इकोनियतगा मय्मतङ काम्क किय्वल
14
1 अद इकोनिया नगुडे पव्लु अनि बर्नबल तम्वा आदतुन पिय्सि, इविर्ते सुनगोग्नगा सोन्जि, पर्बुना सक्तिते बोदा वेह्तेर.
अद केन्चि वेलेटिर यूदुल्क अनि यूदुल्क आयुर वूर* येसुन नम्तेर.
2 बति नंमकि वूर यूदुल्क, यूदुल्क आयुर वूरकुन चह्डि कीसि, बक्तलिर पोरो सोङ वानल कीतेर.
3 तेर बति, पव्लु अनि बर्नबल पर्बुन बारेते बोने वेरिवक्ने अगा वेह्चेर वेलेन जेल मत्तेर.
अद गट्कते पर्जतुन मुने, वीरा केय्दे पर्बु वेले चमत्कार्क अनि मय्मतङ काम्क कियुसि, तंवा दया अनि मयता बोदतुन गवता रूप्ने तोह्तोर.
4 बति अद नगुडुर नड्डुम बेद-बाव पुड्ता.
ते कहितुर यूदुल्क्नेके अनि उंडे कहितुर अपोस्तुल्क्नेके पाके मातेर.
5 अस्के यूदुल्क आयुर वूर कहितुर अनि यूदुल्क तम्वुर अदिकारिर सङा मीरे मासि, वूर अपोस्तुलकुन दुक्सा सीसि, बंडने पासि, जकना इन्जेर पिलन वाड्तेर.
6 बति अद पिलंतुन वूर करि कीतेर.
लुकयोनिया येरियतङ लुस्त्रा अनि देर्बे नगुक्नगा अनि अवेन सिर्मुट्नङ नह्क्नगा परर आतेर.
7 अनि अवेनगा पर्बुना चोकोट्ना कबुर वेह्वल मोदोल कीतेर.
पुट्टि-कूटल चोकोट आय्वल
8 लुस्त्रा नगुडगा वोरोर कूटल मत्तोर.
वोर पुट-गड्मितल बस्केन ताक्मकि.
9 वोर कूटल पव्लु वड्क्वल केन्ज्तोर.
ते वोन नेह्ना सूड्सि, चोकोट आया परंतोन इंवल बरोसा वोन्गा मंता इन्जेर पव्लु करि कीतोर.
10 अनि, “नीवङ अरिकाल्क अह्चि, बरोबर निला” इन्जेर जोर्ते इत्तोर.
अस्के येंटने वोर चङ्ने तेच्चि ताक्वल मोदोल कीतोर.
11 ते पर्जतङ गुब्डङ पव्लु कीता अदेन सूड्सि, लुकयोनिया बासते, “पेन्के माय्नलिरङ रूप्क येच्चि, मह्गा वातङ” इन्जेर जोर्ते किलितेर.
12 अनि बर्नबन दुपति* इंवल पेंदा अनि पव्लु बोदा वेह्वल कीनेके, हेर्मेस इंवल पेंदा पोरोल दोस्तेर.
13 अद नगुडुन मुने दुपति पेंदा गुडि मत्ता.
अद पेंदोर देवरि कोंदन अनि पुङक्नङ हारकुन नगुडङ पाटक्नगा तत्तोर.
अनि वोर पर्जत सङा मीरे मासि, “वीर साटि बलि चडि कीकट” इन्जेर कोर्तोर.
तम्वकुन पेन्क इन्जेर बलि चडि किय्ले कोंदन तर्वल सूड्सि, पव्लु अनि बर्नबल गुल आय्वल
14 बति अपोस्तुल्क आय्वलिर पव्लु अनि बर्नबल अद गोस्टि केन्चि, तम्वा दुक्सतुन तोह्ले तम्वङ पाङुक सरुसेर* अद पर्जता गुब्डतगा विच्चेर सोत्तेर.
15 अनि “दादलिर्निट!
मिरट बारि इहिन कीसेर मंतिट?
ममोट गिर मी दात्नुर सादरन माय्नलिरे आंदुम.
इव कामि सियोङ अव चीजकुन सुटि कीसि, हाबडुन, दर्तुरितुन, सम्दुरकुन अनि अवेनगा मंवलिक सम्दो जिव्रसुन गडि कीतोर वोर, जीवा वाले बगवंतनेके मलना इन्जेर इद चोकोट्ना कबुर वेह्चेर मंतोम.
16 वोर बगवंतल इदेन मुने, सम्दि जातिनुर बूरा वूर तम्वङ दर्मना सरि पिय्सि, इचा तीर ताक्ले, वूरकुन सुटि कीतोर.
17 तेर बति, बगवंतल हाबडल पिर वायुसि, चोकोटे पंटङ पंड्ले कालमकुन दया कीसेर, कानेतुन सीसेर मंतोर.
इहिन मीवङ दिलकुन आनंद सीसेर सम्दो चोकोट कीसेर तना मंतोन इंवल तोह्तोर” इन्जेर वेह्तेके गिर बति,
18 पव्लु अनि बर्नबल तम्वा साटि बलि चडि किय्वक्ने पर्जतङ गुब्डन आपुस्ले वेले तक्लिब आता.
19 अद आता पेजे, पिसिदिया येरियता अंतियोकयतल अनि इकोनियतल कहितुर यूदुल्क वासि, पर्जतङ गुब्डन तम्वा बाजुन ऊम्तेर अनि पव्लुन बंडने पातेर.
वोर सासि मंदनुर इन्जि, वोन नगुडुन बह्रि येरिसि, वाडि सीतेर.
20 बति बस्केते पव्लुन सिर्मुट बक्तलिर मीरे मातेरो अस्के, वोर तेच्चि उंदुंदि जोका अदे नगुडे सोत्तोर.
इमुन नेटि बर्नबन सङा देर्बे नगुडे सोंले पेसितोर.
बक्तलिरकुन उंडे उंदि जोका बेटे माय्वल
21 वूर पव्लु अनि बर्नबल देर्बे नगुडगा चोकोट्ना कबुडुन वेह्ता काड्कि, अगा वेलेटिर बक्तलिर आतेर.
अद आता पेजे, लुस्त्रतल इकोनिया अनि इकोनियतल पिसिदिया येरियता अंतियोकया नगुडे मल्सि वातेर.
22 अनि अगटुर बक्तलिरकुन, ‘येसुना बरोसतगा गट निल्सि मंदन’ इन्जेर गटि-दीर्या सीसेर, “बगवंतना राज्नगा नेङ्ले, मरट वेले तक्लिबकुन तप्वक बोगे माया लागर” इन्जेर पव्लु अनि बर्नबल वेह्तेर.
23 अनि वूर हर चर्चितुर्गा पेदोलकुन नेमि कीतेर.
पव्लु अनि बर्नबल उपस्क पिय्सि, पार्तनङ कीसेर, वूर बरोसा इर्वल पर्बुना केय्दे पेदोलकुन हव्लि कीतेर.
सिरिया येरियता अंतियोकयतगा मल्सि वाय्वल
24 अद आता पेजे, वूर पिसिदिया येरियतल पंपुलिया येरियते सोत्तेर.
25 अगा पेर्गे नगुडे बगवंतना बोदा वेह्चि, अतलिया चहर्ते सोत्तेर.
26 अतलियतल सिरिया येरियता अंतियोकया नगुडे रूकते मल्सि वातेर.
मोदोल नेमि कीसि, इद मह्ता कार्या किय्ले, बगवंतना केय्दे वूरकुन हव्लि कीता नगुर इदे आंद.