एपेसि 4

उंदि मेंदोडा रूप्ने येकि आसि मंवल

1 मीकुन बगवंतल तंवा पर्जा इन्जेर केय्तोर.

ते वोना पर्जत मोडि बरोबर पिसना इन्जेर पर्बुन साटि जेल्दगा अर्सि मंवना कोर्सेर मंतोन.

2 बस्केन गर्वते मन्मट.

सादु-पांदे पिसेर, वोर्चि ताकट.

पेर्मते वोरोनङ तपकुन वोरोर मापि कीम्ट.

3 बगवंतना आत्मा मीकुन येकि कीता.

ते सांतिते अद येकितुन काबाड्ले, काड्जिते बस्केट कोसिद कीम्ट.

4 मरट सम्दिर गिर येसु किरिस्तुनगा बरोसा इर्वडुन हिंदल उंदि मेंदोडुन मोडि मंतट.

अनि मावङ दिल्क्नगा उंदिय पवित्रा आत्मा मंता.

वोर बगवंतल माकुन उंदिय आसतगा ईसा येत्ले केय्तोर.

5 किरिस्तुनुर बक्तलिर आय्वलिर मा सम्दिरकुन वोरोरे पर्बु मंतोर.

मरट उंदितगने बरोसा कींतट अनि पर्बुना पोरोडे उंदिय बाप्तिस्मा येत्तट.

6 सम्दिरोर बाबो आय्वल बगवंतल वोरोरे आंदुर.

सम्दिरोर माल्कल आय्वल वोरे हर वोरोनगा रोपो मन्जेर, वोना पिलन पूरि कीसेर मंतोर.

7 किरिस्तुना इचतुन पिय्सि, तंवा पिलन पूरि किय्ले, मह्‍गटल हर वोरोन बगवंतल दुस्रोक दुस्रोक वरम्क सीतोर.

8 अदेन साटिने, किरिसतुन बारेते दर्मा-ग्रंत्नगा,

“वोर पोरो ताच्चि सोनेके,

कोंडे मासि मंवलिरकुन तंवा सङा वोतोर.

अनि तंवुर लोकुरकुन वरम्क सीतोर”⁺

इन्जेर लिहि कीसि मंता.

9 वोर पोरो ताच्चि सोत्तोर इत्तेके, मोदोल वोर दर्तुरितङ बूड्नङ बागल्क्नगा^* रेय्तोर इत्तपे कि?

10 अनि बोर्ते बूड रेय्तोरो वोरे सम्दो आगसकुन तेर बेय पोरो सोत्तोर.

इदेन हिंदल पूरो दुनियतुन तंवा अदिकार्दे इरंतोर.

11 वोर वरम्क सिय्वल किरिस्तु कहितुरकुन तंवुर अपोस्तुल्क इन्जेर, कहितुरकुन पर्वक्तलिर इन्जेर, कहितुरकुन चोकोट्ना कबुर पचर किय्वलिर इन्जेर, कहितुरकुन चर्चितुरकुन ताकुस्वलिर इन्जेर अनि उंडे कहितुरकुन बोदा वेह्‍वलिर इन्जेर नेमि कीतोर.

12 वूरा जिमा बतल इत्तेके, बगवंतना सेवतुन साटि लोकुरकुन तयर कियना अनि किरिस्तुना मेंदोल आय्वल चर्चिनुर बाव-बक्तितगा बर्पुर बडे मानल कियना.

13 अस्के मरट बरोसते बगवंतनोर मरिन बारेता गियंतगा उंदि आनल अनि किरिस्तुनगा मंवलिक गुन्क मा रोपो गिर बर्पुर तयर आनल, बाव-बक्तितगा बडे मांतट.

14 अदेन हिंदल, लबड अनि कपट्नङ बोदनगा कोंडे माय्वक मंदंतट.

इव बोदने मावा बरोसा हेल्वन मोडि वडिदे हिके-हके हाले माय्वक मंदंता.

इहिन मरट उंडे गिर मुने पसि-बाललिर दात मंवट.

15 इदे आय्वा, मरट पेर्मते सतेम वेह्‍चेर, सम्दो गोस्टिनगा बडे मासेर, मेंदोडुन तला आय्वल किरिस्तुना गुन-गान मा रोपो अबा लागर.

16 बहंते सीरङ-दोरङ मेंदोडङ बागलकुन मीरि कीसि इरंतङो, अह्‍ने किरिस्तुना मेंदोल आसि मंवलिर सम्दिरकुन वोरे मीरि कीसि इरंतोर.

बस्केते मेंदोडा हर उंदि बागम तंवा काम तना बरोबर कींतयो, अस्के अद मेंदोल बरोबर बेर्संता.

अदे तीर्दे चर्चितुर वोरोन वोरोर पेर्मा किय्वल अनि बोना वोर काम किय्वडुन हिंदल वूर बगवंतनगा बरोबर बेर्संतेर.

वेड्चितुर मरि-मियडुन मोडि पिसट

17-18 अदेन साटि पर्बु सीता सत्ना अदिकार्दे मीकुन वेह्‍वल बतल इत्तेके, मिरट इङेडल बगवंतनङ आगेन उल्टा ताक्वलिर दुस्रोक जातिनुर मोडि पिस्मट.

वूरङ दिल्क बगवंतन बारेते अर्तम किय्वा काड्कि, वूरा सोन्च-विचर बततुने कामि सियो.

वूर बगवंतन बारेते पटि किय्वक्ने तम्वङ दिलकुन मूजोर्क कीता काड्कि, बगवंतल सिय्वल पूना जिन्गनितगा वूरकुन ईसा सेले.

19 बारितेके वूरकुन लजा इंवल असले सेले.

अदेन साटि वूर सम्दो तीर्क्नङ बे-सुदुड काम्क अनि सुक-बोग्नङ कसुक कीसेरेन पिसंतेर.

20 बति मिरट किरिसतुन बारेते करिनेके, ईतङ करब काम्क किय्वा इन्जेर करितिट.

21 करलेन मिरट येसुनुर बक्तलिर आता काड्कि, वोन बारेते केन्ज्तिट अनि वोन्गा मंवल सतेमुन मत्ता तीर करितिट.

22 अव बव इत्तेके, मीवा पडना जिन्गनितङ गुन्क सुटि कीम्ट.

बारितेके, अव मीकुन मेंदोडङ आसनगा कोंडि कीसि, करब कीतङ.

23 अदेन बद्लि, मीवा मंदङ सोन्च-विचरकुन मार्युस्ले, बगवंतना आत्मतुन मोका सीम्ट.

24 अनि बगवंतना गुन-गांतुन पिय्सि, मीवा जिन्गनि पूना तरिकते पिस्वल सुरु कीम्ट.

अस्के मिरट बगवंतना नदुडे सुदुड अनि नियत्नुर आंतिट.

25 ते मरट सम्दिर उंदि मेंदोडङ बागल्क आता काड्कि, वोरोन वोरोर लबड वेह्‍वा बति, सिरिप सतेमे वेहना.

26 मोका मीकुन सोङ वातेके, अद सोङ मीकुन पाप्नेके ऊम्वक्ने सूडट.

अनि पोड्द सोंदन मुनेने, मीवा सोङ आरना.

27 अस्केन मी सङा पाप कियुस्ले, सय्तंदुन मोका पुट्वक मंदंता.

28 मोदोल कले काम किय्वलिर इङेडल अदेन सुटि कियना.

वूर कुद काया-कस्टम कीसि, चोकोट्ना तरिकते कमय कियना.

अस्के वूर गरिब लोकुरकुन मदत किया परंतेर.

29 मीवा तोड्दल करब्नङ गोस्टिङ वाया सिय्मट.

बति केन्ज्वलिर बक्तितगा बडे मानल अनि वूरकुन पाय्दा पुटनल, वूरङ जुरतकुन पिय्सि, चोकोट्नङ गोस्टिङे वड्कट.

30 पाप्कनल बर्पुर सुटे माय्वल दिवोस वेरि, वीर नावुर आंदिर इन्जेर बगवंतल मी पोरो तंवा मोर वाड्तोर.

अदेन साटि, वोना पवित्रा आत्मतुन दुक्सा लागा सिय्मट.

31 मिह्‍गा मंवलिक पगा, सोङ, सिर्डियल गुन, जग्डङ किय्वल, राङि सिय्वल अनि ईतङ सम्दो करब गुनकुन सुटि कीम्ट.

इव गुन्क बवे गिर मी रोपो मंवा.

32 उंडे वोरोना दुक्सतुन गिर तंवय इन्जेर सम्जे मासि, दयते पिसट.

बगवंतल किरिसतुन हिंदल, मीकुन मापि कीतपे, मिरट गिर वोरोन वोरोर मापि कीसेर मंट.