पिलिपि 3

बगवंतल वोपनल मंवल जिन्गनि

1 नावुर दादलिर-बायिक्निट!

मिरट पर्बुनुर आता काड्कि, आनंद्ने मंट.

ईतङ गोस्टिङ मर्ला लिहि किय्ले नाकुन कस्टम सेले.

बारितेके इव मीकुन पसि किय्वलिक बोदनल काबाड्ले कामि सींतङ.

2 अदेन साटि दिहंते मंट!

लांडिगलिकुन मोडि करब किय्वलिर, बगवंतना पर्जा आय्ले, तोल कत्रि कियना इन्जेर जुल्मा कींतेर.

3 बति मरट ईतङ कार्यनगा बरोसा इरन बद्लि, येसु किरिस्तुनगा बरोसा इर्तट.

वोर येसु मा साटि जीवा सीततुन हिंदल मरट गर्वते मंतट.

वोना आत्मते बगवंतना पार्तना-विंति कींतट.

इहिन सम्दो किय्वलिर मरटे करल तोल कत्रि कियुस्तुर आंदट बति, वूर आयुर.

4-6 वूर पह्‍जे इत्तेके, मेंदोड पोरो किय्वलिक अव कार्यनगा नना गिर कीसेर ताका वचो.

बहन इत्तेके, पुड्ता पेजे आट रोज्क्ने मोसेना कानुन तीर नाकुन तोल कत्रि कियुस्तेर.

इज्रयेल^* देस्नोना, पिवर यूदुल्क्ना जातितोना अनि नना बेंयमींता कांदंतोना आंदुन.

परिसयुल्क्ना बाज्नोना आसि, अद कानुन मत्ता तीरे ताक्ंदुन.

इहिन जोस्ने ताक्सेर, नना किरिस्तुनुर बक्तलिरकुन दुक्सा सीतोना आंदुन.

अद कानुन तीर नियत्ने पिस्तोना आंदुन.

इद तीर्दे नना मोदोल, वूरकुन तेर अदिक सम्दो नेकि-बदिङ पिय्सि ताक्ंदुन.

7 इव सम्दो नाकुन पाय्दा सीसेर मंतङ इन्जेर मोदोल सम्जे मांदुन.

बति इंके, किरिसतुन हिंदल, अव सम्दो गिर येर्तमे इन्जेर टावा आता.

8 अचोरे आय्वा, ना येसु किरिस्तु पर्बुन करि किय्ले, सम्दो गिर येर्तमे इन्जेर सम्जे मांतोन.

किरिस्तु दुस्रोक सम्दोनल तेर बेय विलुवा वाले आंदुर.

अदेन साटि, वोर नाकुन पह्‍जे इन्जेर अव सम्दोन वियडुन मोडि सम्जे मासि पेकि कीतोन.

9 अनि किरिसतुन सङा येकि आसि मंदना इंवले नावा उदेस.

नना दर्मता कानुंतुन पिय्सि नियत्नोना आय्मकि.

बति किरिस्तुनगा बरोसा इर्वडुन हिंदल बगवंतना नदुडे नियत्नोना आतोन.

10 नना किरिसतुन करि कीसि, वोर साता पेजे नेंडुस्ता अद सक्तिते ताकना इंतोन.

अनि वोर बोगे मातङ दुक्सङे आय्वा, वोना मरंतगा गिर ईसा येच्चि, वोन मोडिन आयना इंतोन.

11 बहन तेर बति, किरिसतुन हिंदल मरंतल नेंडना इंवले नावा आसा.

अदेन साटि मोदोल बव्ते नाकुन पाय्दा सीनल मंतङ इन्जेर इत्तोनो, अवेन इंके सुटि कीतोन.

जिन्गनिता आसतुन पूरि किय्ले वित्वल

12 येसु किरिस्तु नाकुन बततुन साटि नेमि कीतोरो, अदेन येत्ले, बेय विच्चेर मंतोन.

बति इंके वेरि, अगा बर्पुर येवोने अनि वोन मोडि अजुन मारियोने.

13 दादलिर-बायिक्निट!

वोन मोडि मारितोन इन्जेर सोन्च कीसेर सेलोन बति, नना उंदि काम कीसेर मंतोन.

बतल इत्तेके, जर्ग्तङ अवेन मरुङ्सेर, मुने पुट्वल इनमुन येतना इन्जेर बेय लह्‍कि वर्सि, विच्चेर मंतोन.

14 येसु किरिसतुन हिंदल, बगवंतल माकुन सिय्वल इनम मंवल स्वर्ग्नेके विच्चेरेन मंदंतोन.

15 अदेन साटि बरोसतगा बडे मासि मंवलिर मरट सम्दिर, इव सम्दोन बारेते येकि आसि मंद्कट.

बति मोका बदे गोस्टितगा परक मत्तेके, बगवंतले मीकुन तात्कर तोहंतोर.

16 तेर बति इंके वेरि, बगवंतल माकुन वेह्‍चि तोह्‍ता तीरे पिसेर मंद्कट.

17 दादलिर-बायिक्निट!

मिरट सम्दिर गिर येकि आसि, नावा नमुना येच्चि ताकट.

दुस्रुर बूर्ते मा दात ताक्सेर मंतेरो, वूरकुन सूड्सि करियट.

18 बारितेके वेलेटिर ममोट किरिस्तुनुर आंदुम इंतेर बति, वूरा ताक्वल सूड्तेके, वोर किरिस्तु मोद्नगा सीता अर्पनतुन बय्मन आतपिनय मंदंता.

वूर बारेते वेले जोकङ मीकुन वेह्‍तोन अनि इंके गिर आड्सेर वेह्‍चेर मंतोन.

19 वूर मेंदोडङ आसने निन्चि मंदंतेर.

^* वूर किय्वलिकुन बारेते लजे मायन बद्लि गर्वते मंदंतेर.

वूर सिरिप दुनियतङ चीजकुन पोरोने तम्वा मन इरंतेर.

वूर आतुर आक्रित नासेडम आंतेर.

20 बति मरट स्वर्ग्ना रोतुर आंदट.

अद स्वर्ग्नले माकुन बचि किय्वल, येसु किरिस्तु पर्बु मल्सि वांतोर इन्जेर सूड्सेर मंतट.

21 सम्दोतुन तंवा अदिकारदुन बूड इरनल सक्ति वोन्गा मंता.

अद सक्तिते वोर मावङ मरन आय्वलिक मेंदोलकुन, बस्केट मरन आयो अद तंवा मय्मा वाले मेंदोडुन मोडि मार्युसंतोर.