वेय्लो अनि मारेल्क वाले मासुल
12
1 अद आता पेजे, हाबडगा उंदि बेय मय्मता निसनि दिस्ता.
अद बतल इत्तेके, उंदि वेय्लो पोडदुन दात बक वेड्चि मंवलिक कप्डिङ पोंड्सि मत्ता.
तानङ दापिन बूड नेलेन्ज मत्ता.
अनि अद तलदगा बारा सुकुक्ना किरिट केर्सि दिस्ता.
2 अद वेय्लो पीटे मत्ता.
अनि बालेंता आय्वल वकत निंता काड्कि, नोपिते किलिसेर मत्ता.
3 अस्के अद हाबडगा उंडे उंदि मय्मता निसनि दिस्ता.
अद बतल इत्तेके, उंदि बेय डगुर रगल मारेल्क वाले मासुल दिस्ता.
तान येडुङ तलङ, अवेन पोरो येडुङ किरिट्क मत्तङ अनि दहा कोह्क मत्तङ.
4 अद मासुल हाबडगा मंवलिक सुकुकनल मूंद ईसनल उंदि ईसा तंवा तोकोडे सिय्सि, दर्तुरित पोरो वाड्ता.
अद आता पेजे, अद वेय्लो बालेंता आता बरोबर वोर पसि-गुड्डुन मिङना इन्जेर तान मुने निल्सि मत्ता.
5 अद वेय्लो वोरोर मोड्डन जल्मा सीता.
वोर मरि सम्दो देसकुन तंवा अदिकार्दे बेय कडक राज ताकुसंतोर.
बति वोर मोड्डन अचनक बगवंतनगा अनि वोना राजा-गादितगा वोय्वल जर्ग्ता.
6 अनि अद वेय्लो बोडि गुटनेके तंवा साटि बगवंतल तयर कीता जागते अद मासुडल परर आसि सोत्ता.
अगा उंदि हजर रंड नुह्क साट (1,260) रोज्क ताना चोकोट-वायुट सूडना इन्जेर बगवंतल नेमि कीतोर.
सय्तंदुन दर्तुरित पोरो वाडि सिय्वल
7 अद आता पेजे स्वर्ग्नगा उंदि लडेय जर्ग्ता.
बगवंतनोर पेर्सोर दूतल मिकयेल अनि वोनुर दूतलिर अद मासुडुन सङा अनि तानुर दूतलिर सङा लडेय कीतेर.
8 बति अद मासुल अनि तानुर दूतलिर हारे मातेर.
अस्केडल वूरकुन स्वर्ग्नगा मंले जागा सेल्वक आता.
9 ते तान अनि तानुर दूतलिरकुन स्वर्गनल दर्तुरित पोरो डग्लि किय्वल जर्ग्ता.
अद पूरो दुनियतुन तंवुर दूतलिर सङा मीरे मासि, पसि कीसेर मंता.
इद मासुडुने तोत्तल मंवल तरस+ सेलेके, पसि किय्वल सेलेके, सय्तन इन्जेर केयंतेर.
10 अस्के स्वर्गनल उंदि लेङ ना सङा,
“मा बगवंतन मुने मावुर दादलिर-बायिकुन बारेते,
रात-दिहा पिरदि कीसेर मंवन बूड डग्लि कीसि वाट्वल जर्ग्ता.
अदेन साटिने इंके बचे माय्वल कार्या, सक्ति, अनि राज मा बगवंतना आता.
इंके अदिकार किरिस्तुना* केय्दे वाता.
11 बति मावुर दादलिर-बायिक गोरे पिला आय्वना नेतुडे,
तमा वेह्ता अद गवते वोर सय्तंदुन मेय्तेर.
वूर तम्वा परंतुन सानल वेरि गिर पेर्मा किय्मकि.
12 अदेन साटि स्वर्ग्नि अनि स्वर्ग्नगा मंवलिर्निट!
आनंद येतट.
बति दर्तुरित अनि सम्दुरतुन पोरो मंवलिरकुन डगुर गंडम वाय्वल मंता.
बारितेके सय्तन तनकुन जरसिन वकत मेय्सि मंता इन्जेर करि कीसि,
बेय सोङ्ने मिह्गा वातोर”
इन्जेर वेह्तोर.
13 अद मासुल तना दर्तुरित पोरो अर्वल सूड्सि, मोड्डन जल्मा सीता अद वेय्लोन, दुक्सा सिय्ले पीचा पिय्ता.
14 ते बोडि गुटनगा तना तयर कीता जागतगा सोंले, अद वेय्लोन पेर्सा गंदडुन मोडितङ रंड मारेल्क बगवंतल सीतोर.
मासुल सोंदा परो इद जागतगा सडे मूंद साल्क वेरि अद वेय्लोना चोकोट-वायुट सूड्वल जर्गंता.
15 अस्के अद वेय्लो ऊसते पासि सोडियना इन्जेर अद मासुल तंवा तोड्दल उंदि लविडा ऊसतुन मोडि येतुन कक्ता.
16 बति दर्तुरि वेय्लोन मदत किय्ले, अद मासुल कक्ता पूरो येतुन ऊत्ता.
17 अदेन हिंदल अद मासुडुन वेय्लोन पोरो बेय सोङ वाता.
ते वेय्लोना संतांतगा बगवंतना आगे तीर ताक्सेर, येसुन बारेते गवा वेह्चेर मंवलिर कड्मतुर सङा अद लडेय किय्ले सोत्ता.
18 अनि सम्दुर्ता डर्डिता उस्केतगा निल्ता.