पव्लु अनि सीलन सङा तिमोति सोंवल
16
1 अद आता पेजे, पव्लु देर्बे नगुडे सोत्तोर अनि अगटल लुस्त्रा नगुडे सोत्तोर.
अद लुस्त्रा नगुडे वोरोर तिमोति इंवल बक्तल मत्तोर.
वोना अवल बक्ति वाले यूदुल्क्ना जातिता वेय्लो अनि बाबो यूदुल्क्ना जातितोर आयोर.
अनि वोर बाबो ग्रीकु देस्नोर आंदुर.
2-3 लुस्त्रा अनि इकोनिया नगुक्नुर बक्तलिर्गटल तिमोति चोकोट्ना गवा अनि पोरोल कमय कीतोर आंदुर.
अदेन साटि, वोर पव्लु तंवा सङा तिमोतिन वोयना इन्जेर मत्तोर.
बति तिमोतिनोर बाबो यूदुल्क्ना जातितोर आयोर वोर इन्जेर सम्दिर यूदुलकुन टावा मत्ता काड्कि, पव्लु वूर साटि तिमोतिना तोल कत्रि कियुस्तोर.*
4 अनि वूर इविर, येरुसलेम्नगा अपोस्तुल्क अनि पेदोल्क निर्नय कीतङ अव सूचनङ पिय्सि ताकना इन्जेर, हर चहर्तुर बक्तलिरकुन वेह्चेर सोत्तेर.
5 इदेन हिंदल, बक्तलिर बरोसतगा बडे मासि, हर रोज चर्चिनुरा संके बडे मासेर सोत्ता.
मासिदोनिया वरा इन्जेर पव्लुन केय्वल
6 अस्के पव्लु अनि वोन सङा मंवलिर आसिया येरियतगा सोन्जि, बोदा वेह्कट इन्जि मत्तेर.
बति पवित्रा आत्मा वूरकुन रोकि कीता.
अदेन साटि, वूर पुर्गिया अनि गलतिया येरियन वीड्सि सोत्तेर.
7 अहन सोन्जेर मुसियता सिवतगा वासि, बितुनिया येरियतगा दाकोम इन्जेर कोसिद कीतेर.
बति उंडे गिर येसुना आत्मा अहन वूरकुन सोंदा सिय्मकि.
8 ते वूर मुसिया येरियतुन वीड्सि, त्रोयकु नगुडे सोत्तेर.
9 अगा मासिदोनियतोर वोरोर, “इगे मासिदोनियतगा वासि, माकुन मदत कीम्ट” इन्जेर जुल्मा कीतप अद नेटि रातुन पव्लुन उंदि दर्सन दिस्ता.
10 ते अद दर्सन वोन दिस्ता पेजे, वूरकुन चोकोट्ना कबुर पचर किय्ले बगवंतल केय्तोर इन्जेर ममोट निर्नय कीतोम.
* अनि येंटने मासिदोनिया येरियते सोंले तयर आतोम.
लूदियल येसुन पोरो बरोसा इर्वल
11 अद त्रोयकु नगुडल रूका उच्चि सड्कल समोत्रकेकु लंकतगा सोत्तोम.
अगटल दुस्रो नेटि नेयपोलि चहर्दे येव्तोम.
12 नेयपोलितल पेसिसि मासिदोनिया येरियता उंदि मुके नगुर पिलिपि येव्तोम.
अद नगुर रोम राज्नगा उंदि ईसा आसि मत्ता.
अद नगुडे ममोट कहि रोज्क मत्तोम.
13 आरम्ना दिवोसुन नेटि नगुडा पाटक वीड्सि, लविडुन करुम यूदुल्क्ना पार्तना किय्वल जागा मंदर इन्जि, सोत्तोम.
ते अगा पार्तना किय्ले, मीरे मातङ वेय्लोकुन सङा, येसुन बारेते वेह्वल मोदोल कीतोम.
14 अस्के अव वेय्लोकुन नड्डुम उंदि लूदिया इंवल बगवंतन पोरो बाव-बक्ति वाले वेय्लो मत्ता.
अद तुयतय्रा नगुडा आंद.
बारितङ रगल रङ्नङ कप्डिना बेपरि कीसेर मत्ता.
पर्बु ताना दिलतुन कोलि कीता काड्कि, अद अवेनगटल पव्लुनङ गोस्टिन वेले दिहंते केन्चेर मत्ता.
15 अद वेय्लो अनि ताना कुटुंबतुर गिरे बाप्तिस्मा येत्तेर.
अनि अद वेय्लो, “नना पर्बुन पोरो करल बक्ति वालेना इंद्किट्ते, ना रोन वासि मंट” इन्जेर माकुन बेय जुल्मा कीता.
पव्लुन अनि सीलन टानेतगा वाट्वल
16 उंदि दिया पार्तना किय्वल जागतगा ममोट सोन्जेर मनेके, उंदि दासि पेडि मुनेत्क वाता.
तान्गा बूत* सोप्रे मासि मत्ता काड्कि, अद पेडि बविसतुन बारेते जंत्रि वेह्चेर मंदु.
इदेन हिंदल, तानुर माल्कलिर वेले कोतङ कमय कीतेर.
17 अद पेडि पव्लुन अनि मा पेजेय वासेर, “वीर सर्वा सक्तिवंतल बगवंतनुर सेव्कलिर आंदिर.
वीर मिरट बहन बचे मांतिट इंवडुन* बारेते वेहंतेर” इन्जेर किलिसेर मंदु.
18 अहन वेले रोज्क किलिसेर मंवल कीनेके, पव्लु बेय वीटुन वासि, अद पेडिनेके तिरिसि, अद बूतुन सङा, “अद पेडिनल बह्रि वरा!
येसु किरिस्तुना पोरोडे नीकुन हुकुम सीसेर मंतोन” इन्जेर इत्तोर.
ते येंटने अद बूत बह्रि पेसिसि सोडिता.
19 बति अद पेडिनुर माल्कलिर तम्वा कमय किय्वल सक्ति वाले आय्तर सोडिता इन्जेर करि कीतेर.
अस्के पव्लुन अनि सीलन येरिसेर नाल्विर मीरे माय्वल जागतगा मंवलिर अदिकारिर मुने वोतेर.
20-21 अहन वोसि, “वीर यूदुल्क आंदिर.
मरट रोमियुल्क मानि किय्वट आतङ रीति-रिवज्क पिय्सि ताकना इन्जि करुसेर, नगुर पूरो गड-बड कीसेर मंतेर” इन्जेर नायदिकारिर मुने वेह्तेर.
22 अस्के अगा मंवल पर्जता गुब्डा पव्लु अनि सीलन पोरो मुच्लि अर्तेर.
अगा मंवलिर नायदिकारिर, “वूरङ पाङुक कुडुसि, बेड्डेने पायना” इन्जेर हुकुम सीतेर.
मोद्नगा गदिङ कीसि पव्लु अनि सीलनङ कालकुन अगा दोसुसि जेल्ते वाट्वल
23-24 वूरकुन सबुड पाता पेजे, “वीरकुन जेल्दगा वाट्सि, दिहंते निग्रन कीसेर मंदना” इन्जेर जेल्दोर अदिकारिन तस्वा किय्वलिर हुकुम सीतेर.
अदेन साटि, वोर अदिकारि पव्लु अनि सीलन जेल्दगा मंवलिक सम्दिन रोपोडा कम्रतगा वाटुस्तोर.
अनि उंदि मोदुन गदिङ कियुसि, वूरङ कालकुन अगा दोसुसि चीला पायुस्तोर.
25 लग-बग नड्डुम नर्का पव्लु अनि सीलल बगवंतन पार्तना कीसेर, कीर्तन्क वार्सेर मत्तेर.
अस्के जेल्दगा मंवलिर दुस्रुर केन्चेर मत्तेर.
26 अद गट्कते अचनक बेय डगुर बूकंप वाता.
ते जेल्दङ बुनदिङ हाले मासि, सम्दो कावक कोले मातङ.
जेल्दगा अर्सि मंवलिरकुन दोह्तङ सकलिङ नम्तङ.
27 अस्के वोर अदिकारिन चेव वाता.
ते जेल्दङ कावक सम्दो कोले मासि मंवल सूड्सि, जेल्दगा अर्सि मंवलिर सम्दिरे परर आतेर इन्जि, तल्वर्ते तंवा जीवा तनय येत्लेन आतोर.
28 बति पव्लु, “अरेरे, नीवा निमे नुक्सन किय्मा!
ममोट सम्दिरे इगेने मंतोम” इन्जेर जोर्ते वेह्तोर.
29 ते वोर अदिकारि डिवेङ तरुसि, तरा तरा आसेर रोपो वातोर.
अनि पव्लु, सीलनङ काल्क्नगा अर्तोर.
30 अद आता पेजे वूरकुन बह्रि वोसि, “गुरुजिर्निट!
नना बचे मायना इत्तेके, बतल किया लागर?”
इन्जेर पूसि कीतोर.
31 ते वूर, “येसु पर्बुन पोरो बरोसा इरा.
अस्के निमे अनि नीवा रोतुर गिर बचे मांतिट” इन्जेर वेह्तेर.
32 अस्के पव्लु अनि सीलल वोर अदिकारिन अनि वोना रोतुरकुन येसु पर्बुना चोकोट्ना कबुर वेह्तेर.
33 अद रातुन वूरकुन वोसि, वूरङ पुनकुन चक्ने नोर्तोर.
अस्के येंटने, वोर अनि वोना रोतुर सम्दिरे बाप्तिस्मा येत्तेर.
34 अद आता पेजे, वूरकुन तंवा रोन वोसि, जेवुन सीतोर.
वोर अनि वोना रोतुर सम्दिर गिरे बगवंतन पोरो बरोसा इर्वडुन हिंदल बेय कुसिते मत्तेर.
(अस्के वूर मल्सि जेल्दगा वातेर.)
35 इमुन नेटि सक्रे जेल्दगा वाटुस्तुर नायदिकारिर, “वूर इविरकुन सुटि कीम” इन्जेर जेल्दोर अदिकारिनगा सिपायिरा केय्दे कबुर सारि कीतेर.
36 ते वोर अदिकारि, “मी इविरकुन जेल्दल सुटि कीम्ट इन्जेर नायदिकारिर हुकुम जारि कीतेर.
इङे मिरट सांतिते चोकोटे सोंटु” इन्जेर पव्लुन अनि सीलन वेह्तोर.
37 बति पव्लु, “अहा!
ममोट रोमा लोकुर आंदुम.
तेर बति तस्वा किय्वक्ने, सम्दिर मुने माकुन पायुसि, जेल्दगा वाटुस्तेर.
अनि इंके मक्डिते रोह्ले सूड्सेर मंतेर.
ममोट वोपोम.
वूरे कुद वासि, माकुन सुटि कियुसि बह्रि वोया लागर” इन्जेर वेह्तोर.
38 ते इद गोस्टितुन वूर सिपायिर वूर नायदिकारिर्गा सोन्जि वेह्तेर.
ते पव्लु अनि सीलल रोमा लोकुर* आंदिर इन्जेर केन्चि, वूर बेय वेरितेर.
39 अदेन साटि वूर तस्वा किय्वलिर अदिकारिर वासि, “माकुन मापि कीम्ट” इन्जि, जेल्दल बह्रि तेंड्तेर अनि, “इद नगुडुन सुटि कीसि सोंट” इन्जेर पव्लु, सीलन जुल्मा कीतेर.
40 जेल्दल पेसिसि वूर लूदियना रोन सोत्तेर.
अगटुर बक्तलिरकुन बेटे मासि, बगवंतना बाव-बक्तितगा बडे माय्वलिक गोस्टिङ वेह्तेर अनि गटि-दीर्या सीसि अगटल सोत्तेर.