6
1 ते किरिसतुन बारेते मोदोडङ बोदङ गडि गडि वेह्वक्ने अवेन सुटि कीसि, मुने सोन्जि बेर्स्तुर दात तयर आकट.
मरंतेके वोय्वलिक करब्नङ काम्कनल चुक चुके मासि, बगवंतन पोरो बरोसा इर्वल,
2 बाप्तिस्मतुन बारेते बोदा वेह्वल, तलत पोरो केय्क इर्वल, बविसत्ने सातुर वूर नेंड्वल अनि बगवंतल वूरकुन आक्रिता तस्वा किय्वल इंवलिक ईतङ किरिसतुन बारेतङ मोदोडङ मुके बोदन मल्सि, गडि गडि मीकुन वेह्वल जुरत सेले.
3 इदेन बद्लि, बगवंतल मुने सोंदन साटि मोका सीतेके, मुने दाकट.
बगवंतना बरोसतल बह्के मातुर बारेते
4-5 बगवंतना बरोसतल बह्के मातुरकुन मरट मलुसि तचि, चुक चुके मानल बहन किया वांता?
वूर मोदोल बगवंतना सतेमुन करि कीसि, बगवंतनङ आसिर्वाद्क्ना अनुबव सूड्सि, पवित्रा आत्मतगा ईसा येच्चि, बगवंतना वचंता चोकोट-पांदुन बारेते अनुबव कीसि, बविसत्ने किय्वलिक बगवंतना सक्तितङ कामकुन बारेते करि कीतेर.
6 इव सम्दो अनुबव येच्चि गिरे, बगवंतना बरोसतल बह्के मातुरकुन बस्केट्के मलुसि, चुक चुके मानल किया वायो.
इदेन हिंदल बगवंतनोर मरिन, वूर तिरिसि मोद्नगा* मोलने पासि, पर्जत मुने वोर मरिना लजा सोनल कीसेर मंतेर.
7 वूर लोकुर करब्ना बोमित दात्नुर आंदिर.
पिर्क्ने अर्ता येतुन, बद्ते वाव्टा बोमि ऊच्चि, वोर येव्सदारन चोकोट्ना पंटा सींतयो, अद बोमितुन बगवंतना आसिर्वाद पुटंता.
8 बति इदेन बद्लि, अद वाव्टा बोमितगा चह्क्नङ पोदेलङ अनि जाडि वेलिङ बेर्स्तेके, अद बोमि कामि सियो इन्जि, जुलुक्ने येव्सदारल* सापेना सीसि, डुंडुसि वाटंतोर.
बगवंतल बस्केट्के मीकुन मर्न्गोर
9 नावुर लाड्नुर तादल-तमुर्निट!
मिरट चोकोट्नङे काम्क कीसेर मंतिट.
बारितेके, मीकुन मुनेने बगवंतल बचि कीतोर.
अदेन साटि, जरब्ने मंदना इंवलिक इव गोस्टिङ मी बारेते आयो.
10 बगवंतना पोरोडे मिरट कीतङ, चोकोट्नङ काम्क अनि बगवंतनुर बक्तलिरकुन, मिरट इंके लाड्दे किय्वल सेवता कामुन हिंदल, बगवंतल बस्केट्के मीकुन मर्न्गोर.
बारितेके वोर नियत्नोर आंदुर.
11-12 गह्ललिर आय्मट.
बति बरोसते वोर्चि बगवंतल सीतङ वाग्दनकुन येतन साटि, पर्पेडे माय्वलिर दात इव कामकुन आक्रि वेरि कीसेर, मुक्ति सिय्वल आसतुन सुटि किय्वक्ने मंट.
बगवंतना वाग्दन
13-14 अस्के बगवंतल तनकुन तेर डगुर बोरे सेले मत्ता काड्कि, तंवा पोरोडेने आडा येच्चि, अब्राहमुन सङा, “नना नीकुन करलेने आसिर्वाद सींतोन अनि नीवा संतांदुन बडि कींतोन”+ इन्जेर वाग्दन सीतोर.
15 तान साटि अब्राहम वोर्चि सूड्सेर मत्तोर.
ते अद वाग्दंतुन बगवंतल पूरि कीतोर.
16 तमकुन अनि दुस्रुर नड्डुम जिद्ने तगपर ताक्नेके, बद्तेर उंदि बाज्नुर वोपन साटि तम्वकुन तेर डगुना पोरोडे वोट वाटंतेर.
अस्के, अद वोट्नगा सते मंता इन्जेर करि कीसि, जिद्ना तगपर दबे मांता.
17 बगवंतल तना सीता वाग्दंतुन बस्केट्के मार्यु सियोन इन्जेर अद वाग्दन येत्वलिरकुन वेहन साटि, तंवा पोरो तना वोट वाट्तोर.
18 बगवंतना वाग्दन अनि आडा, इव रंड गिर मारिवलिक आयोङ.
इवेन बारेते, बगवंतल लबड वड्का परोर.
मुक्तितगा सोंदना इंवलिर, उंडे इचुर गटि-दीर्यते मुने सोंदना इन्जेर बगवंतल आसा कींतोर.
19 इद मुक्तिता आसा माकुन लगु वाले आसि, मावा आत्मतुन रूकता ‘लङर्तुन’* दात बह्के माया सिय्वक्ने स्वर्ग्नगा मंवल बगवंतना जागतगा माकुन येवुसा परंता.
20 बारितेके मा हिंदल आसि, माकुन तेर मुने मावोर पेर्सोर कटोडल येसु, अद स्वर्गुन रोपो नेङ्तोर.
मेल्किसेदेकुन दात येसु बस्केट गिरे पेर्सोर कटोडल आसि मंतोर.