दिहंते मंट इन्जेर वेह्वल
2
1 अदेन साटि मरट केन्ज्तङ सते गोस्टिङ चोकोट दिहंते इर्सि, बगवंतना सतनल बह्के माय्वक्ने मंदा लागर.
2 बारितेके, दूतलिरा केय्दे वेहुसीता कबुर* निल्सि मत्ता अनि अद कबुडुन पिय्सि ताकोर वोना हरियेक बगड-नियतुन, हरियेक करब कामुन सिक्सा अर्वल नायमे आंद.
3 इचोर डगुर बचि किय्वल कबुडुन पोरो मरट दिहन इर्सि ताक्वेके, माकुन वाय्वल सिक्सतुन बहन तपु सिया पर्कट?
मोदोल इद मुक्तिता कबुडुन पर्बुये वेह्तोर.
अद कबुडुन केन्ज्तुर वूर तान्गा मंवल सतुन माकुन वेह्तेर.
4 अद कबुर सतेम आंद इन्जेर वेले चमत्कार्क अनि मय्मतङ काम्क अनि तंवा पवित्रा आत्मता सक्तितङ वरम्क बक्तलिरकुन सीसि, तंवा इचा मत्ता तीर बगवंतल गवङ तोह्तोर.
येसु नरिमन्कना रूप येत्वल
5 ममोट बविसत्ने वाय्वल लोकमुन बारेते वेह्चेर मंतोम.
तान बगवंतल दूतलिरा केय्दे हव्लि किय्मकि.
6 इदेन बद्लि दर्मा-ग्रंत्नगा वोरोर इहिन इन्जेर गवा वेह्तोर:
“हो बगवंता!
बततुने कामि सियोर वोर नरिमन्कन बारेते,
निमे सोन्च किय्ले अनि हेतु किय्ले वोर बचोडोर आंदुर?
7 वोन इचुसि वकत वेरि,
दूतलिरकुन तेरे चुडुर-पान सीति.
बति डगुर-पान तोहन साटि,
निमे मय्मता किरिट वोना तलत पोरो केरुसीति.
8 अनि सम्दोतुन वोनङ कालकुन बूड इर्ति” +
इन्जेर लिहि कीसि मंता.
‘सम्दोतुन्’ इत्तेके, बततुने सुटि किय्वक्ने, सम्दोत पोरो बगवंतल वोन अदिकार सीतोर इन्जेर अर्तम.
बति इंके सम्दि वोना अदिकार्दे मत्तप दिसेर सेलेङ.
9 बति करल बतल इत्तेके, इचुसि वकत वेरि, येसु दूतलिरकुन तेर कमि-पांदे मत्तोर.
लोकम्नुर सम्दिर साटि, बगवंतना पेर्मता-दयतुन हिंदल, येसु तक्लिब्क बोगे मासि मार्तोर.
अदेन साटि, बगवंतल वोन डगुर-पान तोहन साटि, मय्मता किरिट वोना तलत पोरो केरुसीतोर.
10 बगवंतल तंवा साटि, इव सम्दोन गडि कीतोर अनि तंवा साटि सम्दोन ताकुसेर मंतोर.
इदेन हिंदल, वेलेटिर लोकुरकुन मय्मता जागतगा तर्ले, बचि किय्वल येसु तक्लिब्क बोगे मासि, बर्पुर गुन वाले आय्वल बरोबरे आंद इन्जेर बगवंतल निर्नय कीतोर.
नरिमन्कन तंवुर तादल-तमुक इंले येसु लजे मायोर
11 पापेस्तलिरकुन पवित्रा किय्वल येसु अनि पवित्रा आतुर वूर पर्जा, वोरोरे बाबोनगटल पुड्तुर आंदिर.
अदेन साटिने, वूरकुन तंवुर तादल-तमुक इंले, येसु लजे मायोर.
12 “नी पोरोलदुन बारेते,
नावुर तादल-तमुकुन पचर कीसि वेहंतोन.
मीरे मासि मंवलिर सम्दिर मुने नीकुन डगुर-पान सीसेर,
कीर्तन्क वारंतोन”+
इन्जेर वोर बगवंतन इत्तोर.
13 उंडे उंदि जागा,
“नाकुन बगवंतन पोरो बरोसा मंता.”
+
इचोरे आय्वा उंडे गिर,
“नना अनि बगवंतल नाकुन सीता
मरि-मियड इगे मंतोम”+
इन्जेर वेह्चेर मंतोर.
14 मरि-मियड इन्जेर केय्वलिर मेंदोडा रूप्ने मत्ता काड्कि, येसु गिर हर उंदि तीर्दे मा दाते आसि वातोर.
वोर तंवा मरंतुन हिंदल, मरंतुन पोरो अदिकार वाले, सय्तंदुन नासेडम कियना इन्जेरेन इहिन कीतोर.
15 इदेन हिंदल पिसि मंवल कालम्नगा मरंता वेरेते, दासिर दात पिसेर मंवलिरकुन मुक्ति सीतोर.
16 बारितेके येसु, बगवंतनुर दूतलिरकुन मदत कियन साटि वाय्मकि, बति अब्राहम्ना संतांदुन मदत कियना इन्जेरेन वातोर.
येसु सम्दिरकुन तंवुर तादल-तमुर इंले लजे मायोर
17 इद कारंतुन हिंदले, वोर येसु सम्दो तीर्दे मा दात रूप येत्वल जुरत अर्ता.
इदेन हिंदल बगवंतन मुने, वोर मावोर बरोसतोर दया वाले पेर्सोर कटोडल आया परंतोर.
अस्केन वोर मावङ पापकुन कंडि किय्ले बलिदान सिया परंतोर.
18 तना तक्लिब्क्ना परिक्सा बोगे मासि मेय्ता काड्कि, इंके तक्लिब्क्ना परिक्सा बोगे माय्वलिरकुन मदत किया परंतोर.