बगवंतना मक्डिते मंवल पिलन उजगिरि अर्वल
3
1 मिरट यूदुल्क्ना जातितुर आय्वेके गिर मीकुन येसु किरिस्तुना चोकोट्ना कबुर वेह्ता काड्कि, नना जेल्दगा अर्सि मंतोन.
2 तंवा पेर्मता-दयतुन बारेते मिरट केन्जना इन्जेर, बगवंतले नाकुन नेमि कीतोर इंवल तप्वक केन्ज्तिट.
3 बगवंतना इद पिलन मोदोल मक्डिते मत्ता.
बति इंके तान बारेते नाकुन उजगिरि अरुस्तोर.
इदेन बारेते, इद चिटितगा+ मोदोल मीकुन इचुसि लिहि कीतोन.
4 इदेन मिरट दिहंते वाचि कीतेके, किरिसतुन हिंदल, नाकुन अर्तम आता अद पिलंता गियंतुन सम्जे मांतिट.
5 इद पिलंता गियंतुन बगवंतल तोत्तुरकुन उजगिरि अरुस्मकि.
बति पवित्रा आत्मतुन हिंदल, इंके तना नेमि कीतुर अपोस्तुल्कुन अनि पर्वक्तलिर्कुन उजगिरि अरुस्तोर.
6 अद पिलंतगा मंवल मक्डिता गोस्टि बतल इत्तेके: यूदुल्क आयुर वूर अनि यूदुल्क चोकोट्ना कबुडगा बरोसा इर्वडुन हिंदल, येसु किरिस्तुनगा ईसदार्क आंतेर.
वीर उंदि मेंदोडङ बागलकुन मोडि मंतेर.
अनि वीर बगवंतना वाग्दंतगा ईसा गिर येतंतेर.
7 इद चोकोट्ना कबुडुन साटिने नना सेव्कना आतोन.
इहिन आय्वल बगवंतना पेर्मता-दयतुन हिंदल अनि वोना सक्तितुन हिंदले, अद आसिर्वाद नाकुन पोकोट पुड्ता.
8 बगवंतल नेमि कीतुर सम्दिर्गटल नना वेले कमि-पान वालेना आंदुन.
तेर बति, बगवंतल नाकुन इद वरम सीतोर: किरिस्तुनगा मंवल वेहा वायो अचोर चोकोट्ना आसिर्वादुन बारेते, यूदुल्क आयुर वूरकुन वेह्ले, नाकुन मोका सीतोर.
9 इदे आय्वा, सम्दोतुन गडि किय्वल बगवंतल तोले निर्नय कीता मक्डिते मंवल, तंवा पिलंतुन बहन पूरि कीतोर इंवडुन बारेते, हर वोरोन पोडि कीसि वेह्लेने, नाकुन नेमि कीतोर.
10 इंके चर्चितुर बक्तलिर हिंदल, हाबडगा पोरो मंवलिक कडकुन दिसोङ अव सक्तिन अनि अदिकारिरकुन तंवा गियंतुन वेले तीर्क्ने तोह्लेने, बगवंतल इहिन जर्गुस्तोर.
11 इहिन येसु किरिस्तु पर्बुन हिंदल बर्पुर कियना इन्जेर बगवंतल मोदोडले अद पिलंतुन निर्नय कीसि मत्तोर.
12 किरिस्तुनगा येकि आता काड्कि, वोन्गा इर्ता बरोसतुन हिंदल गटि-दीर्यते बगवंतना चर्नते वेरिवक निला परंतट.
13 अदेन साटि, नना मी लासि बोगे माय्वलिक दुक्सन सूड्सि, पेजे वाय्वक मंट इन्जेर कोर्सेर मंतोन.
इव नावङ दुक्सङ मीकुन डगुर-पान तरंतङ.
बाव-बक्तितगा बडे माय्ले, पव्लु पार्तना किय्वल
14-15 इद कारंतुन हिंदले* मा बाबो बगवंतन मुने मुर-टोङ्रङ कोट्सेर मंतोन.
वोन हिंदले स्वर्ग्नगा अनि दर्तुरित पोरो मंवल हर कुटुंबतुन पोरोल वाता.
16 बगवंतल तंवा पवित्रा आत्मतुन हिंदल, मीवङ मन-दिलकुन तंवा मय्मता सक्तिते गटि-दीर्या सियना इन्जेर पार्तना कीसेर मंतोन.
17 अस्के मीवा बरोसतुन पिय्सि, किरिस्तु मीवङ दिल्क्नगा मंदंतोर.
इदेन हिंदल, बहंते सीर्क मरतुन ताकद सींतङो, अह्ने मिरट बगवंतना पेर्मा इंवल बुनदित पोरो गट निला परंतिट.
18-19 बगवंतल नेमि कीतुर बरोबर मिरट किरिस्तुना पेर्मा बचोर बेडुंदि, लाम, कोल अनि डङल मंता इंवल अर्तम कियना अनि गियंतुन तेर अदिक वाले, अद पर्बुना पेर्मतुन मिरट करि कियना इन्जेर, पार्तना कीसेर मंतोन.
अनि अहन पेर्मा कीसेर बगवंतना गुन मी रोपो बर्पुर निंदना इन्जेर गिर पार्तना कीसेर मंतोन.