येसु मोसेन तेर डगुर आंदुर
3
1 अदेन साटि, स्वर्ग्नगा मंले बगवंतल केय्तुर वूर दादलिर-बायिक्निट!
बगवंतल सारि कीतोर कब्रियल अनि पेर्सोर कटोडल इन्जेर येसुन मरट वोप्तट.
वोन बारेते दिहन इर्सि सोन्च कीम्ट.
2 बगवंतल, तनकुन हव्लि कीता कामुन मोसे बरोसते कीतोर.
अह्ने येसु गिर बगवंतल तनकुन हव्लि कीता कामुन बरोसते कीतोर.
3 रोतुन तेरे रोन दोहुस्वल माल्कन वेले मानि कींतेर.
अह्ने मोसेंतेरे येसु डगुर-पान वाले इन्जेर मेचनल पोरोल कमय कीतोर.
4 बारितेके हरियेक रोतुन बोरेय वोरोर दोहंतेर बति सम्दोतुन गडि कीतोर वोर बगवंतले.
5 पूरो बगवंतना पर्जतुन साटि, मोसे सेव्कन दात बरोसते काम कीतोर.
वोर कीतङ काम्क, सिरिप बविसत्ने बगवंतल वड्क्वलिक सत्नङ नमुनङ आंदुङ.
6 बति किरिस्तु बगवंतना पर्जत पोरो अदिकार वाले आसि, बगवंतनोर बरोसते मंवल मरि आंदुर.
माकुन बहन तेर मुक्ति पुटंता इन्जेर बरोसते, मावा मंदुन गट कीतेके, मरटे वोना रोतुर* आसि मंदंतट.
दिल्क बह्के मातुरकुन दम्कि
7-8 अदेन साटिने पवित्रा आत्मा इहिन इत्ता:
“नाकुन परिक्सा कीसेर बय्मन आसि,
मी तोत्तुर बोडि गुटनगा ना पोरो उल्टा तेत्तेर.
मिरट नेटा दिवोस्ने नावा गोस्टि केन्ज्किट्ते,
मी तोत्तुर वूरङ दिलकुन मूजोर कीतपिनय मिरट किय्मट.
9
पर्जा बगवंतन मरुङ्सि मूर्तिना पूजा किय्वल
बोडि गुटनगा नावा हवड सूड्तेर”
10 “अद कारंतुन हिंदले,
वूर पर्जा इत्तेके नाकुन सोङ वाता.
‘वूरङ दिल्क नह्गटल बह्के मातङ.
नना वेह्ता सरि-मारग पिय्सि ताक्ले वूर वोप्मकि.’
11 अदेन साटिने,
‘वूरकुन नावा आरम्ना जागतगा
बस्केन वाया सियोन’
इन्जि सोङ्ने आडा वाड्तोन”+
इन्जेर बगवंतल इत्तोर.
12 नावुर दादलिर-बायिक्निट!
उय्सर्ते मंट!
जीवते मंवल बगवंतन पोरो बरोसा इर्वक्ने, बह्के माय्वल करब दिल, मी रोपो बोन्गने मंवक्ने सूडट.
13 दर्मा-ग्रंत्ना, ‘नेटा दिवोस्ने’ इंवल बगवंतना वचन मिरट केन्ज्किट्ते, हर दिवोस वोरोन वोरोर जरब्ने इर्सेर चोकोटे ताकट.
अस्के पापुन रोपो कोंडे माय्वक्ने मंदंतिट अनि मीवङ दिल्क मूजोर्क आय्वक्ने मंदंतङ.
14 बारितेके मरट मावा बरोसा इर्ता मोदोडल्ते, सानल वेरि, अद बरोसतगा उंदि तीर गट मत्तेकेन, किरिस्तुनगा उंदि आंतट.
15 इदेन मुने वेह्तपिनय:
“मिरट नेटा दिवोस्ने नावा गोस्टि केन्ज्किट्ते,
मी तोत्तुर बय्मन आसि,
वूरङ दिलकुन मूजोर कीतपिनय मिरट किय्मट.”+
16 बगवंतना वचन केन्चि गिर, उल्टा ताक्तुर वूर बूर आंदिर?
मोसे ईजिप्टनल तत्तुर वूर आयुर कि बतल?
17 बगवंतल चालिस (40) साल्क बूर पोरो सोङ्ने मत्तोर?
पाप कीसि बोडि गुटनगा सातुर पोरोने कि?
18 वूर वोड्कि मन्जि गिर बह्के मासि ताक्तुर बारेते, “वूरकुन नावा आरम्ना जागतगा बस्केन वाया सियोन” इन्जेर आडा वाड्तोर कि?
हो वाड्तोर!
19 इद सम्दि सूड्सि, वूर तमा बरोसा इर्वा सोन्जिने, अद आरम्ना जागतगा सोंदा पर्मकि इन्जेर करि कींतट.