पेर्सोर कटोडना डगुर-पान बोरे येता वायो
5
1 पर्जा, तम्गटल वोरोन पेर्सोर कटोडल इन्जेर नेमि कींतेर.
पर्जतुन बद्लि, बगवंतना चर्नते सेसङ अनि पाप्ना मापितुन साटि, वोर कटोडल अर्पना सींतोर.
2 वोर पेर्सोर कटोडल गिर वेले तीर्क्ने कम्जोर्ते मंतोर.
अदेन साटि, करे माय्वा तप कीतुर पोरो, सोङ वाय्वक्ने चोकोटे सूडंतोर.
3 इद कारंतुन हिंदले, वोर पेर्सोर कटोडल तंवङ पापकुन साटि बलिदान सीसि, पर्जतङ पापकुन साटि गिर बलिदान सिया लागर.
4 बोरे मायनल तंवा तना पेर्सोर कटोडना डगुर-पान येता वायो.
बगवंतल मोदोल, अहरोंतुन पेर्सोर कटोडल इन्जेर बहंते केय्सि नेमि कीतोरो, अह्ने दुस्रोर पेर्सोर कटोडन केय्सि नेमि कींतोर.
5 किरिस्तु गिर पेर्सोर कटोडना कटोडा-पांदुन तंवा तना येत्मकि.
बति बगवंतले वोन सङा,
“निमे नावोर मरिनि आंदि.
नना नेंड नीकुन मिय्तोन”+
“निमे मेल्किसेदेकुन दात
कटोडनि आसि बस्केट मंदंति!”
+
इन्जेर नेमि कीतोर.
7 येसु तना बोमित पोरो पिसि मनेके, तनकुन मरंतल बचि किया पर्वल बगवंतन आड्सेर, काडेर तुह्चेर विनंति कीसेर, पार्तना कीतोर.
वोन्गा मंवल बाव-बक्तितुन पिय्सि, बगवंतल वोना पार्तनतुन केन्ज्तोर.
8 येसु बगवंतनोर मरि आसि गिर, कस्टलकुन बोगे मासि बाबोना जरब्ने बहन मंदना इंवल करि कीतोर.
9 इद तरिकते बगवंतल, वोन सम्दो तीर्क्ने बर्पुर गुन वाले, पेर्सोर कटोडल इन्जेर वोप्तोर.
वोना वचन पिय्सि, बूर्ते ताकंतेरो, वूरकुन बस्केट मंवल जीवा सिय्ले, आदर आसि निल्तोर.
10 बगवंतल वोर येसुन मेल्किसेदेकुन दात्नोर पेर्सोर कटोडल इन्जेर नेमि कीतोर.
उंडे गिर मिरट पसि-बाललिर आसि मंतिट
11 इदेन बारेते वेहना इत्तेके, वेले गोस्टिङ मंतङ.
बति अवेन पोडि कीसि वेहना इत्तेके कस्टम आंता.
बारितेके मिरट बगवंतनङ गोस्टिङ करि किय्ले गह्ललिर आसि मंतिट.
12 कालमुन पिय्सि सूड्तेके, मिरट इंके बोदा करुस्वलिर आसि मंदा मत्ता.
बति मीकुने उंडे वोरोर बगवंतनङ मोदोडङ वचन्क्ना बोदा करुसा लागर.
इव मोदोडङ वचन्क पालदुन दात अनि बगवंतनङ वेले मर्मतङ वचन्क गट वाले कानेत दात मंतङ.
मिरट गट वाले काने तिंदा पर्विट, बति मिरट उंडे गिरे मोड्डे-मोड्डलिर दात पाले उंडा लागर.
13 वटि पाल उन्जि मंवलिर, उंडे गिर वूर पसि-बाललिरे आंदिर.
अदेन साटि, वूरकुन चोकोट-वायुट्ना टावा सेले.
14 गट वाले काने बेर्स्तुर साटिने, इत्तेके चोकोट-वायुट करि किय्वल सिक्सान करिसि, अवेन पिय्सि ताक्तुर वूर साटिने मंता.