किरिस्तुनगा पूना जिन्गनि
2
1 इदेन मुने मिरट कसुक्नगा अनि पाप्नगा कोंडे मासि, बाव-बक्तितगा सातपिनय मत्तिट.
अस्के बगवंतल सिय्वल करल जिन्गनि मीकुन पुट्लेके मत्ता.
2 मोदोल मिरट दुनियतुर ताक्ता तीर ताक्तिट अनि बूत्क्नोर अदिकारि* वेह्ता तीर पिसेर मत्तिट.
वेर अदिकारि बगवंतन उल्टा पिस्वलिर रोपो मन्जि, ताकुसेर मंतोर.
3 मरट गिर करेबलिक आसन पिय्सि, माय्नना सादरन गुंतल पुट्वलिक आसन पिय्सि, मावङ सोन्च-विचरकुन पिय्सि, वूर मोडि पिसेर मत्तट.
अहन मा पोरो गिर बगवंतल तंवा सोङ तोहनल पिस्तट.
4 बति बगवंतल, माकुन वेले पेर्मा कीता काड्कि, वोन मा पोरो बेय किवुल लाग्ता.
5 ते मरट पाप्क्ने बाव-बक्तितगा सातपिनय मनेके गिर, बगवंतल माकुन किरिसतुन सङा नेंडुस्तोर.
इद बचे माय्वल काम सिरिप वोना पेर्मता-दयतेन आया पर्ता.
6 अचोरे आय्वा, येसु किरिस्तुनगा मरट येकि आसि मत्ता काड्कि, वोन बरोबर स्वर्ग्नगा राज ताकुस्ले, बगवंतल माकुन किरिसतुन सङा नेंडुस्तोर.
7 बारितेके, येसु किरिसतुन हिंदल तंवा लेका किया परुर अचोर पेर्मता-दयतुन अनि चोकोट-पांदुन वाय्वलिक पिडिनगा मा पोरो तोहना इन्जेरेन बगवंतल अहन कीतोर.
8 मिरट बरोसतुन हिंदल पेर्मता-दयतेन बचे मातिट.
इद मीवा केय्दे जर्ग्मकि, बति बगवंतना वरम्नेन जर्ग्ता.
9 काम किय्वडुन हिंदल, अद बचे माय्वल काम जर्ग्वा काड्कि, बोरे पोक्डा कीसेर वेह्ले मोका सेले.
10 बारितेके, बगवंतले माकुन गडि कीतोर आंदुर.
मरट येसु किरिसतुन हिंदल चोकोट्नङ काम्क कियन साटि गडि कीतोर.
अव बव काम्क इंवल मुनेने नेमि कीतोर.
मरट किरिस्तुनगा येकि आसि मंतट
11 दादलिर-बायिक्निट!
बगवंतल मीकुन बचि कियन मुने, मिरट यूदुल्क आयुर वूर आसि बहन मंदिटो, अदेन मरुङ्मट.
अस्के तोल कत्रि कियुस्तुर मीकुन चुडुर-पांदे सूड्सेर, “तोल कत्रि कियुस्मकि वूर” इन्जेर केय्ंदिर.
अद कार्या सिरिप मेंदोडगा केय्दे कियुसींदिर बति, आत्मते जर्ग्ता कार्या आयो.
12 अद गट्कते मिरट किरिसतुन करि किय्वा काड्कि, बगवंतनल लङ मन्जि पिस्तिट.
बगवंतल नेमि कीतुर वूर इज्रयेल लोकुरा लेकतगा मिरट वाय्मकि.
बगवंतल वूरकुन सीता नियम्नगा मंवलिक बवे वाग्दन्क्नगा ईसदार्क आय्वक मिरट मत्तिट.
बहन इत्तेके, बचे मांतट इंवल आसा सेल्वक्ने, इद दुनियतगा बगवंतन करि किय्मकि वूर मोडि मिरट पिस्तिट.
13 बति मोदोल बगवंतनल लङ मंवलिर मिरट, यूदुल्क आय्वलिर मा मोडि, इंके येसु किरिस्तुनगा येकि आततुन हिंदल अनि वोर सीता अर्पनता नेतुडुन हिंदल, बगवंतन करुम आतिट.
14-15 बारितेके, सिरिप किरिस्तुये यूदुल्क आय्वलिर माकुन अनि यूदुल्क आय्विट वूर मीकुन बगवंतन सङा मीरि कीसि, सांति सिय्वल आंदुर.
वोर तंवा मेंदोडा अर्पना किय्वडुन हिंदल, मा नड्डुम मंवल पगा इंवल गोडतुन उल्टि कीतोर.
बहन कीतोर इत्तेके, यूदुल्क्ना दर्मता कानुंतगा मंवलिक आगेन तंवा अर्पनतुन हिंदल अगट्के आपुस्तोर.
अदेन साटिने, ममोट अनि मिरट सांतितगा येकि आया पर्तट.
वोन हिंदल, मरट सम्दिर उंदि पूना वर्गतुर आयना इन्जेरेन किरिस्तु अहन कीतोर.
16 इद तीर्दे, किरिस्तु तंवा परन मोद्नगा सिय्वडुन हिंदल, मा नड्डुम मंवल पगतुन तेंड्सि वाड्तोर अनि रंड वर्गनुर आय्वलिर माकुन उंदि मेंदोडुन मोडि येकि कीसि, बगवंतन सङा मीरि कीतोर.
17 किरिस्तु इद दुनियतगा वासि, बगवंतनल लङ मंवलिर मीकुन अनि करुम मंवलिर माकुन सांतिता चोकोट्ना कबुर वेह्तोर.
18 वोन हिंदले, रंड वर्गनुर आय्वलिर मरट उंदिय आत्मतुन हिंदल, बाबो बगवंतना चर्नते सोंले, मोका पुड्ता.
19 अदेन साटि, मिरट उंडे गिर दुस्रोक जातिनुर अनि मुसपरिर आय्विट.
बति येसुनगा बरोसा इर्वल पर्जता गुरुप्नगा उंदि आसि, बगवंतना रोतुर आतिट.
20 उंदि रोतुन मोडि मिरट बुनदित पोरो निव्डे मातिट.
अद बुनदि किरिस्तुनुर अपोस्तुल्क अनि पर्वक्तलिर वेह्ता बोदय आंद.
इद बुनदित आदर आय्वल मूलता मुके बंडा येसु किरिस्तु आंदुर.
21 वोर किरिसतुन हिंदल, दोह्वल हर उंदि बागम कटुसि, पर्बुना पवित्रा मंदिर बेय चोकोट निव्डे मासेर मंता.
22 वोन्गा मिरट गिर आत्मतुन हिंदल येकि आसि, बगवंतल मनल अद मंदिरतुन मोडि निव्डे मासेर मंतिट.