बगवंतना संतान आय्वलिर मिरट वोन मोडिन ताकट
5
1 इद सम्दोता बाव बतल इत्तेके, मिरट बगवंतनुर लाड्नुर मरि-मियड आंदिट.
अदेन साटि वोन मोडिन ताक्ले कोसिद कीम्ट.
2 बहन इत्तेके, किरिस्तु माकुन लाड कीसि, मा साटि बगवंतन गमा गमा गाडि सिय्वल दूपुन मोडि, बलिदान आसि तंवा तना अर्पना आतोर.
वोन मोडि मिरट गिर वोरोन सङा वोरोर पेर्मते ताकट.
3 अचोरे बति, पीर किय्वडुन बारेतेन आयि, बे-सुदुड कामकुन बारेतेन आयि, बद सूडा नाके पह्जे इंवडुन बारेतेन आयि, मीकुन बोरे बोटा सूट्वक्ने मंट.
बारितेके, बगवंतनुर बक्तलिर्गा ईतङ असले मंवा.
4 अचोरे आय्वा, चेच्रलिक गोस्टिङ, आगम-लबड गोस्टिङ अनि करब किय्वलिक डवरिङ असले वड्क्वा.
इवेन बद्लि, हर गट्का बगवंतन दनेवाद वेह्चेर मिरट मंदना.
5 पीर किय्वले आयि, सेलेके बे-सुदुड वालेय आयि, सेलेके बद सूडा नाके पह्जे इंवल आयि (वेर मूर्तिना पूजा किय्वलिरा लेकतगा वांतोर), ईतुर बूरे गिर आयि, किरिस्तुना अनि बगवंतना राज्नगा करलेन ईसदार्क आया परुर इंवल मीकुन टावा.
6 ईतङ करब काम्क कीतेके गिर बतय आयो इंवलिर, तम्वङ आगम गोस्टिने, मीकुन पसि किय्वक्ने दिहंते मंट.
बारितेके, तना वेह्ता तीर ताकुर वूरकुन बगवंतल सिक्सा कींतोर.
7 अदेन साटि, आतुरङ करब काम्क्नगा मीरे माय्मट.
8 बारितेके, मिरट गिर मोदोल करब काम्क इंवल सिकटितगा पिस्तिट.
बति इंके पर्बुनगा येकि आततुन हिंदल चोकोट्नङ काम्क इंवल वेड्चितगा मंतिट.
ते अद वेड्चितुर मरि-मियड मोडि पिसट.
9-10 अहन पिस्किट्ते पर्बुन बव आनंद सींतङ इंवलिकुन करि कीसि, ताकंतिट.
अनि अद वेड्चिता पंडि* मी सङा चोकोट्नङ, नियत्नङ अनि बरोबर काम्क कियुसंता.
11 बतय पाय्दा सियोङ अव सिकटितङ काम्क्नगा मीरे माय्मट.
बति अव किय्वलिक नुक्संतुन बारेते, उजगिरि वेह्चि तोहट.
12 वूर आतुर किय्वलिक मक्डितङ कामकुन बारेते, वड्क्ले गिर मरट लजे मांतट.
13 बति बस्केते मीवङ चोकोट्नङ कामकुन करेबलिर सूडंतेरो, अस्के वूर करेबलिरङ काम्क सम्दो तात्कर दिसंतङ.
अहन दिस्ततुन हिंदल तम्वङ करब काम्क सुटि कीसि, वूर गिर मी मोडि वेड्चितुर आंतेर.
14 अदेन साटिने लोकुर,
“ये, सिकटितगा नरुम्वल जोप्लिया!
सातुर्गटल तेदा!
नी पोरो किरिस्तु तंवा वेड्चि पारुसंतोर”
इन्जेर सास्तुर वेहंतेर.
पवित्रा आत्मा सिय्वल सक्तिते पिसट
15-16 इव दिवोस्क वेले करेबलिक आता काड्कि, पिसलिर मोडि आयो बति, वेले बुदि-गियन वालिर मोडि उय्सर्ते पिसट.
चोकोट्ना काम किय्ले, मीकुन पुट्वल हर मोकतुन वाप्रि कीम्ट.
17 पिसलिर मोडि ताक्मट!
बति पर्बुना इचा बतल इंवल करि कीसि, बुदि-गियन वालिर आसि, ताकट.
18 अनि कल उन्जि निसते मन्मट.
अद निसा करेबलिक काम्क किय्ले, मीकुन ऊमंता.
इदेन बद्लि, मीवङ दिल्क्नगा बगवंतना आत्मा वेह्ता तीर इहिन ताकट:
19 बगवंतना वचंतङ कीर्तन्क, बगवंतन डगुर-पान सिय्वलिक बजन्क, बगवंतना आत्मा मीवा दिलतगा सिय्वलिक बाव-बक्तितङ पाटङ वार्सेर, वोरोन वोरोर मुने सोंले हक्लि कीसेर, मीवङ बर्पुर दिल्क्ने पर्बुन पार्तना-विंति कीम्ट.
20 मावोर येसु किरिस्तु पर्बुना पोरोडे सम्दोतुन पिय्सि, बाबो बगवंतन बस्केट दनेवाद वेह्चेर मंट.
21 किरिस्तुनगा मीकुन मंवल बाव-बक्तिता वेरेतुन पिय्सि, वोरोनल उंडे वोरोर चुडुर-पान कीसि ताक्ले, पेजे वाय्मट.
बगवंतना आत्मा वेह्ता तीर आड-माड्सो पेर्मते ताक्वल
22 ये, मर्मिङ आतङ बायिक्निट!
पर्बु वेह्ता तीर ताक्तपे, मी माड्सुर गिर वेह्ता तीर ताकट.
23 बारितेके, किरिस्तु बहंते चर्चितुर आय्वलिर मा पोरो अदिकारियो, अह्ने माड्सो गिर तंवा बाय्कोन पोरो अदिकारि आंदुर.
वोर किरिस्तुये तंवा मेंदोल आय्वल चर्चितुरकुन बचि किय्वल आंदुर.
24 ते चर्चितुर आय्वलिर मरट सम्दिर बहंते किरिस्तु वेह्तप ताकंतटो, अह्ने वेय्लो गिर सम्दो गोस्टिनगा तंवोर माड्सो वेह्तप ताकना.
25 ये, मर्मिङ आतुर दादलिर्निट!
किरिस्तु बहंते तंवा चर्चितुरकुन बेय लाड कीसि, तंवा जीवा सीतोरो, अह्ने मीवङ वेय्लोकुन मिरट वेले पेर्मते सूडट.
26 इद तीर्दे, किरिस्तु तंवा चर्चितुरकुन बगवंतना वचन इंवल येते चक नोर्सि, पवित्रा अनि सुदुड कींतोर.
27 अहन कीसि, कसुडा डाग सेल्वक्ने, पाप्ना मड्ता सेल्वक्ने, उंडे दुस्रो बदे गिर तप सेल्वक्ने, मय्मा, पवित्रा अनि बे-कसुर वाले नोव्रिन मोडि तंवा चर्नते चर्चितुरकुन निपुसंतोर.
28-30 बोरे तंवा मेंदोडुन बिकट्ने सूडोर.
बति हर वोरोर तंवा मेंदोडुन चोकोटे सूड्सेर काबाडंतोर.
अह्ने किरिस्तु गिर, तंवा मेंदोल आय्वल चर्चितुरकुन पेर्मते चोकोट सूडंतोर.
बारितेके, मरट वोना मेंदोडङ बागल्क आंदट.
ते दादलिर्निट!
मीवङ मेंदोलकुन बहंते चोकोट सूडंतिटो, अहन मीवङ वेय्लोकुन गिर पेर्मते सूडना.
तंवा वेय्लोन पेर्मते सूड्वल, तंवा तना पेर्मा किय्वल आंतोर.
31 दर्मा-ग्रंत्नगा, “अदेन साटि मायनल तंवुर अवल-बाबोनल वेगोरा आसि, तंवा बाय्कोन सङा जोड आसि, पिसंतोर.
वूर इविर उंदि मेंदोल आसि, मंदंतेर”+ इन्जेर लिहि कीसि मंता.
32 इदेनगा बेय डगुर मर्मा मंता.
अद बतल इत्तेके, किरिस्तु अनि चर्चितुर उंदिय मेंदोल आसि मंतेर इन्जेर वेह्चेर मंतोन.
33 तेर बति, मिह्गटल हर वोरोर तंवा दात तंवा वेय्लोन पेर्मते सूडना.
अनि वेय्लो तंवोर माड्सोन मानि कियना.