यूदुल्क आयुर वूर्गा बगवंतल कीता कार्यतुन पेतुरु वेह्वल
11
1 वूर यूदुल्क आयुर वूर गिरे बगवंतना वचन केन्चि बक्तलिर आतेर इंवल गोस्टि अपोस्तुल्कुन अनि यूदयतुर सम्दिर बक्तलिरकुन करे माता.
2-3 ते बस्केते पेतुरु येरुसलेम वातोरो, अस्के अगटुर यूदुल्क्नगटल तप्वक तोल कत्रि कियना इंवलिर बक्तलिर, “निमे तोल कत्रि कियुस्मकि, वूर्गा सोन्जि, वूर सङा तिन्जि, बाटे माति” इन्जेर जट-पट लाग्तेर.
4 ते पेतुरु मोदोडल जर्ग्ता अदेन पोडि कीसि, इहिन वेह्तोर:
5 “योप्पेकु चहर्दे पार्तना कीसेर मनेके, नाकुन उंदि दर्सन वाता.
अद दर्संतगा ना मुने हाबडल उंदि पेराजति दुपटितङ नालुङ मूलङ लिम-लोम आसि, रेय्वल सूड्तोन.
6 ते अद दुपटितगा दिहंते सूड्तेके, दर्तुरित पोरो मंवल नालुङ काल्क्ना जिव्रस, केडता जिव्रस, मेंदोडे पर्केडे माय्वल जिव्रस अनि वडिदे परिवल पिटे-पुरड तान रोपो दिस्तङ.
7 अस्के, ‘पेतुरु!
तेच्चि, जक्सि तिन’ इन्जेर उंदि लेङ नाकुन केन्जा वाता.
8 बति नना, ‘एहे, वटिन पर्बु!
मा यूदुल्क्ना दर्मतुन पिय्सि, बे-सुदुड इंवलिकुन बस्केन तिन्मकि’ इन्जेर जवब सीतोन.
9 अस्के, ‘बगवंतल सुदुड कीतङ अवेन बहन बे-सुदुड वालेक इंति?’
इन्जेर अद लेङ उंदुंदि जोका हाबडल नाकुन केन्जा वाता.
10 अहन मूंद जोकङ जर्ग्ता.
अस्के दुपटितगा मंवलिकुन अरिक अद दुपटि हाबडेके ताच्चि सोत्ता.
11 “अदे वकत्ने सिजरिया नगुडल नह्गा सारि कीतुर वूर मुविर जन्क, नना मंवल रोतुन मुने वासि आग्तेर.
12 ‘यूदुल्क आयुर वूर इन्जि, अनमिना आय्वक्ने वूर सङा सोन’ इन्जेर बगवंतना आत्मा नाकुन वेह्ता.
अद योप्पेकु चहर्देर सार्विर बक्तलिर गिर ना सङा वातेर.
ममोट माकुन केयुस्तोर वोर कोर्नेलिना रोन सोत्तोम.
13 अस्के बगवंतनोर दूतल वोना रोन दिसि, ‘योप्पेकु चहर्दे माय्नलिरकुन सारि कीसि, सीमोन इंवल पेतुरतुन केयुसा.
14 वोर वेह्वलिक गोस्टिन हिंदल निमे अनि नी कुटुंबतुर बचे मांतिट’ इन्जेर वेह्तोर.
अद गोस्टितुन कोर्नेलि माकुन वेह्तोर.
15 “नना वड्क्वल सुरु कीतोन अस्के, पवित्रा आत्मा मा पोरो मोदोल रेय्तपिनय वूर पोरो गिर रेय्ता.
16 अस्के, ‘योहन येते बाप्तिस्मा सीतोर बति, मिरट पवित्रा आत्मते बाप्तिस्मा येत्किट’ इन्जेर पर्बु वेह्ता गोस्टि नाकुन हेतु वाता.
17 मरट येसु किरिस्तु पर्बुन पोरो बरोसा इर्ता काड्कि, माकुन वरम सीतपे, वूरकुन गिरे बगवंतल सीतोर.
ते बगवंतन रोकि किय्ले नना बचोडोना आंदुन?”
इन्जेर पेतुरु वेह्तोर.
18 इव गोस्टिङ केन्ज्तुर वूर उंडे बतङे अड्डम वड्क्मकि.
“बगवंतल यूदुल्क आयुर वूरकुन गिर तम्वङ पापकुन चुक चुके मातेके, बस्केट पिस्वल जीवतुन येत्ले मोका सीतोर” इन्जेर बगवंतन डगुर-पान सीतेर.
अंतियोकयतुरकुन चोकोट्ना कबुर करे माय्वल
19 स्टीपेंता मरन आता पेजे, वाता दुक्सतुन हिंदल पग्रे मातुर बक्तलिर कहितुर पोयेनिसिया येरियते, सय्परस लंकते अनि अंतियोकया नगुडे सोन्जि, सिरिप यूदुल्कुने बगवंतना बोदा वेह्चेर सोत्तेर.
20 बति सय्परस लंकतुर अनि कुरेनि नगुडुर कहितुर बक्तलिर अंतियोकया वासि, ग्रीकु बासा वड्क्वलिर यूदुलकुन गिर येसु पर्बुना चोकोट्ना कबुर वेह्तेर.
21 पर्बुना सक्ति वूर सङा मत्ता काड्कि, वेलेटिर यूदुल्क आयुर वूर येसुन पोरो बरोसा इर्सि, पर्बुनुर बक्तलिर आतेर.
22 इद कबुर येरुसलेम्ना चर्चितुरकुन करे माता.
ते वूर बर्नबन अंतियोकया सारि कीतेर.
23 ते वोर वासि, बगवंतना पेर्मता-दया वूर पोरो मंवल सूड्सि, बेय कुसि आतोर.
“पर्बुना बक्तितगा बर्पुर दिल्ते ताक्सेर मंदना” इन्जेर वूरकुन गटि-दीर्या सीतोर.
24 वोर बर्नबल पवित्रा आत्मता सक्तिते, बर्पुर बरोसते ताक्वल चोकोट्नोर मायनल आता काड्कि, वेलेटिर पर्बुनुर बक्तलिर आतेर.
25-26 अद आता पेजे, बर्नबल सव्लुन मह्क्सेर तार्सिस नगुडे सोत्तोर.
सव्लु पुट्ता पेजे, वोन अंतियोकयतगा पिय्सि वातोर.
वूर इविर आसि उंदि साल वेरि अगने मत्तेर.
अगटुर बक्तलिरकुन बेटे मासेर, वेलेटिरकुन बोदा करुसेर मत्तेर.
वीर अंतियोकयतुर बक्तलिरकुन मोदोल जोका, ‘किर्चन्क’* इन्जेर केय्तेर.
27 अवे दिवोस्क्ने येरुसलेमनल कहितुर पर्वक्तलिर अंतियोकया वातेर.
28 वूर्गटल अगबु इंवल पर्वक्तल निल्सि, “इद रोमा राज पूरो डगुर करु अर्वल मंता” इन्जेर पवित्रा आत्मता सक्तिते वेह्तोर.
अद करु कलव्दिया महा राजना गट्कते अर्ता.
29 अगबु वेह्ता केन्चि, हर बक्तल तंवा तंवा लगुतुन पिय्सि, यूदया येरियतुर बक्तलिरकुन कोतना मदत कियना इन्जेर निर्नय कीतेर.
30 अहन वूर बक्तलिर कोतङ मीरि कीसि, बर्नबल अनि सव्लुना केय्दे यूदया येरियता येरुसलेम्ना चर्चितुर पेदोल्क्नगा सारि कीतेर.