सम्दुर्तल वेरिनल मंवल जंवर बह्रि वाय्वल
13
1 अस्के वेरिनल मंवल उंदि जंवर सम्दुर्तल बह्रि वाय्वल सूड्तोन.
तान येडुङ तलङ, दहा कोह्क अनि अव कोहकुन पोरो दहा चुडुक किरिट्क मत्तङ.
तानङ तलन पोरो बगवंतन रेह्चि वड्क्वलिक पोरोल्क मत्तङ.
2 नना सूड्तोन अद जंवर चीतडतुन मोडि मत्ता.
तानङ अरिकाल्क येड्ज्नङ अरिकालकुन मोडि मत्तङ.
ताना तोड्डि चिहोता तोड्डित मोडि मत्ता.
अद मारेल्क वाले मासुल इद जंवरतुन तंवा ताकद, तंवा कचुरि अनि तंवा डगुर अदिकार सीता.
3 ताना उंदि तलदुन तल्वर्ते सानल दन्का लाग्सि, पुन आसि मत्ता.
बति अद पुन मग्ता.
ते दुनियतुर सम्दिर अद जंवरतुन गुल आसि सूड्सेर, तान पेजेय सोन्जेर मत्तेर.
4 अद जंवरतुन अदिकार सीता काड्कि, अद मारेल्क वाले मासुडुन पूजा कीतेर.
अनि वूर, “इद जंवरतुन दात बोरे मंतेर कि?
तेन सङा बोरे लडेय किया परनिर कि?”
इन्जेर तान काल्क कर्तेर.
5 अद जंवर गर्वते वड्क्ले, बगवंतन रेह्चि वड्क्ले अनि चालिस रंड (42) महिनङ तंवा अदिकार ताकुसन साटि, तान वकत सिय्वल जर्ग्ता.
6 ते बगवंतन, वोना पोरोडुन, वोर मंवल जागतुन अनि स्वर्ग्नगा मंवलिरकुन रेह्चि वड्क्वल सुरु कीता.
7 अनि बगवंतनुर बक्तलिर सङा लडेय किय्ले अनि वूरकुन मेय्ले गिर तान अदिकार सिय्वल जर्ग्ता.
अचोरे आय्वा हर जातितुर पोरो, हर पर्जत पोरो, हर बासतुर पोरो अनि हर देस्नुर पोरो तान अदिकार सिय्वल जर्ग्ता.
8 इद दर्तुरितगा मंवलिर सम्दिर अद जंवर्ता पूजा कींतेर.
बति कलि गडे मातगटल सुरु कीसि, बगवंतना गोरे पिला आसि, नेतुर सीतोना जीवता ग्रंत्नगा पोरोल्क लिहि कीसि मंवलिर मात्रम, ताना पूजा कियुर.
9 अर्तम कीका इंवल दिहंते केन्जना!
10 बोर्ते कोंडे माय्वल मत्तोरो,
वोर कोंडे मांतोर.
बोर्ते तल्वर्ते साय्वल मत्तोरो,
वोर तल्वर्ते सांतोर.
अदेन साटि बगवंतनुर बक्तलिर्गा वोर्च्वल गुन अनि बरोसा मंदा लागर.
उंडे उंदि वेरिनल मंवल जंवर
11 अस्के उंडे उंदि जंवर बोमित रोपोडल बह्रि वाय्वल सूड्तोन.
तान गोरे पिलतङ कोहकुन मोडि रंड कोह्क मत्तङ.
मारेल्क वाले मासुडुन मोडि ताना लेङ मत्ता.
12 इद जंवर, मोदोडा वाले सानल दन्का लाग्सि चोकोट आता अद जंवर्ता अदिकार पूरो वाडकम कीसि, दर्तुरि अनि तान्गा मंवलिर सम्दिर मोदोडा वालेता पूजा कीनल कीता.
13 इद जंवर डगुक मय्मतङ निसनिङ कीसेर मत्ता.
बातङ इत्तेके लोकुर सूड्नेके, हाबडल दर्तुरित पोरो तड्मि गिर, रेय्सि वानल कीसेर मत्ता.
14 इद जंवर्ता केय्दे मोदोडा वाले जंवरतुन बद्लि, मय्मतङ निसनिङ किय्ले अदिकार सिय्वल जर्गंता.
इद अदिकार्दे दर्तुरित पोरो मंवलिरकुन अद पसि कींता.
तल्वर्ते गायल आसि गिर पिसि मंवल जंवर्ता मांदुन साटि, उंदि पुत्ला निव्डि कियना इन्जेर लोकुरकुन आगे सींता.
15 अदे आय्वा, अद जंवर्ता पुत्लतुन जीवोडा अरुसि, अद वड्कनल किय्वल अनि अद पुत्लता पूजा कियुर वूर सम्दिरकुन जक्लेक गिर तान अदिकार सिय्वल जर्ग्ता.
16 इदे आय्वा, चुडुक-डगुक, गरिब-हरिब, मोक्डो मंवलिर दासिर आय्वलिर सम्दिर गिर, तम्वा तिना केयदुन पोरोन आयि, सेलेके कपडगन आयि, मोर वाटनल जुल्मा कीता.
17 अद मोर इत्तेके, जंवर्ता पोरोले आयि, सेलेके वोना नंबरे आयि मंवेके, वूर वोम्वल-येत्वल किय्वा इन्जेर अहन कीसेर मंता.
18 अद जंवर्ता नंबर्ता अर्तमुन सम्जे माय्ले तेलिवि-गियंता जुरत मंता.
बारितेके अद नंबर वोरोर माय्नना पोरोलदुन तोहंता.
अद नंबर सारुङ नुह्क साट सारुङ (666)* आंद.