इन्जेर दर्मा-ग्रंत वेह्चेर मंता.
18-19 मोसेना कानुन बततुने बर्पुर किया पर्मकि.
अद कानुन कम्जोर मंता अनि बततुने कामि सिय्वक आता इन्जेर बगवंतल तान हब्रि इर्तोर.
अदेन बद्लि, बगवंतल तान तेर चोकोट्ना आसतुन इर्तोर.
इदेन पिय्सि, मरट बगवंतन करुम सोंदा वचो.
20-21 अचोरे आय्वा बगवंतल वोट वाड्तोर, बति दुस्रोर बोरे कटोडन साटि वोट वाट्मकि.
दर्मा-ग्रंत्नगा,
“पर्बु बगवंतल वोट वाड्तोर
अनि वोना मंदुन मार्युसियोर.
निमे कटोडनि आसि बस्केट मंदंति!”
+
इन्जेर बगवंतल वोन सङा इत्तोर.
22 इद वोटुन हिंदल, पडना नियमुन तेर चोकोट्ना पूना नियम आंद इन्जेर येसु गारंटि आसि निल्तोर.
23 उंडे उंदि तेडा बतल इत्तेके, वेलेटिर लोकुर कटोडलिर आतेर, बति मरन वूरकुन बस्केट गिर कटोडलिर आसि मंवक्ने अड्डम आता.
24 बति येसुन मरन सेल्वा काड्कि, वोर बस्केट गिर पेर्सोर कटोडल आसि मंदंतोर.
25 अदेन साटि येसु तन हिंदल, बगवंतनगा वाय्वलिरकुन बस्केट गिरे बचि कींतोर.
वोर येसु वूर हिंदल आसि, बगवंतन विनंति किय्ले, बस्केट गिर पिसिन मंदंतोर.
26 ईतोर पेर्सोर कटोडल पवित्रा वाले, बे-कसुर वाले, बदे तप्ना डाग सेलोर वोर, पापिर सङा मनोर वोर, स्वर्ग्नगा डगुर-पान वाले आंदुर.
27 वोर येसु, दुस्रुर पेर्सुर कटोडलिर दात तंवङ पापकुन साटिन आयि, पर्जतङ पापकुन साटिने आयि, रोजि अर्पना सिय्वल जुरत सेले.
बारितेके सम्दिर पर्जतङ पापकुन साटि, तंवा तनय बलिदान उंदिय जोका सीसि वाड्तोर.
28 मोसेना कानुन सक्ति सेलुर वूरकुन पेर्सुर कटोडलिर दात नेमि कीता.
बति कानुंतुन पेजेय वाता अद वोट, बगवंतनोर मरिन पेर्सोर कटोडन दात नेमि कीता.
अचोरे आय्वा, वोर बस्केट गिरे बर्पुर पेर्सोर कटोडल आसि मंवल आंदुर.