हेब्रि
हेब्रियुलकुन लिहि कीता चिटि
बगवंतनोर मरि येसु किरिस्तु आंदुर
1
1 तोलेता गट्कते बगवंतल वेले जोकङ, वेले तीर्क्ने पर्वक्तलिरा केय्दे, मा तोत्तुर सङा वड्क्तोर.
2 बति इव आक्रितङ दिवोस्कुन रोपो तंवोर मरिना केय्दे मा सङा वड्क्तोर.
तंवोर मरिना केय्दे इद कलितुन गडि कीतोर.
इद कलितुन पोरो वोर मरि ईसदारल आंदुर इन्जि नेमि कीतोर.
3-4 वोर मरि बगवंतना गुन-गांता रूप्ने अनि मय्मता वेड्चिते मिड्चेर मंतोर.
वोर मरि तंवा सक्ति वाले वचंते इद कलि सम्दोतुन ताकुसेर मंतोर.
तनय सम्दो पाप्कनल माकुन सुदुड कीतोर.
इदेन हिंदल स्वर्ग्नगा मंवल सर्वा सक्तिवंतल बगवंतना तिना बग्ला* सोन्जि उत्तोर.
इद सूड्सि वोर मरि, बगवंतनुर दूतलिरकुन तेर बेय चोकोट्ना पोरोल अनि डगुर-पान वाले इन्जेर माकुन करे मांता.
5 “निमे नावोर मरिनि आंदि.
नना नेंड नीकुन मिय्तोन”+
इन्जेर मरिन वेह्तपिनय बगवंतल बोरे दूतन बस्केन वेह्मकि.
अह्ने उंडे उंदि जागा बगवंतल,
“नना वोन बाबोना आंतोन.
वोर नाकुन मरि आंतोर”+
इन्जेर येसुन तपुसि बोरे दूतन बगवंतल बस्केन वेह्मकि.
6 इदे आय्वा उंडे उंदि जागा, बस्केते तंवोर मडनोर मरिन इद कलितगा केयुसंतोरो अस्के,
“तंवुर दूतलिर सम्दिर वोना पार्तना-विंति* कियना”
इन्जेर वेह्तोर.
7 “बगवंतल तंवुर दूतलिरकुन वडिद दात
अनि तंवुर सेव्कलिरकुन तड्मितङ जारकुन दात किय्वल आंदुर”+
इन्जेर बगवंतल तंवुर दूतलिर बारेते वेह्तोर.
8 बति तंवोर मरिन बारेते,
“हो बगवंता, नीवा राजा-गादि बस्केट निल्सि मंदंता.
अनि निमे बस्केट नियत्ने राज ताकुसंति.
9 निमे नियतुन लाड्दे सूड्ति
अनि बगड-नियतुन पगते सूड्ति.
इदेन हिंदले, पर्बु आय्वल बगवंतल
सम्दिर्गटल नीकुन नेमि कीसि,
डगुर-पान सीसि बर्पुर आनंद्ने निह्तोन”+
इन्जेर वेह्तोर.
10 उंडे गिर तंवोर मरिन बारेते,
“पर्बु मोदोल दर्तुरितुन गडि कीतोनि आंदि.
हाबडुन गिर निमेय गडि कीति.
11 अव सम्दो मूरे मासि दांतङ.
बति निमे बस्केट गिरे मंवनि आंदि.
अव सम्दो पोंड्तङ कप्डिन दात पडनङ आंतङ.
12 अव पडनङ कप्डिन दात अद दर्तुरितुन
अनि हाबडुन आट-मुट कीसि वाडि सींति.
अवेन बद्लि पूनङ तयर कींति.
बति निमे बस्केट गिरे उंदि तीर मंवनि आंदि.
निमे बस्केट्के साय्वनि आय्वि”+
इन्जेर वेह्तोर.
13 उंडे गिर,
“नी दुस्मन-दारकुन नीवङ कालकुन बूड्ना कुतुडुन दात नना कीनल वेरि,
निमे ना तिना बग्ला वासि उदा”+
इन्जेर येसुन वेह्तपिनय बगवंतल बोरे दूतन बस्केन वेह्मकि.
14 दूतलिर सिरिप आत्मता रूप्ने मंवलिर बगवंतनुर सेव्कलिर आंदिर.
चर्नते वासि बचे माय्वलिरकुन मदत कियन साटि, सारि कीतुर आंदिर.