कोर्नेलि पेतुरतुन केयुस्वल
10
1-2 सिजरिया नगुडे, इटलिता सिपायिरा दलम्नोर कमंडर* कोर्नेलि इंवल बक्तल मत्तोर.
वोर अनि वोना कुटुंबतुर बगवंतन पोरो वेले बाव-बक्तिते मंदिर.
वोर कमंडर गरिब यूदुलकुन वेले दान-दर्मा कीसेर, बस्केट बगवंतन पार्तना कीसेर मंदुर.
3 उंदि दिया दुपरि मूंद नेक्नेके+ वोर पार्तना कीसेर मत्तोर.
अस्के बगवंतनोर दूतल दर्संते वोन तात्कर दिसि, “कोर्नेलि!”
इन्जेर केय्तोर.
4 ते कोर्नेलि वेरिसि, “बतल पर्बु?”
इन्जेर पूसि कीतोर.
अस्के दूतल, “निमे इंके वेरि कीतङ पार्तनङ अनि दान-दर्मतङ काम्क बगवंतना चर्नते निवोदुन दात येव्तङ.
5 इंके निमे कहितुरकुन योप्पेकु चहर्दे सारि कीसि, सीमोन इंवल पेतुरतुन केयुसा.
6 वोर पेतुरु तोल्दे वस्तुङ तयर किय्वल सीमोंता रोन वेर्तल आसि मंतोर.
सीमोंता रोन सम्दुर्ता डर्डितगा मंता” इन्जेर कोर्नेलिन वेह्चि, दूतल सोडितोर.
7 वोर दूतल सोडिता पेजे, कोर्नेलि, तंवा रोतगा सेवा किय्वलिर इविरकुन अनि रोन केप्वलिर्गटल बाव-बक्तिते मंवल वोरोन केय्तोर.
8 अनि जर्ग्ता गट्ना सम्दो वेह्चि, वूरकुन योप्पेकु चहर्दे सारि कीतोर.
पेतुरतुन बगवंतल दर्सन तोह्वल
9 दुस्रो नेटि लग-बग बार दुपरि वूर योप्पेकु चहरदुन करुम येव्तेर.
अदे वकत्ने पेतुरु पार्तना किय्ले मिदेतगा सोत्तोर.
10 पेतुरतुन कर्वस्ता काड्कि, वोर तिंले सूड्सेर मत्तोर.
रोतुर अट्सेर मनेके, वोन उंदि दर्सन दिस्ता.
11 अद दर्संतगा हाबर तेरिसि, पोरोडल उंदि पेराजति दुपटितङ नालुङ मूलङ लिम-लोम आसि, दर्तुरितगा रेय्वल सूड्तोर.
पेराजति पड्दत रोपो जिव्रस लिम-लोम आसि बूड रेय्वल
12 तान रोपो दर्तुरित पोरो मंवलिक सम्दो तीर्क्नङ नालुङ काल्क्ना जिव्रस, मेंदोडे पर्केडे माय्वल जिव्रस, वडिदे परिवल पिटे-पुरड दिस्तङ.
13 वोर अवेन सूड्सेर मनेके, “पेतुरु!
तेच्चि, जक्सि तिन” इन्जेर उंदि लेङ केन्जा वाता.
14 ते पेतुरु, “एहे, वटिन पर्बु!
मा यूदुल्क्ना दर्मतुन पिय्सि, बे-सुदुड इंवलिकुन बस्केन तिन्मकि” इन्जेर जवब सीतोर.
15 अस्के, “बगवंतल सुदुड कीतङ अवेन बहन बे-सुदुड वालेक इंति?”
इन्जेर अद लेङ उंदुंदि जोका केन्जा वाता.
16 अहन मूंद जोकङ जर्ग्ता.
अस्के येंटने अद पेराजति दुपटि हाबडेके ताच्चि सोत्ता.
17 अस्के पेतुरु अद वाता दर्संता बाव बतल मंदर बेहे इन्जेर तंवा तना सोन्च कीसेर मत्तोर.
अस्केने कोर्नेलि सारि कीतुर वूर, सीमोंता रोता पता करि कीसि, रोता पाटकुन मुने वासि आग्तेर.
18 अनि रोतुरकुन केय्सि, “सीमोन इंवल पेतुरु मीवय रोन वेर्तल आसि मंतोर कि?”
इन्जेर पूसि कीतेर.
19 अस्के पेतुरु उंडे गिर अद दर्संतुन बारेतेन सोन्च कीसेर मत्तोर.
बगवंतना आत्मा, “नी साटि मुविर माय्नलिर मह्क्सेर मंतेर.
20 वूरकुन ननय सारि कीता काड्कि, बूड रेय्सि, अनमिना आय्वक्ने वूर सङा सोन” इन्जेर वेह्ता.
21 अस्के पेतुरु बूड रेय्तोर अनि वूर्गा सोन्जि, “मिरट मह्क्वना ननय आंदुन.
बतत साटि वातिट?”
इन्जेर पूसि कीतोर.
22 ते वूर, “कोर्नेलि इंवल कमंडर माकुन सारि कीतोर.
वोर नियत्नोर अनि बगवंतन पोरो बाव-बक्ति वाले आंदुर.
यूदुल्क्ना जातितुर वोन वेले मानि कींतेर.
नीकुन तंवा रोन केयुसि, निमे वेह्वलिक गोस्टिङ केन्जना इन्जेर बगवंतनोर दूतल वोर कमंडरतुन हुकुम सीतोर” इन्जेर वेह्तेर.
पेतुरु कोर्नेलिना रोन सोंवल
23 अस्के पेतुरु, वूरकुन रोपो केय्सि, मान-पान कीतोर.
अनि दुस्रो नेटि सक्रेन तेच्चि, वूर सङा सोत्तोर.
योप्पेकु चहर्दुर कहितुर बक्तलिर गिर वूर बरोबर सोत्तेर.
24 इमुन नेटि सिजरिया नगुडे येव्तेर.
अहन येवन मुनेने, कोर्नेलि तंवुर चुटल-बंदुन अनि मुके सोप्तलिरकुन तंवा रोन केयुसि पेतुरतुन साटि सूड्सेर मत्तोर.
25 पेतुरु, रोन नेङ्ले आनेकेने कोर्नेलि मुनेत्क सोन्जि, पेतुर्तङ कालकुन मुने मुर-टोङ्रङ कोट्सि, दंडोस दोस्तोर.
26 बति पेतुरु, वोन तेह्चेर, “तेदा दादा!
नना गिर नी दात्नोर माय्ननय आंदुन” इन्जेर कोर्नेलिन इत्तोर.
27 अनि वोन सङा वड्क्सेरेन पेतुरु रोपो नेङ्तोर.
अस्के वेलेटिर लोकुर अगा मीरे मासि मंवल सूड्तोर.
28 अस्के पेतुरु, “यूदुल्क्ना जातितोर, दुस्रो जातितोन सङा मंवल अनि इट्वल तप इन्जेर मी सम्दिरकुन टावये.
बति बोरे माय्नन बे-सुदुड वाले इंवा इन्जि, बगवंतल नाकुन तोह्तोर.
29 अदेन साटि, कब्रियलिरकुन रोह्ति अस्के, नना बतय इंवक्ने वातोन.
इंके नाकुन बारि केयुस्तियो वेहा?”
इन्जेर पूसि कीतोर.
30 अस्के कोर्नेलि, “नालुङ रोजकुन मुने दुपरि मूंद नेक्नेके* पार्तना कीसेर मत्तोन.
अस्के अचनक बेय दव्रलिक कप्डिङ केर्सि, वोरोर मायनल ना बग्ला निल्तोर.
31 अनि ना सङा, ‘कोर्नेलि!
नीवङ पार्तनङ अनि दान-दर्मतङ काम्क बगवंतना चर्नते निवोदकुन दात येव्तङ.
32 अदेन साटि निमे कहितुरकुन योप्पेकु चहर्दे सारि कीसि, सीमोन इंवल पेतुरतुन केयुसा.
वोर पेतुरु तोल्दे वस्तुङ तयर किय्वल सीमोंता रोन वेर्तल आसि मंतोर.
वोर सीमोंता रोन सम्दुर्ता डर्डितगा मंता’ इन्जेर वेह्तोर.
33 अस्के येंटने नीकुन केयुस्ले सेव्कलिरकुन रोह्तोन.
निमे वाता काड्कि, चोकोट आता.
ममोट इंके, बगवंतना चर्नते उच्चि मंतोम.
पर्बु नीकुन बतल हुकुम सीनुर अद माकुन वेहा.
ममोट केन्ज्ले तयर मंतोम” इन्जेर कोर्नेलि पेतुरतुन वेह्तोर.
पेतुरु बगवंतना बोदा वेह्वल
34-35 अस्के पेतुरु, “बगवंतल बोने बेद-बाव सूड्वल आयोर.
इदेन बद्लि हर जातितल बूर्ते बगवंतना वेरेते, बाव-बक्तिते अनि नायम्ने ताकंतेरो, वूरकुन वोपंतोर इन्जेर इंके नाकुन करल अर्तम आता.
36 येसु किरिस्तुना केय्दे बगवंतल सांतिता चोकोट्ना कबुर इज्रयेल लोकुरकुन सारि कीसि, पचर कीतोर.
वोरे सम्दिरोर पर्बु आंदुर.
37-38 योहन बाप्तिस्मतुन बारेते पचर कीता पेजे, गलिलयतल ते यूदया वेरि अद गोस्टि पग्रे माता.
अद बतल इत्तेके, नजरेतु चहर्तोर येसुन बगवंतल नेमि कीसि, वोन्गा पवित्रा आत्मा अनि सक्ति बर्पुर वेडितोर.
बगवंतल वोन सात मत्ता काड्किने, येसु तिरिसेर, चोकोट्नङ काम्क अनि सय्तंदा अदिकारदुन बूड मंवलिरकुन चोकोट कीतोर इंवलिक सम्दो, मीकुन टावये.
39 यूदुल्क्ना देस्नगा अनि येरुसलेम्नगा वोर कीतङ कामकुन ममोटे गवा मंतोम.
वूर वोन मोद्नगा मोलने पासि जक्तेर.
40 बति बगवंतल मूंद रोज्क्ने वोन नेंडुसि, दिसनल कीतोर.
41 पर्जा सम्दिरकुन दिस्ले आयो बति, बगवंतल मोदोल नेमि कीतुर गवदार्क आय्वलिर माकुने दिस्तोर.
अनि वोर नेंड्ता पेजे, वोन सङा उट्टोम-तितोम.
42 इदे आय्वा, बगवंतल पिसि मंवलिर अनि सानलिर सम्दिर पोरो नायदिकारिन दात वोर येसुन नेमि कीतोर.
इदेन बारेते, सम्दिरकुन गवा वेह्चेर, चोकोट्ना कबुर पचर कियना इन्जेर माकुन हुकुम सीतोर.
43 येसुन पोरो बरोसा इर्वलिरकुन वोना पोरोडुन पिय्सि, पाप्क्ना मापि पुटंता इन्जि, पर्वक्तलिर गवा सीतेर” इन्जेर वूरकुन वेह्तोर.
यूदुल्क आयुर वूर्गा पवित्रा आत्मा रेय्वल
44 अहन पेतुरु वेह्चेर मनेकेने, अद बोदा केन्च्तुर सम्दिर पोरो पवित्रा आत्मा रेय्ता.
45-46 अद सक्तिते यूदुल्क आयुर वूर दुस्रोक दुस्रोक बासने वड्क्सेर, बगवंतन डगुर-पान सीसेर मत्तेर.
इहिन यूदुल्क आयुर वूर पोरो गिर पवित्रा आत्मा रेय्वल सूड्सि, पेतुरतुन सङा वातुर यूदुल्क्ना जातितुर बक्तलिर गुल आतेर.
47 अस्के पेतुरु, “मा दाते, वीर पोरो गिर पवित्रा आत्मा रेय्ता.
ते येते बाप्तिस्मा येत्वक्ने बोरे आपुसा परनिर कि?”
इन्जि,
48 “येसु किरिस्तुना पोरोडे बाप्तिस्मा येतट” इन्जेर हुकुम सीतोर.
अद आता पेजे, “मा सङा कहि रोज्क मंदना” इन्जेर पेतुरतुन वूर कोर्तेर.