अपो. का. 13

बर्नबन अनि सव्लुन नेमि कीसि सारि किय्वल

1 इंके अंतियोकयता चर्चितुर्गा बर्नबल, कारु इन्जेर केय्वल सिमियोन, कुरेनि नगुडोर लूकियल, हेरोद राजन बरोबर बेर्स्तोर मनयेनु, सव्लु इंवलिर कहितुर पर्वक्तलिर अनि गुरुर गिर मत्तेर.

2 वूर पर्बुन सेवा कीसेर उपस्क पिय्सि, बगवंतन पार्तना कीसेर मनेके, “नना वूरकुन नेमि कीता कामुन साटि बर्नबन अनि सव्लुन अलदि कीम्ट” इन्जेर पवित्रा आत्मा वेह्‍ता.

3 ते वूर सम्दिर उपस्क पिय्सि, वीर इविरङ तलन पोरो केय्क इर्सि, पार्तना कीसि सारि कीतेर.

सय्परस्नगा बोदा वेह्‍वल

4 अहन पवित्रा आत्मा वूरकुन सारि कीता काड्कि, वूर सेलुकया इंवल नगुडे सोन्जि, अगटल उंदि रूकतगा उच्चि सय्परस इंवल लंकतगा सोत्तेर.

5 अगा मंवल सलामि इंवल नगुडे सोत्तेर.

अगा मंवलिक यूदुल्क्नङ सुनगोक्नगा सोन्जि, बगवंतना वचन वेह्‍तेर.

योहन-मार्क इंवल वूरकुन मदत कीसेर मत्तोर.

6 अद लंकतगा हंदा बाजनल-हिंदा बाज वेलिसेर पापुस इंवल नगुडे सोत्तेर.

अगा लबड पर्वक्तल अनि सोदेङ किय्वल यूदुल्क्ना जातितोर बर-येसुन बेटे मातेर.

7 वोर अद लंकतोर गियन वाले गवर्नर सेर्गि-पव्लुन सङा मत्तोर.

वोर गवर्नर बगवंतना वचन केन्जना इन्जि बर्नबन अनि सव्लुन केयुस्तोर.

8 बति वोर एलिमस, बर्नबन अनि सव्लुन बय्मन आसि, गवर्नर्ता बरोसतुन बह्‍कि किय्ले सूड्तोर.

(एलिमस इत्तेके ग्रीकु बासते सोदेङ किय्वना पोरोल).

9 अस्के पव्लु इन्जेर केय्वल सव्लु पवित्रा आत्मते निन्चि, नीटम एलिमन सूड्तोर.

10 अनि, “सम्दो तीर्क्नङ मोसेम्क्ने निन्चि मंवनि आंदि.

सय्तंदुन^* दात्नोनि, नियत्नङ सम्दोतुन बय्मन आय्वनि, पर्बुनङ नीटम्नङ सरिन करब किय्वक मंदा पर्विय?

11 इचुला सूडा!

पर्बु नीकुन सिक्सा सींतोर.

निमे कहि रोज्क गुड्डिनि आंति” इन्जेर इत्तोर.

अस्के येंटने मब अनि सिकटि वोन पोरो गुम्स्ता.

ते वोर तना ताक्ले, बोरे मदत कीनिर इन्जेर मेस्क्सेर मत्तोर.

12 बस्केते अद गट्ना सूड्तोरो, अस्के वोर गवर्नर गुल आसि पर्बुना बोदतगा बरोसा इर्तोर.

पिसिदिया येरियता अंतियोकया नगुडे बोदा वेह्‍वल

13 अद आता पेजे, पव्लु अनि वोनुर सोप्तलिर रूका उच्चि, पापुस नगुडल पंपुलिया येरियता पेर्गे नगुडे येव्तेर.

अस्के योहन-मार्क इंवल वूरकुन सुटि कीसि येरुसलेम मल्सि सोत्तोर.

14 बति वूर पेर्गेतल पिसिदिया येरियते मंवल अंतियोकया नगुडे वासि, आरम्ना दिवोसुन नेटि सुनगोग्नगा सोन्जि उत्तेर.

15 अगा मोसेना कानुंतुन अनि पर्वक्तलिरङ ग्रंतकुन वाचि कीता पेजे, सुनगोग्नुर अदिकारिर, “दादलिर्निट!

मा लोकुर बक्तितगा बडे माय्ले, बतय बोदा वेह्‍कोम इंद्किट्ते वेहट” इन्जेर कबुर सारि कीतेर.

16 ते पव्लु तेच्चि तंवा केय हालि कीसि, “नावुर इज्रयेल लोकुर्निट!

बगवंतना वेरेते बक्ति किय्वलिर दुस्रोक जातिनुर्निट!

केन्जट!

17 इज्रयेल पर्जतोर बगवंतल मा तोत्तुरकुन नेमि कीतोर.

ईजिप्ट देस्ने मनेके, वूरा जनोबा बेय वेले बडि कीतोर.

तंवा मय्मता सक्तिते वूरकुन अद देसनल बह्‍रि तत्तोर.

18 लग-बग चालिस (40) साल्क अव बोडि गुटनगा पर्जा तनकुन बय्मन आसि, ताक्वडुन वोर्च्तोर.

19 बगवंतल कनान देस्नगा मंवलिर येडुङ जातिनुरकुन नासेडम कियुसि, अद देसुन मा तोत्तुरकुन तूसि सीतोर.

20 इव सम्दो जर्ग्ले नालुङ नुह्‍क पनस (450) साल्क पिय्तङ.

“अद आता पेजे बगवंतल मा तोत्तोर समुयेल पर्वक्तना कालम वेरि, वूर साटि नायदिकारिरकुन सीतोर.

21 अद आता पेजे वूर पर्जा, ‘माकुन राजल पह्‍जे’ इन्जेर कोर्तेर.

ते बगवंतल बेंयमींता कांदांतोर कीसुनोर मरि, ‘सव्लुन’ राजन दात नेमि कीतोर.

वोर चालिस (40) साल्क वेरि, राज ताकुस्तोर.

22 सव्लुन राजा-गादितल रेह्‍चि, दाविदुन राजल इन्जेर बगवंतल नेमि कीतोर.

‘वेर येसयिनोर मरि दाविद नावा दिल्ता इचतुन पिय्सि, नना वेह्‍वलिक सम्दो किय्वल आंदुर’ इन्जेर बगवंतल वोन बारेते गवा वेह्‍तोर.

23 “बगवंतल तंवा वाग्दन सीता तीर इज्रयेल देस्नुर लोकुरकुन बचि किय्ले, येसुन दाविद्ना कांदांतल जल्मा आयुस्तोर.

24 येसु वायन मुने बाप्तिस्मा सिय्वल योहन, इज्रयेल देस्नुर सम्दिरकुन, ‘पापनल कब्ले मासि, बाप्तिस्मा येतट’ इन्जेर वेह्‍तोर.

25 बति योहन तंवा सेवतङ आक्रि दिवोस्क्ने, ‘मिरट नाकुन बोर आंदुर?

इन्जि सोन्च कींतिट’ इन्जेर इत्तोर.

अनि ‘मिरट सोन्च किय्वल बचि किय्वना आयोन.

वोर बचि किय्वल ना पेजेय वासेर मंतोर.

वोनङ चेपुल्क्ना पटि रेह्‍ले गिर नना कामि सियोन’ इन्जेर इत्तोर.

26 “इज्रयेल देस्नुर तादल-तमुर्निट!

अब्राहम्ना कांदांतुर्निट!

अनि बगवंतन पोरो बाव-बक्ति वालिर यूदुल्क आयुर वूर्निट!

बचि किय्वल चोकोट्ना कबुर बगवंतल मह्‍गा सारि कीतोर.

27 बति येरुसलेम्नगा मंवलिर अनि वूरुर अदिकारिर, मुक्ति सिय्वने आयि, हर आरम्ना दिवोसुन नेटि वाचि कीतङ पर्वक्तलिरङ वचन्कुने आयि करि किय्मकि.

करि किय्वक्नेन येसुन सिक्सा वाट्सि पर्वक्तलिरङ वचनकुन पूरि कीतेर.

28 मरंता सिक्सा वाटनल बतय तप पुट्वेके गिर, ‘येसुन जकना’ इन्जेर रोमतोर गवर्नर पिलातुन वूर कोर्तेर.

29 वोना मरंतुन बारेते लिहि कीतङ सम्दो वचनकुन पूरि कीता पेजे, अद मोदनल वोना कूरदुन रेह्‍चि, वीच्ना बुयरितगा इर्तेर.

30 बति बगवंतल साव्दल वोन नेंडुस्तोर.

31 अद आता पेजे, गलिलयतल वोन सङा येरुसलेम वातुरकुन वेले रोज्क दिसेर मत्तोर.

वूर इंके पर्जतुन मुने गवदार्क आसि मंतेर.

32-33 कीर्तन्क्ना पुस्तक्ना रेंडवा अद्यायतगा इहिन लिहि कीसि मंता:

‘निमे नावोर मरिनि आंदि.

नना नेंड नीकुन मिय्तोन’⁺

इन्जेर बगवंतल मावुर तोत्तुरकुन सीता वाग्दन, इंके मावा कांदांतुन रोपो येसुन नेंडुसि, मा साटि तान पूरि कीतोर.

ममोट इद चोकोट्ना कबुडुन बारेते, मीकुन वेह्‍चेर मंतोम.

34 “वोना मेंदोल बस्केट्के कडिवक्ने बगवंतल येसुन साव्दल नेंडुस्ता गोस्टितुन बारेते दर्मा-ग्रंत्नगा:

‘नना दाविदुन वाग्दन कीतङ

पवित्रा आसिर्वाद्क नीकुन तप्वक सींतोन’⁺

इन्जेर लिहि कियुस्तोर.

35 अनि उंडे उंदि जागा:

‘निमे नीवोर पवित्रवंतना मेंदोडुन कडिया सिय्वि’⁺

इन्जेर लिहि कीसि मंता.

36 दाविद बगवंतना इचा तीर तंवा पिडितुरकुन सेवा कीसि, मार्तोर.

मार्ता पेजे वोना कूर कडिता.

37 बति बगवंतल नेंडुस्तोना कूर कडिमकि.

38-39 “अदेन साटि तादल-तमुर्निट!

ममोट येसुन बारेते पचर कीसेर मंतोम.

बारितेके, सिरिप येसुन हिंदले, बगवंतल पापकुन मापि कीसि, बरोसा इर्तुरकुन तन्गा मीरि किया परंतोर.

बति मोसेना कानुन बगवंतनगा बस्केन बोने गिर मीरि किया पर्मकि.

इद गोस्टितुन मिरट करि किया लागर.

40-41 “ते,

‘मीवङ दिवोसकुन रोपो नना उंदि कार्या कींतोन.

अदेन बारेते बोरे मीकुन वेह्‍तेके गिर मिरट नम्विट.

चेडि किय्वलिर लोकुर्निट!

मिरट गुल आसि, नासेडम आम्ट’⁺

इन्जेर पर्वक्तलिर लिहि कीतङ गोस्टिङ मिह्‍गा जर्ग्वक्ने दिहंते सूडट” इन्जि वेह्‍तेर.

42 अहन वेह्‍चि पव्लु अनि बर्नबल अद सुनगोगनल बह्‍रि पेसिनेके, “वाय्वल आरम्ना दिवोसुन नेटि गिर, इव गोस्टिङ पोडि कीसि माकुन वेहट” इन्जेर पर्जा कोर्तेर.

43 अद आता पेजे, सुनगोग्नगा पार्तना-विंति किय्ले वातुर वेलेटिर यूदुल्क अनि यूदुल्क्ना दर्मतगा नेङ्तुर बक्तलिर पव्लु अनि बर्नबन पेजेय सोत्तेर.

ते, “बगवंतल सीता पेर्मता-दयतगा निल्सि मंदना” इन्जेर पव्लु अनि बर्नबल वूरकुन हक्लि कीतेर.

पव्लु तंवा दिहंतुन यूदुल्क आयुर वूर्के मलुस्वल

44 दुस्रो आरम्ना दिवोसुन नेटि पर्बुना गोस्टि केन्जना इन्जेर लग-बग अद नगुडुर सम्दिरे सुनगोग्नगा मीरे मासि वातेर.

45 बति वाता पर्जता गुब्डतुन सूड्सि, यूदुल्क कुटा कुटा आतेर.

अनि पव्लु वेह्‍ततुन हिंदल, वूर बय्मन आसि, वोना हिजत वोतेर.

46 अस्के पव्लु अनि बर्नबल दर्यम्ने, “बगवंतना वचन मोदोल मीकुन वेह्‍वल जुरत मत्ता.

बति मिरट अदेन वटिन इन्जि, बस्केट मंवल जीवतुन कामि सियोम इत्तिट.

अदेन साटि ममोट यूदुल्क आयुर वूर्गा दांतोम.

47 बारितेके,

‘दुनियतङ नालुङ कोन्क्नुर यूदुल्क आयुर वूर

बचे माय्ले वेड्चित दात मीकुन^* इर्तोन’⁺

इन्जि पर्बु माकुन तोत्तोर पर्वक्तना केय्दे हुकुम सीतोर” इन्जेर वेह्‍तेर.

48 इद गोस्टि केन्ज्तुर यूदुल्क आयुर वूर वेले कुसिते पर्बुना वचंतुन डगुर-पान सीतेर.

अनि बस्केट पिस्वल जीवतुन येत्ले, नेमे मातुर सम्दिरे बक्तलिर आतेर.

49 ते पर्बुना चोकोट्ना कबुर अद येरिया पूरो पग्रे माता.

50 बति वूर यूदुल्क अद नगुडुर पेदोलकुन अनि बाव-बक्ति वालेक मुके वेय्लोकुन चडि कीसि, पव्लुन अनि बर्नबन दुक्सा सीतेर.

अनि वूरकुन अद येरियतल तेंड्सि पूड्तेर.

51 पर्बुना बोदतुन वूर वोप्मकि.

अदेना निसनित साटि, तम्वङ कालकुन तुंड्ता दुबतुन जडि कीतेर.

^* अनि अगटल पव्लु अनि बर्नबल इकोनिया नगुडे सोत्तेर.

52 तेर बति, पिसिदिया येरियता अंतियोकयतगा मंवलिर बक्तलिर पवित्रा आत्मता सक्तिते निन्चि कुसिते मत्तेर.