तेसलोनिका नगुडे दुक्सङ बोगे माय्वल
17
1 वूर पव्लु अनि सीलल, अंपिपोलि अनि अपोल्लोनिया नगुकनल वीड्सि, तेसलोनिका इंवल मुके नगुडे सोत्तेर.
अगा उंदि यूदुल्क्ना सुनगोग मत्ता.
2 तंवा आदतुन पिय्सि, पव्लु अद सुनगोग्नुर्गा सोन्जि, मूंद आरम्नङ दिवोस्क वेरि दर्मा-ग्रंत्नङ वेले गोस्टिना चर्चा कीतोर.
3 अनि किरिस्तु दुक्सङ येच्चि, सासि-नेंडा लागर इंवलिक तोत्तङ वचनकुन पूरि कीतोर वोर, “वेर येसुये किरिस्तु* आंदुर इन्जि मीकुन वेह्चेर मंतोन” इन्जेर इत्तोर.
4 अद केन्चि कहितुर वोप्तेर.
वीर्गटल वेलेटिर बगवंतन पोरो बाव-बक्ति वालिर ग्रीकु देस्नुर मत्तेर.
अनि चोकोट्ना पोरोल कमय कीतङ वेय्लोक गिर वेले मत्तङ.
वीर सम्दिर गिर पव्लु अनि सीलना बाजुन आतेर.
5 बति कहितुर यूदुल्क कुटा कुटा आतेर.
बाजर्कनल पुलेगांडलिरकुन मीरि कीसि, अद नगुडे गड-बड किय्वल मोदोल कीतेर.
पव्लु अनि सीलन बहन तेर बति, अद नगुडेर अदिकारिर मुने वोकट इन्जेर कोसिद कीसेर, वूर मंवल यासोंता रोतगा मुच्लि अर्तेर.
6-7 अगा वूर दिस्वा सोन्जि, यासोंतुन अनि कहितुर दुस्रुर बक्तलिरकुन येरिसेर नगुडुर अदिकारिर मुने वोतेर.
अहन वोसि, “दुनियतुन उल्टा-पल्टा किय्वलिर इगे गिर वातेर.
वीरकुन यासोन तंवा रोन इर्तोर.
सीजर महा राजले आय्वा, येसु इंवल दुस्रोर राजल माकुन मंतोर इन्जि वेह्चेर, वोर महा राजना कानुंतुन उल्टा ताक्सेर मंतेर” इन्जेर जोर्ते किलिसेर सम्दिरकुन वेह्तेर.
8 अद केन्चि पर्जता गुब्डा अनि नगुडुर अदिकारिर बेय सोङुन वासि, तकपिका आतेर.
9 अद आता पेजे अदिकारिर, यासोन अनि अगटुर बक्तलिरा केय्दे जुर्मना दोहुसि, वूरकुन सुटि कीतेर.
बेरया चहर्ते तक्लिब येत्वल
10 येंटने अद नेटि रातुन कहितुर बक्तलिर मीरे मासि तेसलोनिकतल पव्लुन अनि सीलन बेरया चहर्ते सारि कीतेर.
ते वूर अगटा यूदुल्क्ना सुनगोग्नगा सोत्तेर.
11 तेसलोनिकतगा मंवलिरकुन तेर बेरयतुर चोकोट्ना बुदि वालिर आता काड्कि, पव्लु, सीलल वेह्ता बोदतुन केन्ज्ले पर्पेडे मांदिर.
अनि हर रोज वूर वेह्तङ गोस्टिङ बरोबर मंतङ कि सेलेङ इन्जेर दर्मा-ग्रंतुन वाचि कीसि, परिक्सा कींदिर.
12 अदेन साटि अगटुर वेलेटिर बक्तलिर आतेर.
वूर बक्तलिर्गटल ग्रीकु देस्नुर मुके वेय्लो-माय्नलिर वेलेटिर मत्तेर.
13 बति बेरया चहरतगा गिरे पव्लु बगवंतना वचन पग्रि कीसेर मंतोर इन्जेर तेसलोनिकतुर यूदुलकुन करे माता.
ते वूर अगा सोन्जि, पर्जतङ गुब्डन गड-बड किय्ले हक्लि कीतेर.
14 अस्के येंटने, अगटुर बक्तलिर पव्लुन सम्दुर्ता डर्डिते सारि कीतेर.
बति सीलल अनि तिमोति बेरया चहर्दगने मत्तेर.
15 अहन वूर पव्लुन सारि कीसेर येतेंस नगुर वेरि सोत्तेर.
अस्के, “तिमोतिन अनि सीलन वेय्ने नह्गा सारि कीम्ट” इन्जेर पव्लु हुकुम सीता पेजे, वूरकुन सारि किय्ले, वूर बक्तलिर मल्सि बेरया चहर्ते सोत्तेर.
येतेंस नगुडुर सङा वड्क्वल
16 पव्लु येतेंस नगुडे सोन्जि, सीलन अनि तिमोतिन साटि सूड्सेर मत्तोर.
अद नगुर पूरो पेन्क्नङ मूर्तिने निन्चि मत्ता.
अद सूड्सि पव्लुना दिल्ते बेय दुक्सा लाग्ता.
17 अदेन साटि, पव्लु सुनगोग्नगा वाय्वलिर यूदुल्क अनि बगवंतन पोरो बाव-बक्ति वालिर यूदुल्क आयुर वूर सङा अनि हर रोज पर्जा मीरे माय्वल जागतगा मंवलिर सङा गिर चर्चा कीसेर मंदुर.
18 अहन येपिकुरियुल्क अनि इस्तोयुल्क* इंवलिर्गटल कहितुर गियन वालिर सङा गिरे, इव गोस्टिना तगपर लाग्ता.
ते कहितुर जन्क, “वेर टापुर तोडितोर बतङ वेहंतोर रा?”
इन्जेर इत्तेर.
पव्लु, येसुन बारेते अनि वोर नेंड्वडुन बारेते चोकोट्ना कबुर पचर कीतोर.
अदेन हिंदल कहितुर, “वेर बदेय टावा सेले अद पेंदुन बारेते, पचर कीसेर मंतोर” इन्जेर इत्तेर.
19-21 येतेंस्नुर अनि अगा मंवलिर दुस्रो देस्नुर गिर पूनङ पूनङ गोस्टिङ केन्ज्ले अनि वड्क्ले वेले पसंद कींदिर.
अदेन साटि, वूर सम्दिर पव्लुन तम्वा सङा अद नगुडा अरियोपगु इंवल पन्चद उद्वल जागतगा वोसि, “निमे पूना बोदा करुस्वल केन्ज्तोम.
आतल बोदतुन बस्केन केन्ज्मकि.
अदेन साटि अद बोदतुन बारेते माकुन सम्जे मानल वेहा” इन्जेर पूसि कीतेर.
करे मायोर वोर बगवंतन साटि इन्जेर लिहि कीता बोव्लतुन पव्लु सूड्वल
22 ते पव्लु तेच्चि, अरियोपगु इंवल पन्चद्नुर मुने निल्सि, “येतेंस्नुर लोकुर्निट!
मिरट सम्दो रीति-रिवज्क पिय्सि, बाव-बक्तिते ताक्सेर मंतिट इंवल नना सूड्सेर मंतोन.
23 नना मी नगुडगा तिरिसेर, मीवङ पेनकुन दिहंते सूड्सेर सोनेके, अस्क्वलिक बोव्लङ वेले दिस्तङ.
अवेनगटल उंदि बोव्लतगा ‘टावा सेलोर वोर बगवंतन साटि’ इन्जेर लिहि कीसि मंता.
अदेन साटि, मीकुन टावा सेल्वक्ने बोना पार्तना-विंति अनि पूजा कीसेर मंतिटो, वोर बगवंतन बारेतेन मीकुन पचर कीसेर मंतोन.
24 दुनियतुन अनि तान रोपोडङ सम्दोन गडि कीतोर बगवंतल तनय हाबडुन अनि बोमितुन माल्कल आता काड्कि, वोर माय्नना केय्दे दोह्तङ मंदिर्क्नगा मनोर.
25 वोर बगवंतल, सम्दिरकुन परन अनि हूकुर येत्ले वडि सिय्वल आंदुर.
अदेन साटि, तनकुन बततय कमि मंता इन्जेर माय्नना केय्दा सेवा कियुस्वल आयोर.
26 अनि पूरो दर्तुरित पोरो जिन्गनि कीसेर मंले, वोरोर माय्ननगटल हरियेक जातितुरकुन निव्डि कीतोर.
वूर सम्दिर साटि पिस्वलिक कालम्क, मंवलिक देस्क्नङ सिवङ मुनेने नेमि कीतोर.
27 बारितेके इदेन सूड्सि तेर, तनकुन मह्क्सि, वूर लोकुर करि कीनिर इन्जेर वूरकुन उंदि मोका सीतोर.
बति करल करल सूड्तेके, बगवंतल मा सम्दिरकुन करुमे मंतोर.
28 बगवंतन हिंदले मरट पिसंतट, ताकंतट अनि इहिन मंतट.
मिह्गटल कहितुर गुरुर* वेह्तप, ‘मरट सम्दिर गिरे वोना संतान आंदट.’
29 “अदेन साटि मरट बगवंतना संतान आततुन हिंदल, माय्नलिर तम्वा सोन्च-विचरदुन पिय्सि, केय्दे निव्डि कीतङ सोने, कूरा अनि बंडतङ मूर्तिनङ गुन-गानकुन दात्नोरे बगवंतल इन्जेर सोन्च किय्वा.
30 तोत्तुर पिसलिरा कालम्क्नगा बगवंतल सूड्सि सूड्मकि इत्तप मत्तोर.
बति इंके दुनियतोर हर वोरोर कीता पापुन कब्ले मायना इन्जेर हुकुम सीसेर मंतोर.
31 बारितेके बगवंतल तना नेमि कीतोर वोना केय्दे नियतुन पिय्सि, दुनियतोर हर वोरोन तस्वा किय्वल उंदि दिनम टरि कीतोर.
बगवंतल वोर नेमि कीतोन मरंतल नेंडुसि, उंदि गवा इर्तोर” इन्जेर वेह्तोर.
32 मरंतल नेंडुस्तोर इंवल गोस्टि केन्चि कहितुर चेडि कीतेर.
बति उंडे कहितुर, “निमे वेह्वल उंडे उंदि जोका केन्जंतोम” इन्जेर इत्तेर.
33 अद आता पेजे, वूर नड्डुमनल पव्लु सोडितोर.
34 बति वूर्गटल कहितुर बक्तलिर आतेर.
बक्तलिर आतुर्गटल अरियोपगु इंवल पन्चद्नोर दियोनूसियल, दमरि इंवल उंदि वेय्लो अनि वीर बरोबर उंडे कहितुर गिर मत्तेर.