येरुसलेम्नगा चर्चा किय्वल
15
1 यूदयतल कहितुर अंतियोकयतगा वासि, “मोसेना कानुंतगा वेह्ता तोल कत्रि कियुस्वेके पापनल बचे मायुर” इन्जेर बक्तलिरकुन बोदा वेह्तेर.
2 इदेन हिंदल, पव्लु अनि बर्नबल वूर सङा जोर्ते जट-पट लाग्तेर.
ते येरुसलेम्नगा मंवलिर अपोस्तुल्कुन अनि चर्चितुर पेदोलकुन बेटे मासि, इद गोस्टिता चर्चा कियना इन्जि, पव्लु अनि बर्नबन तर्सो उंडे कहितुर बक्तलिरकुन येरुसलेम रोहना इन्जेर अंतियोकयतुर बक्तलिर निर्नय कीतेर.
3 अनि चर्चितुर, वूरकुन सारि कीतेर.
ते वूर पोयेनिसिया, समरया येरियनल सोन्जेर मनेके, यूदुल्क आयुर वूर गिर बहन बक्तलिर आतेर इंवल बक्तलिरकुन वेह्तेर.
ते अद केन्चि अगटुर बक्तलिर बेय कुसि आतेर.
4 अहन वूर येरुसलेम्नगा येव्ता पेजे, चर्चितुर, अपोस्तुल्क अनि अगटुर पेदोल्क वूरकुन मानि कीसि, करुम कीतेर.
बगवंतल तम्वा केय्दे कियुस्तङ सम्दो कामकुन बारेते पव्लु अनि बर्नबल वूरकुन वेह्तेर.
5 बति अस्के कहितुर परिसया वर्गतुर+ बक्तलिर तेच्चि, “यूदुल्क आयुर वूर बक्तलिरकुन तोल कत्रि कियुसा लागर अनि वूर मोसेना कानुंतुन पिय्सि ताका लागर” इन्जेर वेह्तेर.
6 अस्के अपोस्तुल्क अनि पेदोल्क इदेन बारेते, चर्चा किय्ले मीरे मातेर.
7 वेले जेल चर्चा जर्ग्ता पेजे पेतुरु तेच्चि, “नावुर तादल-तमुर्निट!
यूदुल्क आयुर वूर नना वेह्ता चोकोट्ना कबुर केन्चि, बक्तलिर आयना इन्जेर मी सम्दिर्गटल, नाकुन इदेन मुने, बगवंतल नेमि कीतोर इंवल मीकुन टावय.
8 अनि दिल्क्नगा मत्ता अदेन करि किय्वल बगवंतल, मा यूदुलकुन सीतपे वूर यूदुल्क आयुर वूरकुन गिरे तंवा पवित्रा आत्मा सीसि, वोप्तोर इंवडा गवा माकुन तोह्तोर.
9 माकुन अनि वूरकुन बेद-बाव बतय तोह्वक्ने, येसुन पोरो इर्ता बरोसतुन हिंदल, बगवंतल वूरङ दिलकुन सुदुड कीतोर.
10 अस्के, मा तोत्तुरे आयि, मरटे आयि, तोचा पर्मकि अद वजंता जुवतुन,* दुस्रोक जातिनुर बक्तलिरकुन तोचुसि, बगवंतल कीता अदेन बारेते पूसि कीसि, वोन बारि सोङ वानल कींतिट?
11 अहन सोङ वानल किय्मट!
येसु पर्बुना पेर्मता-दयतुन हिंदल, ममोट सम्दिर अनि यूदुल्क आयुर वूर गिर पापनल उंदि तीर बचे मातोम इन्जि नमंतोम” इन्जेर पेतुरु वूरकुन वेह्तोर.
12 अहन वेह्ता पेजे, बर्नबल अनि पव्लु यूदुल्क आयुर वूर्गा बगवंतल तम्वा केय्दे कियुस्तङ सम्दो चमत्कार्क अनि मय्मतङ काम्कुन पोडि कीसि वेह्नेके, अगा मीरे मातुर सम्दिर दब केन्ज्तेर.
13 वूरा वेह्वल आता पेजे याकोब तेच्चि, “तादल-तमुर्निट!
नना वेह्वल केन्जट.
14 बगवंतल मोदोल यूदुल्क आयुर वूर पोरो पेर्मता-दया तोह्तोर अनि इहिन वूर्गटल कहितुर बहन बक्तलिर आतेर इंवल, सीमोन-पेतुरु माकुन अर्तम आनल वेह्तोर.
15 तोले पर्वक्तलिर वेह्तपे इव गोस्टिङ जर्ग्तङ.
16 ‘अद आता पेजे नना मल्सि वासि,
अर्ता अद दाविद्ना राजुन उंदुंदि जोका दोहंतोन.
अव टुक्डेने मोदोल मत्तपिनय
वोना राजुन उंदुंदि जोका दोहंतोन.
17 अदेन हिंदल यूदुल्के आय्वा
नना नेमि कीतुर यूदुल्क आयुर वूर गिरे बगवंतन मह्कंतेर’+
18 इन्जेर पर्बु वेले सालकुन मुनेने लिहि कियुस्तोर.
19 अदेन साटि यूदुल्क आयुर वूर्गटल बगवंतना चर्ना पिय्वलिरकुन मरट तक्लिब्क सिय्वा इन्जेर नावा निर्नय मंता.
20-21 मूर्तिनगा निवोद कीततुन तिन्मट; गोटितुन मुर्गुडि कीसि जक्ततुन तिन्मट; नेतुर तिन्मट* अनि लन्जेतनम किय्मट इंवलिक इव गोस्टिना जोलित सोंवक मंट इन्जि चिटि लिहि कीकट.
बारितेके, कांदतल कांदा हर नगुक्नङ सुनगोक्नगा आरम्ना दिवोसुन नेटि मोसेना कानुंतुन वाचि कीसि, लोकुरकुन बोदा वेह्चेर मंतेर” इन्जेर याकोब वेह्तोर.
यूदुल्क आयुर वूर बक्तलिरकुन चिटि लिहि किय्वल
22 अस्के येरुसलेम्नुर बक्तलिर्गटल मुके वालिर बर्सबा इंवल यूदन अनि सीलन नेमि कीसि, बर्नबल अनि पव्लुन सङा अंतियोकया सारि कियना इन्जेर अपोस्तुल्क अनि चर्चितुर पेदोल्क निर्नय कीतेर.
23 अनि वूर सङा,
“अंतियोकया, सिरिया अनि किलिकियतगा मंवलिर यूदुल्क आयुर वूर बक्तलिर्निट!
मीकुन दंडोस दोसि, चोकोट-वायुट पूसि कीसेर, अपोस्तुल्क, मीवुर पेदोल्क अनि दादलिर-बायिक येरुसलेमनल लिहि कीसेर मंतोम.
24 मावा हुकुम सेल्वा कहितुर लोकुर मिह्गा वासि तम्वङ गोस्टिने मीवा मंदुन दुक्सा सीतेर इन्जेर करि कीतोम.
ममोट वूरकुन अदिकार सिय्मकि.
25-27 अदेन साटि चर्चितुर मुके बक्तलिर यूदन अनि सीलन नेमि कीसि, मिह्गा सारि कियना इन्जेर निर्नय कीतोम.
येसु किरिस्तु पर्बुन साटि तम्वा जीवतुन हव्लि कीतुर लाड्नोर बर्नबल अनि पव्लुन सङा वूर अंतियोकया वासि, इद ममोट लिहि कीता चिटितुन बारेते मीकुन गवा वेहंतेर.
28-29 मूर्तिनगा निवोद कीततुन तिन्मट; गोटितुन मुर्गुडि कीसि जक्ततुन तिन्मट; नेतुर तिन्मट; लन्जेतनम किय्मट इंवलिक इव गोस्टिना जोलित सोंवक मंट.
इवेनल लक मत्तेके, मीकुन गिर चोकोट जर्गंता.
इवेकुन तपुसि दुस्रो बदे वजन मी पोरो तोचुस्वा इन्जेर पवित्रा आत्मतुन अनि माकुन गिर मंदगा वाता.
इचोरे गोस्टि, मीकुन दनेवाद”
इन्जेर चिटि लिहि कीतेर.
30 अद चिटि पिय्सि वूर अंतियोकया सोत्तेर.
अगटा चर्चितुर सम्दिरकुन केय्सि अद चिटितुन सीतेर.
31 ते अद चिटितुन वाचि कीता पेजे, वूरकुन वेले दर्यम अनि आनंद लाग्ता.
32 यूदल अनि सीलल गिर पर्वक्तलिर आता काड्कि, पर्बुनल करि कीसि, बक्तितगा बडे माय्वलिक वेले गोस्टिङ अगा मंवलिर बक्तलिरकुन वेह्चि, गटि-दीर्या सीतेर.
33 वूर कहि रोज्क मत्ता पेजे, अगटुर बक्तलिर यूदन अनि सीलन, ‘मीकुन सांति वायि’ इन्जेर आसिर्वाद सीसि, वूरकुन रोह्तुर्गा मल्सि सारि कीतेर.
34 *[बति सीलन अगने मंदना इंवल मत्ता.]
35 पव्लु अनि बर्नबल अंतियोकयतगने रेहे मासि, उंडे वेलेटिर लोकुरकुन पर्बुना चोकोट्ना कबुडुन बोदा करुसेर अनि पचर कीसेर मत्तेर.
पव्लु अनि बर्नबल पाके माय्वल
36 अद आता पेजे, “मरट बगबगते पर्बुना वचन पचर कीतटो, अव नगुक्ने सोन्जि, बक्तलिर बाव-बक्तितगा बहन बडे मासेर मंतेरेय सूड्कट” इन्जेर पव्लु बर्नबन सङा इत्तोर.
37 ते बर्नबल, “योहन-मार्क इंवन गिरे तम्वा तर्सो वोयना” इन्जेर पट पिय्सि मत्तोर.
38 बति पव्लु, “इदेन मुने, माकुन पंपुलिया येरियतगा नड्डुम सुटि कीसि सोत्तोर वोन, मरट इंके सङा वोय्वल चोकोट आयो” इन्जेर बर्नबन वेह्तोर.
39 इदेन हिंदल, पव्लुन अनि बर्नबन नड्डुम वेले गोस्टिङ आतङ.
ते वूर पाके मातेर.
बर्नबल योहन-मारकुन तंवा पेजेय वोसि, रूकतगा उच्चि सय्परस लंकते सोत्तोर.
40 सीलन तंवा तर्सो वोय्ले पव्लु आच्तोर.
ते पर्बुना पेर्मता-दया वूर सङा मंदना इन्जेर, अगटुर बक्तलिर बगवंतना केय्दे वूरकुन हव्लि कीतेर.
41 वूर* सिरिया, किलिकिया येरियनगा वेलिसेर अगा मंवलिक चर्चिनुरकुन, ‘मिरट बाव-बक्तितगा बडे मायन’ इन्जेर गटि-दीर्या सीसेर सोत्तेर.