येसुनुर बक्तलिरकुन वातङ अव दुक्सङ
12
1 अव दिवोस्क्नेने हेरोद राजल* चर्चितुर कहितुर बक्तलिरकुन दुक्सा सिय्वल मोदोल कीतोर.
2 वोर राजल योहंतोर तादल याकोबुन तल्वर्ते जव्कुसीतोर.
3 इहिन जक्वल यूदुलकुन पसंद वाता इन्जेर करि कीसि, पेतुरतुन गिर जेल्दगा वाटुस्ले पिय्तोर.
इद गट्ना तातो पिंडिते सारिङ सुर्वल सड्दुन नेटि जर्ग्ता.
4 अनि जेल्दगा वाट्ता पेजे, नालुङ पूटन नाल्विर नाल्विर सोडा जन्क सिपायिरकुन केपन साटि इर्तोर.
पस्का सड आता पेजे, पेतुरतुन पर्जतुन मुने तस्वा कियना इंवल वोना पिलन मत्ता.
5 अहन पेतुरु जेल्ते मनेके, वोन साटि चर्चितुर बक्तलिर बगवंतन बस्केट पार्तना कीसेर मत्तेर.
बगवंतनोर दूतल पेतुरतुन जेल्दल सुटि कियुस्वल
6 हेरोद इमुन नेटि तस्वा कीकट इन्जेर मत्तोर.
अद रातुन पेतुरतुन रंड सकलिने दोह्चि, इविर सिपायिर नड्डुम नर्मुसीतेर.
अनि केप्वलिर इविर सिपायिर जेल्दा डेरोटतुन मुने केप्सेर मत्तेर.
7 अचनक बगवंतनोर दूतल वोन्गा पावे मातोर.
ते अद कम्रा वेड्चिते निंता.
दूतल पेतुरतुन तापि कीसि, “वेय्ने तेदा” इन्जेर इत्तोर.
अस्के दोह्चि मत्तङ अव सकलिङ नम्तङ.
बगवंतनोर दूतल जेल्दगा वासि पेतुरतुन सङा वड्क्वल
8 अस्के वोर दूतल, “नी नडि दोह्चि, चेपुल्क केरा” इन्जेर पेतुरतुन इत्तोर.
वोर इत्ता तीर कीता पेजे, “नी सालुवा मेंदोडगा वाट्सि, ना पेजेय वरा” इन्जेर वेह्तोर.
9 ते पेतुरु वोन पेजेय बह्रि सोत्तोर.
तेर बति, दूतल किय्वल करलेन जर्ग्सेर मंता इन्जेर नंमकि.
तनकुन अहन दर्सन दिसेर मंता इन्जेर सोन्च कीतोर.
10 वूर मोदोडा केप्वल जागतुरकुन अनि रेंडवा केप्वल जागतुरकुन वीड्सि, नगुडे नेङ्वल डगुर पाटक्नगा वातेर.
अस्के अद ताना तान्के कोले माता.
अद पाटकुन वीड्सि उंदि गलिता सरि पिय्सि ताक्सेर सोनेकेते, वोर दूतल मयड आतोर.
11 अस्के पेतुरु, “हेरोद राजना केय्दल अनि यूदुल्क्ना कपट्ना पिलंतल बगवंतनोर दूतल नाकुन तपुस्तोर इन्जि करल अर्तम आता” इन्जेर तंवा तना इत्तोर.
12 अहन इन्जि, मरियना रोन सोत्तोर.
इद योहन-मार्क्ना अवल आंद.
अद रोन वेलेटिर मीरे मासि पार्तना कीसेर मत्तेर.
13 पेतुरु वासि अद रोता पाटकुन तापि कीतोर.
ते रोदे इंवल काम किय्वल पेडि अदेन तेरिलेन वाता.
14 अद पेडि पेतुर्ता लेङुन वोड्कि पिय्ता.
अद कुसिते पाटक तेरिवक्नेने रोपो विच्चेर सोन्जि, “पेतुरु वासि पाटकुन मुने निल्सि मंतोर” इन्जेर वेह्ता.
15 अद केन्चि वूर, “नीकुन बता पिसङ पिय्तङ कि!”
इन्जेर इत्तेर.
बति अद पेडि, “सेले-सेले नना वेह्वल करले आंद” इन्जेर वेह्ता.
ते वूर, “पेतुर्तोर दूतल मंदनुर” इन्जेर इत्तेर.
16 अद वकत्ने पेतुरु उंडे गिर पाटकुन तापि कीसेरेन मत्तोर.
वूर सोन्जि पाटक तेरिसि, वोन सूड्सि बेय गुल आतेर.
17 अस्के, पेतुरु दब मंट इन्जेर केय हालि कीसि, तनकुन पर्बु बहन जेल्दल बह्रि तत्तोर इंवल वूरकुन पोडि कीसि वेह्तोर.
“इद गोस्टितुन याकोबुन अनि मेय्तुर बक्तलिरकुन वेहट” इन्जेर वेह्चि, अगटल दुस्रो जागा सोत्तोर.
18 उज्डे माता पेजे, “पेतुरतुन बतल आसि मंदर?”
इन्जेर जेल्दुर सिपायिर बेय गुल आतेर.
19 हेरोद अद केन्चि वोन साटि मह्कुसीतोर बति, पेतुरु पुट्मकि.
ते केप्वलिर सिपायिरकुन सवल्क पूसि कीसि, मरंता सिक्सा वाट्तोर.
अद आता पेजे, हेरोद यूदयतल सिजरिया नगुडे सोन्जि अगा मत्तोर.
हेरोद राजना मरन
20 हेरोद राजल तूरु अनि सीदोन नगुक्ना पर्जत पोरो सोङ्ने मत्तोर.
ते वूर पर्जा मीरे मासि सोन्जि, राजन सांति कियना इन्जेर बलस्तु इंवल राजनोर कारोबारिन तम्वा बाज कीसि कोर्तेर.
बारितेके, हेरोद्ना देसनल तम्वङ नगुकुन चंदिता रासि सरपरा आंदु.
21 ते हेरोद, वूर सङा वड्क्ले दिनम टरि कीसि, अंटित राजनङ कप्डिङ केर्तोर अनि राजा-गादितगा वासि उत्तोर.
अनि पर्जतुन वेह्वल सुरु कीतोर.
22 ते वूर, “इद पेंदय लेङ आंद.
माय्नना आयो” इन्जेर किलितेर.
23 अस्के येंटने बगवंतनोर दूतल, बगवंतना डगुर-पांदुन हेरोद येत्ता काड्कि, वोना मेंदोड रोपो पुड्क अरुसि, वोना जीवा सोनल कीतोर.