मुने ताकना इन्जेर सूचना किय्वल
4
1 ते नावुर लाड्नुर दादलिर-बायिक्निट!
मिरट पर्बुना बरोसतगा गट निलट.
मी पोरो नाकुन बेय जीवा आता.
मी हिंदल नना बेय आनंद येच्चेर मंतोन.
बारितेके मिरटे नावा काया-कस्टम्ना पंडित मोडितुर आंदिट.
2 पर्बुना बरोसते ताक्वडगा दया कीसि, उंदि मन अनि विचार्दे ताकना इन्जेर युवोदिया अनि सुंटुके बायिकुन जुल्मा कीसेर मंतोन.
3 अनि ना बरोबर सेवा किय्वल करल सोप्ता!
निमे इव बायिकुन मदत कीम इन्जेर कोर्सेर मंतोन.
बारितेके इव बायिक, केलेमेंत अनि दुस्रुर बक्तलिर सङा मीरे मासि, चोकोट्ना कबुर पचर किय्वडगा ना बरोबर मेह्नत कीतङ.
बगवंतल वीरङ पोरोलकुन, जीवता ग्रंत्नगा*, लिहि कीतोर.
4 मिरट पर्बुनुर आता काड्कि, बस्केट आनंद्ने मंट.
इहिन आनंद्ने मंदना इन्जेर उंडे गिर वेहंतोन.
5 पर्बु वेय्ने मल्सि वाय्वल मंतोर.
अदेन साटि मीवा सादु-पांदुन सम्दिर करि कीनल पिसट.
6 बततुन बारेतेन आयि रंदि किय्मट बति, हर उंदितुन पिय्सि, बगवंतने दनेवाद वेह्चेर, पार्तनङ अनि विनंतिङ कीम्ट.
7 अस्के बोरे अर्तम किया परुर आतल सांतितुन, बगवंतल मीकुन सींतोर.
अनि मिरट येसु किरिस्तुनगा येकि आततुन हिंदल, अद सांति मीवङ मन-दिलकुन केप्सेर मंदंता.
8 ते दादलिर-बायिक्निट!
बेय चोकोट्नङ अनि मेप तर्वलिकुन बारेते सोन्च कीम्ट.
अद बहन कियना इत्तेके, सत्नङ, मानि कीनल मंवलिक, नियत्नङ, सुदुड वालेक, सोबतङ अनि चोकोट्ना पोरोल तर्वलिक, इव सम्दोन बारेते हेतु कीसेर मंट.
9 अनि मिरट नह्गटल बवेन करितिटो, बवेन वोप्तिटो, बवेन केन्ज्तिटो, नना बतङ किय्वल सूड्तिटो, अव सम्दोन पिय्सि ताकट.
अस्के सांति सिय्वल बगवंतल मीकुन सात मंदंतोर.
वूर सीता अद सम्दोतुन पिय्सि पव्लु दनेवाद वेह्वल
10 दादलिर-बायिक्निट!
वेले रोज्क आता पेजे नाकुन उंडे गिर हेतु इर्सि, मदत कीता काड्कि, पर्बुनगा वेले आनंद येत्तोन.
इद मदतुन बारेते मोदोल गिर सोन्च कीतिट बति मीकुन मोका पुट्मकि.
11 नाकुन बदे उंदि जुरत मंता इन्जेर इहिन वेह्चेर सेलोन.
बारितेके बातल गट्कते गिर, नह्गा मत्ता अदेन पिय्सि, कुसिते मंवल करितोन.
12 नह्गा बतय मनो अस्के बहन पिसनयो, सम्दो मनेके बहन पिसनयो, अनुबव कीसि करि कीतोन.
पेटिमेन तिंवल, करुसासि मंवल, मुक्तरि मंवल, बिकरि आसि मंवल बद गट्कते बहन मंदना इंवलिक सम्दोन नना करितोन.
13 नावा मन-दिलतगा सक्ति सिय्वल किरिसतुन हिंदल, नाकुन बतल बहन जर्ग्तेके गिर मेया परंतोन.
14 तेर बति नना तक्लिब्क्नगा कोंडे मासि मनेके, नाकुन मदत कीतिट.
15 पिलिपितुर्निट!
नना मीकुन चोकोट्ना कबुर वेह्चि, मासिदोनिया येरियतल पेसितोन अस्के, मिरट तपुसि दुस्रो बदे चर्चितुर मदत किय्मकि इन्जेर मीकुन टावा.
16 मीवा मासिदोनिया येरियता तेसलोनिका नगुडगा मनेके गिर, नाकुन मदत किय्ले, मिरट कहि जोकङ चंदा रोह्तिट.
17 मिरट नाकुन मदत कीसेर मंदना इंवल आसते इहिन वड्क्सेर सेलोन.
बति मिरट कीततुन पिय्सि, मीकुन अदिक पंडि पुटना इंवले नावा इचा.
18 मिरट पेर्मते रोह्तङ इनम्क एपपोर्दितु नह्गा तचि सीता काड्कि, नह्गा बततय कमि सेले.
इंके नाकुन सम्दो गिर बर्पुर मंतङ.
बगवंतल तनकुन अर्पना किय्वलिक गमा गमा गाडि सिय्वलिक चीजकुन मोडि, अव इनमकुन, आनंद्ने वोपंतोर.
19 अनि मरट सेवा किय्वल बगवंतनगा माकुन पह्जे मंवडुन तेर बेय अदिक दन-दव्लत मंता.
येसु किरिस्तुना मय्मतल वाय्वलिक बर्पुर आसिर्वादकुन हिंदल, मावङ सम्दो जुरतकुन पूरि कींतोर.
20 ते मा बाबो बगवंतने बस्केट डगुर-पान वायि!
आमेन!
पव्लुना आक्रिता दंडोस
21-22 येसु किरिसतुन हिंदल बगवंतनुर मरि-मियड आय्वल हर वोरोन नावा दंडोस वेहट.
ना बरोबर इगे मंवलिर बक्तलिर मुकेते सीजर महा राजना महलतगा काम किय्वलिर मीकुन दंडोस वेह्चेर मंतेर.
23 मा येसु किरिस्तु पर्बुना पेर्मता-दया मीवङ आत्मन सात मनि!
दंडोस!