बगवंतनुर बक्तलिरकुन वाग्दन सीता आरम
4
1 बगवंतना आरम्ना जागतगा सोंवल वाग्दन, इंके उंडे गिर अह्ने मंता.
इदेन हिंदल अगा सोंवल मोकतुन मिह्गटल बोरे सुटि किय्वक्ने, मंदना इन्जेर वेरेते अनि दिहंते मंद्कट.
2 मरट चोकोट्ना कबुडुन बारेते केन्ज्तपिनय, वूर तोत्तुर गिर अद आरम येत्वडा गोस्टितुन बारेते केन्ज्तेर.
बति अद गोस्टितुन पोरो बरोसा इर्मकि.
अदेन साटि वूरकुन अद गोस्टि बतय कामि सिय्मकि.
3 आरम्ना जागता चोकोट्ना कबुडुन पोरो, बरोसा इर्वलिर मरट, तप्वक बगवंतनगा सोंदा परंतट.
बति बरोसा इरुर,
“‘वूरकुन नावा आरम्ना जागतगा
बस्केन वाया सियोन’
इन्जि सोङ्ने आडा वाड्तोन”+
इन्जेर बगवंतल इत्तोर.
बति इद इंके, मंवल आरम्ना जागा कलि गडे माता अगटले मंता इन्जेर माकुन टावा.
4 बति आरम्ना दिवोसुन बारेते, “बगवंतल कलि गडि किय्वल मह्ता पेजे, येडुङ रोज्क्ने आरम येत्तोर”+ इन्जेर लिहि कीसि मंता.
5 उंडे उंदि जोका, “वूरकुन नावा आरम्ना जागतगा बस्केन वाया सियोन” इन्जेर वेह्तोर.
6 इदेन मुने, मा तोत्तुर चोकोट्ना कबुडुन पोरो बरोसा इर्वा सोन्जि, वूरकुन अद आरम्ना जागतगा सोंले मोका पुट्मकि.
बति कहि लोकुरकुन, अद आरम्ना जागतगा सोंदन साटि, उंडे गिर मोका मंता.
7 अदेन साटिने, बगवंतल उंडे उंदि दिवोसुन नेमि कीसि इर्तोर.
अदेने ‘नेटा दिवोस्’ इंतोर.
नना मीकुन मुने लिहि कीतपिनय वेले साल्क आता पेजे,
“मिरट नेटा दिवोस्ने नावा गोस्टि केन्ज्किट्ते,
मीवङ दिल्क्नगा मूजोर्क आय्मट”+
इन्जेर दाविद्ना केय्दे वड्कुसीतोर.
8 येहोसुवल वूरकुन आरम सिय्मड इत्तेके, बगवंतल उंडे उंदि दिवोसुन बारेते वेह्वक मंदुर.
9 अदेन हिंदले, बगवंतल येडवा दिवोस्ने आरम येत्तपे, तंवुर बक्तलिरकुन अद आरम्ना दिवोस निल्सि मंता.
10 बगवंतल तंवा कामनल आरम येत्तपे, वोनुर बक्तलिर गिर आरम्ना जागतगा सोत्ता पेजे, वूरा काम मार्सि दांता.
11 बगवंतल वेह्ता तीर ताकोर वोर, तोत्तुर इज्रयेल पर्जतुन दात, हुकुम पिय्सि ताकोर वोर आंतोर.
अदेन साटि, अद स्वर्ग्ना आरम्ना जागतगा सोंदना इन्जेर मरट सम्दिर वेरिसेर उय्सर्ते कोसिद कीकट.
12 बारितेके बगवंतना वचन जीवा वाले अनि सक्ति वाले आंद.
अद वचन रंड काकुन दार मंवल तल्वरतुन तेर, अदिक दार वाले आंद.
अद तल्वर कील्चन अनि मूल्गेन बहंते चीरि कींतयो, अह्ने माय्नना आत्मा अनि परंतुन रोपोडङ विचरकुन गिर बह्रि वाट्सि, तस्वा कींता.
13 इद कलितगा मंवल बदे वस्तु गिर, वोर बगवंतना नदुडल तपुसा परो.
कडकुन मुने वोड्तपिनय, सम्दितुन तात्कर सूडा परंतोर.
अहन सूड्वल बगवंतन, मरट मा बारेते लेका वेहा लागर.
येसु पेर्सोर कटोडल आंदुर
14 स्वर्ग्नगा सोत्तोर वोर येसु बगवंतनोर मरि आंदुर.
पेर्सोर कटोडल येसु पर्जतुन सङा
अदेन साटि, मरट बरोसा इर्सि, सम्दिर मुने वोप्ता अदेन, सुटि किय्वक्ने गट मंद्कट.
15 मावोर पेर्सोर कटोडल मावा कम्जोर पान करि कीसि, मा पोरो वोना दिल नोंता.
बारितेके वोर येसु, मा दाते हरियेक परिक्सन बोगे मातोर, बति बदे पाप किय्मकि.
16 अदेन साटि गटि-दीर्या कीसि, बगवंतन करुम* दाकट.
अहन सोत्तेकेन, बस्के पह्जे मत्तेके अस्के, वोर बगवंतना किवुल अनि पेर्मता-दया माकुन पुटंतङ.