कोरंतितगा चोकोट्ना कबुर पचर किय्वल
18
1 अद आता पेजे, पव्लु येतेंसनल कोरंति नगुडे सोत्तोर.
2 कलव्दिया महा राजल रोम नगुडल यूदुल्क सम्दिरकुन पेसिसि सोडियट इन्जेर हुकुम सीतोर.
अदेन साटि, पोंतु येरियतोर अकुलल तंवा वेय्लो पिरिस्किलन पिय्सि, इटलि देसनल पूना-पूनि कोरंति वातेर.
वोर अकुला इंवल यूदुल्क्ना जातितोन पव्लु बेटे मातोर.
3 अहन बेटे माता पेजे, तंवा दाते वूर डेरङ कोट्वलिर आता काड्कि, पव्लु गिर वूर बरोबर काम कीसेर, पिसेर मत्तोर.
4 हर आरम्ना दिवोसुन नेटि सुनगोग्नगा सोन्जि, यूदुल्क अनि ग्रीकु देस्नुर सङा चर्चा कीसेर, वोपुस्ले कोसिद कींदुर.
5 बति मासिदोनियतल सीलल अनि तिमोति वाता पेजे, पव्लु तंवा पूरो टेमुन, बगवंतना वचन पचर किय्ले वाप्रि कीतोर.
अनि यूदुलकुन, येसुये किरिस्तु आंदुर इन्जेर निरुपन कीसि, तोह्चेर मत्तोर.
6 बति कहितुर यूदुल्क मर्ला बड्सि, राङि सीतेर.
ते पव्लु तंवङ कप्डिङ जडि कीसि,+ “मीकुन बचि किय्वल इद गोस्टितुन नम्वेके, मीकुन वाय्वल सिक्सतुन नना जिमेदारना आयोन.
इङेडल यूदुल्क आयुर वूर्गा सोन्जि, बगवंतना बोदा वेहंतोन” इन्जेर इत्तोर.
7 अस्के अद सुनगोगनल पेसिसि, तान बाजुन मंवल तीतियु यूस्तु इंवल बगवंतन पोरो बाव-बक्ति वालेना रोन सोत्तोर.
8 अद सुनगोग्नोर मुके अदिकारि किरिस्पु अनि वोना रोतुर पर्बुन नम्सि बक्तलिर आतेर.
अहन पव्लुना बोदा केन्चि, कोरंतितुर वेलेटिर पर्बुन नम्सि, बाप्तिस्मा येत्तेर.
9-10 पव्लुन उंदि दियता रातुन पर्बु दर्संते दिसि, “इद नगुडुन रोपो, नावुर पर्जा वेलेटिर मंतेर.
अदेन साटि निमे दब मन्मा.
वेरिवक्ने ना बोदा पचर कीसेर मन.
नना नीकुन सात मंदंतोन.
नीकुन बोरे बतय नुक्सन किया परुर” इन्जेर वेह्तोर.
11 अदेन साटि पव्लु डेडा साल (18 महिनङ) वेरि बगवंतना बोदा करुसेर अगन मत्तोर.
12 अकया येरियतगा गलियो इंवल गवर्नर मनेके, यूदुल्क उंदि आसि पव्लुन पोरो उल्टा तेत्तेर.
अनि तस्वा किय्ले कचुरितगा वोसि, वोन निपुस्तेर.
13 अनि, “मा दर्मता कानुंतुन उल्टा बगवंतन पार्तना-विंति किय्ले पर्जतुन वेर वोपुसीसेर मंतोर” इन्जेर गवर्नरतुन वेह्तेर.
14 पव्लु वड्क्ले आनेकेन, वोर गलियो, “यूदुल्क्ना जातितुर्निट!
बेय डगुर गल्ति किय्वले आयि, मोसेम किय्वडुन बारेतेन आयि, इद गोस्टि मत्तेके, इगे तस्वा किय्वल बरोबर आंद.
15 बति मी यूदुल्क्ना बोदतुन बारेतेन आयि, पोरोल्क अनि मीवा दर्मता कानुंतुन बारेतेन आयि मत्तेके, मीवा मिरट सूड्सि येतट.
ईतङ गोस्टिन तस्वा किय्ले नना वोपोन” इन्जेर वेह्तोर.
16 अनि वूर सम्दिरकुन तंवा कचुरितल पूडि सीतोर.
17 अस्के वूर यूदुल्क सुनगोग्नोर मुके अदिकारि सोस्तेनेसुन* गवर्नर्ता कचुरित मुनेने पातेर.
तेर बति, वोर गवर्नर गलियो पटि किय्मकि.
अंतियोकयतगा मल्सि वाय्वल
18 पव्लु कोरंतितगा उंडे वेले रोज्क मत्ता पेजे, अगटुर बक्तलिरकुन दांतोन इन्जेर वेह्चि, पिरिस्किलन अनि तानोर माड्सो अकुलन तंवा सङा पिय्सि, केंकेरियतगा सोत्तोर.
अगा तना वोप्सि मत्ता अद, मोक कंडि किय्ले तंवा तला बोडि कियुस्तोर.
अनि रूकते सिरिया येरियते सोत्तोर.
19 अहन एपेस्नगा येव्ता पेजे, पिरिस्किलन अनि अकुलन सुटि कीसि, पव्लु वोरोरे अगटा सुनगोग्नगा सोन्जि, यूदुलकुन सङा चर्चा कीतोर.
20 ते वूर यूदुल्क, “उंडे कहि रोज्क मा सङन मन” इन्जेर कोर्तेर.
अस्के मंदंतोन इन्जेर वोप्मकि.
21 बति “उंदि मोका बगवंतना इचा मत्तेके, उंदुंदि जोका मिह्गा वांतोन” इन्जेर वेह्चि एपेसनल रूकते पेसितोर.
22 अहन सिजरियता रूकङ आग्वल जागतगा रेय्सि, अगटल येरुसलेम सोत्तोर.
अनि अगटा चर्चितुरकुन चोकोट-वायुट पूसि कीसि, अगटल अंतियोकया सोत्तोर.
23 अंतियोकयतगा कहि रोज्क मन्जि, अगटल पेसिसि गलतिया अनि पुर्गिया येरियनगा तिरिसेर, अव जागनगा मंवलिर बक्तलिरकुन गटि-दीर्या सीसेर सोत्तोर.
अपोलो एपेस्नगा सोंवल
24 अद गट्कते अपोलो इंवल यूदुल्क्ना जातितोर एपेस नगुडे सोत्तोर.
वोर ईजिप्ट देस्ना अलेग्जांड्रिया नगुडोर आंदुर.
वेर दर्मा-ग्रंतुन मुपट कीतोर वोर गियन वाले आंदुर.
25 पर्बुना बक्तिता सरदुन बारेते करि कीतोर आंदुर.
वोर बेय जोस्ने येसु पर्बुन बारेतङ गोस्टिङ मत्ता तीर बोदा कीसेर मत्तोर.
बति सिरिप वोन, योहन* सीता बाप्तिस्मतुन बारेतेन टावा.
26 बस्केते अकुलल अनि पिरिस्किलल वोर अपोलो सुनगोग्नगा दर्यम्ने बोदा वेह्वल केन्ज्तेरो, अस्के वोन तम्वा रोन वोसि, बगवंतना सरि-मारगुन करल करल मत्ता तीर पोडि कीसि वेह्तेर.
27 अद आता पेजे, अपोलो अकया येरियते सोंदना इन्जेर इचा कीतोर.
अपोलोन चोकोट सूडट इन्जेर एपेस्नुर बक्तलिर चिटि लिहि कीसि अकयतुर बक्तलिर्गा सारि कीतेर.
अगा सोन्जि बगवंतना पेर्मता-दयते बक्तलिर आतुरकुन वोर वेले मदत कीतोर.
28 बहन इत्तेके, उजगिरि सम्दिर सूड्नेके यूदुलकुन सङा तगपर लाग्सि, दर्मा-ग्रंत्नगा लिहि कीतन पिय्सि, येसुये किरिस्तु आंदुर इन्जेर वूरकुन निरुपन कीसि, तोह्चेर मत्तोर.