एपेसि
एपेसितुरकुन लिहि कीता चिटि
दंडोस्क
1
1 बगवंतना इचा तीर येसु किरिस्तुनोर अपोस्तुल आय्वल पव्लुना, एपेस्नगा मंवलिर* येसु किरिस्तुनगा बरोसा इर्सि ताक्वलिरकुन, दंडोस दोसि, इद चिटि लिहि कीसेर मंतोन.
2 मा बाबो बगवंतल अनि मा येसु किरिस्तु पर्बु मीकुन पेर्मता-दया अनि सांति सियिर!
किरिसतुन हिंदल पुट्वलिक आसिर्वाद्क
3 मा येसु किरिस्तु पर्बुन बाबो आय्वल बगवंतन डगुर-पान वायि!
किरिस्तुनगा मरट येकि आय्वडुन हिंदल, बगवंतल मावा बाव-बक्तितुन साटि स्वर्ग्नगा मंवलिक सम्दो आसिर्वाद्क सीतोर.
4 बहन इत्तेके, किरिसतुन हिंदल तंवा नदुडे मरट पवित्रा अनि बे-कसुर वालिर आयना इन्जेर, कलि गडि किय्वक मुनेने, माकुन बगवंतल नेमि कीतोर.
5 इहिन बगवंतल लाड कीता काड्कि, येसु किरिसतुन हिंदल माकुन तंवा मरि-मियड इन्जेर केय्ले, तोलेने निर्नय कीतोर.
इद निर्नय बगवंतना इचतुन पिय्सि जर्ग्सि, वोन आनंद सीता.
6 तंवोर लाड्नोर मरि किरिस्तु कीततुन हिंदल, तंवा मय्मता पुकोट्ना पेर्मता-दयतुन, बगवंतल माकुन सीतोर.
अदेन साटि, मरट वोर बगवंतन डगुर-पान सीकट.
7-9 बारितेके, लेका किया पर्वट आतल पेर्मता-दया मा पोरो बगवंतल तोह्तोर.
अनि किरिस्तु सीता नेतुडा अर्पनतुन हिंदल, मावङ पापकुन मापि कीसि, अवेनल सुटि कियुस्तोर.
इदेना अर्तम मावङ पाप्क मापि आतङ.
वोना लेका किया पर्वट अद बुदि-गियन अनि तेलिवितुन पिय्सि, किरिस्तु कीततुन हिंदल मक्डिते मंवल तंवा पिलंतुन मा साटि बह्रि अरुस्तोर.
10 अद पिलन बद इत्तेके, बर्पुर वकत निंद्नेके, दर्तुरित पोरो मंवलिक अनि स्वर्ग्नगा मंवलिक सम्दो गिर किरिस्तुना अदिकारदुन बूड येकि आसि मंदना.
इहिन मंदना इन्जेर, तंवा चोकोट्ना इचतुन पिय्सिने बगवंतल निर्नय कीतोर.
11 बगवंतल सम्दो गिर तंवा इचतुन पिय्सि अनि तना निर्नय कीतपिनय जर्गुसंतोर.
इद कलितुन गडि कियन मुने तना निर्नय कीता तीर, पिलंतुन पिय्सि मरट किरिस्तुनगा येकि आसि, तंवुर पर्जा आय्ले, माकुन नेमि कीतोर.
12 किरिस्तु बचि कींतोर इन्जेर आसा कीतुर्गटल ममोट मोदोडुर आंदुम.
मा हिंदल वोन डगुर-पान अनि मान पुटना इंवले वोना इचा.
13 मिरट गिर सते वचंतुन केन्चि इत्तेके, बचे माय्वल चोकोट्ना कबुडुन केन्चि, किरिस्तुनुर लोकुर आयन साटि बरोसा इर्तिट.
अस्के मी पोरो बगवंतल वाग्दन सीता अद तंवा पवित्रा आत्मता मोर वाड्तोर.
14 बारितेके, बगवंतना आत्मा मा रोपो मंवडुन हिंदल, वोर वाग्दन सीततगा वोना पर्जा आय्वल मरट तप्वक ईसा येतंतट इंवल माकुन टावा.
अद गट्कते, वोर माकुन पापनल बर्पुर सुटि कींतोर.
अनि मरट वोन डगुर-पान सीनेके, मय्मा वायना इन्जेरेन इहिन जर्गुस्तोर.
वूर साटि पव्लु किय्वल पार्तना
15-16 बगवंतल इव सम्दो मा लासि कीतोर.
अदेन साटि, येसु पर्बुनगा बरोसा इर्तिट अनि बगवंतनुर बक्तलिरकुन पेर्मते सूड्सेर मंतिट इन्जेर केन्ज्ता काड्कि, नना पार्तना कीनेके, मी साटि बगवंतन बस्केट दनेवाद वेह्चेर मंदंतोन.
17 अनि मा येसु किरिस्तु पर्बुनोर बाबो आय्वल मय्मा वाले बगवंतल, तंवा बारेते उंडे अदिक करि किय्ले, तंवा पवित्रा आत्मतुन हिंदल, मीवङ मनकुन तेलिवि अनि अर्तम किय्वल गियन सियना इन्जेर, वोन कोर्सेर मंतोन.*
18-20 अनि बगवंतल तना नेमि कीतुर साटि बचोर डगुक आसिर्वाद्क इर्तोर इंवल मिरट करि किय्ले, मीवङ मन-दिलकुन तंवा गियंता वेड्चिते निहना इन्जेर पार्तना कीसेर मंतोन.
ते मय्मा वाले बगवंतल मीकुन बद आसत साटि, बचोर विलुवता जाय्जत्नगा ईसा येत्ले केय्तोरो अनि बरोसा इर्वलिर मा साटि वोना सक्ति बचोर-बहन मंता इंवल करि कियना इन्जेर कोर्सेर मंतोन.
अद सर्वा सक्तितेने बगवंतल किरिसतुन मरंतल नेंडुस्तोर अनि स्वर्ग्नगा तंवा तिना बग्ला* वोन उपुस्तोर.
21 इद कालम्नेन आय्वा, बविसत्ने गिर वोन मोडि डगुर-पान अनि अदिकार वाले बोरे मनोर.
इद तीर्दे किरिस्तु दुनियतगा मंवलिर राज ताकुस्वलिर, दुस्रुर अदिकारिर, कडकुन दिसोङ अव सम्दो सक्तिन अनि उंडे दुस्रोक सम्दोन तेर बेय डगुर आंदुर.
22 बगवंतल इव सम्दोन किरिस्तुनङ कालकुन बूड दाबि कीसि, अवेन पोरो वोन अदिकार सीतोर.
उंदि मेंदोडगा मंवलिक सम्दो बागल्क तला वेह्तपिनय बहन ताकंतङो, अह्ने चर्चितुर बक्तलिरकुन ताकुस्ले, येसु अदिकारि आसि मंतोर.
23 चर्चितुर किरिस्तुना मेंदोल आंदिर.
वूरकुन तंवङ गुन्क्ने निह्चि, सम्दोतुन पूरि किय्वल गिर वोरे आंदुर.