मरि-मियड अनि अवल-बाबो
6
1-3 दर्मा-ग्रंत्नगा, “मी अवल-बाबोन मानि कीम्ट.
अस्के मीकुन चोकोट जर्ग्सि, दर्तुरित पोरो मीवा आनंद अदिक आंता अनि मीवा पिस्वल कालम बडे मांता”+ इन्जेर लिहि कीसि मंता.
वाग्दंतुन सङा बगवंतल सीता मोदोडा आगे इद आंद.
ते मरि-मियड्निट!
मिरट पर्बुनुर आकिट्ते मी अवल-बाबो वेह्ता तीर ताकट.
इहिन ताक्वल बरोबर आंद.
4 ये, अवल-बाबुर्निट!
मी मरि-मियडुन किचा किचा लागनल किय्मट.
इदेन बद्लि, पर्बुन बारेतङ बोदने अनि सूचनने सुद्रि कीसेर, पोसि कियना.
दासिर अनि माल्कलिर
5 ये, दासि-पांदे मंवलिर दादलिर-बायिक्निट!
किरिस्तुना वेरेते मिरट ताक्तपे, दुनियतगा मंवलिर मीवुर माल्कलिर वेह्तप गिर ताकट.
कपट सेले अद दिल्ते अनि बर्पुर मांदे, वूरा सेवा चोकोट कीम्ट.
6 मी माल्कलिर मीकुन मेचना इन्जेर वूर सूड्नेकेन आय्वा, हर गट्का वूर वेह्ता तीर मिरट कियना.
मिरट किरिस्तुना सेवा किय्वलिर आता काड्कि, बगवंतना इचा तीर बर्पुर दिल्ते काम कीसेर मंदना.
7 आनंद्ने अनि बर्पुर दिल्दे वूरा सेवा कियना.
माय्नलिर साटि कीसेर मंतोम इंवक्ने, पर्बुने सेवा कीसेर मंतोम इंदना.
8 बारितेके, चोकोट सेवा किय्वल हर वोरोर दासिन, सेलेके दासि आयोर वोन पर्बुनगटल पंडि पुटंता इंवल मीकुन टावा.
9 ये, माल्कलिर्निट!
मीवुर दासिर आय्वलिर वेय्लो-माय्नलिर सङा चोकोट-पांदे मंदना.
वूरकुन वेरुस्मट.
मीकुन अनि वूरकुन माल्कल आय्वल पर्बु स्वर्ग्नगा मंतोर.
वोर बोने बेद-बाव्ते सूडोर इंवल मीकुन टावा.
बगवंतल सिय्वलिक आय्तर्क
10 नावुर दादलिर-बायिक्निट!
आक्रित मीकुन वेह्वल बतल इत्तेके, पर्बुनगा मिरट येकि आता काड्कि, वोना सर्वा सक्तितुन हिंदल, गट आम्ट.
11-13 बारितेके, मरट सादरन माय्नलिर सङा लडेय कीसेर सेल्वट.
बति करब्ने निन्चि मंवल सिकटिता दुनियत पोरो राज ताकुस्वलिक बूत्क अनि अवेनुर अदिकारिर सङा अनि हाबडगा मंवलिक कडकुन दिसोङ अव सक्तिन सङा, मरट लडेय कीसेर मंतट.
अदेन साटि, मावा माकुन काबाड्ले, बगवंतल सिय्वलिक सम्दो आय्तर्क वाप्रि कीकट.
अहन वाप्रि किय्वडुन हिंदल, बस्केते अद करेबल दिवोस वांतयो, अस्के सय्तंदङ करब्नङ पिलनकुन मिरट रोकि किया परंतिट.
अनि अद लडेय मार्ता पेजे, मिरट उंडे गिर गट निल्सिन मंदा परंतिट.
14 बहंते सिपायि लडेय किय्ले सोनेके, सम्दो तयरि कींतोरो, अह्ने मिरट सतेम इंवल पटि नडितुन दोह्चि, नियत इंवल कवच* केर्सि दर्यम्ने निलट.
15 अनि मीवङ कालकुन चोकोट्ना कबुडल वाय्वल सांति इंवलिक चेपुलकुन केर्सि तयर मंट.
16 इवेन बरोबर बरोसा इंवल डालदुन बस्केट उंदि केय्दे पियना.
अस्के ताने वोर करेबल पाय्वलिक तड्मितङ सम्दो बान कोलन पिहा परंतिट.
17 अनि बचे माय्वल इंवल कचिता टोपि तलदगा केर्सि, बगवंतना वचन इंवल आत्मता तल्वरतुन उंडे उंदि केय्दे पियट.
18 अदे आय्वा, पवित्रा आत्मा वेह्ता तीर हर गट्का पार्तनङ अनि विनंतिङ किय्वल मरुङ्मट.
इद तीर्दे, दिहंते मन्जेर बगवंतनुर सम्दिर बक्तलिर साटि पार्तनङ कीसेर मंट.
19-20 इंके जेल्दगा मंवल नना, बगवंतना कबुर वेह्वल कब्रियना आंदुन.
ते नना चोकोट्ना कबुडा मर्मतुन पोडि कीसि दर्यम्ने वेह्ले, ना साटि गिर पार्तना कीम्ट.
अस्के बगवंतल तंवा वचन तीर ना हिंदल वड्कंतोर.
आक्रिता दंडोस
21-22 मा दात पर्बुनगा बरोसा किय्वल लाड्नोर तुकिकु दादल, ना बरोबर पर्बुना सेवा नमकम्ने कीसेर मंतोर.
इगे नना बहन मंतोन अनि बतल कींतोन इंवल कबुर मीकुन वेहंतोर.
वेर इगे मंवलिर मा सम्दिरा गोस्टि मीकुन वेह्चि, मीवङ दिलकुन गटि-दीर्या सीनुर इन्जेर वेन मिह्गा रोह्तोन.