बगवंतल नेमि कीतुर इविर गवदार्क
11
1 वोरोर दूतल बेत येतन साटि उंदि बेड्डे ना केय्दे सीसि, ना सङा, “निमे तेच्चि, बगवंतना मंदिर्ता अनि बलिदान सिय्वल गुंडम्ना बेत येता.
अनि मंदिरतगा बच्विर लोकुर पार्तना-विंति कींतेरेयो कहा.
2 बति मंदिरतुन बहिडा आव्रता बेत येत्मा.
बारितेके अद यूदुल्क आयुर वूर दुस्रोक जातिनुर साटि मंता.
वूर चालिस रंड (42) महिनङ पवित्रा नगुडुन जारंतेर.
3 नना नावुर इविर गवदारकुन अदिकार सींतोन.
वूर बुय्लि पोतेङ गूंडि कीसि,* उंदि हजर रंड नुह्क साट (1,260) रोज्क वेरि, बगवंतना वचन पचर कींतेर” इन्जेर वेह्तोर.
4 वीर इविर इद दर्तुरितुन बगवंतल आय्वन मुने निल्सि मंवलिक रंड ओलिवा मरक अनि रंड दीसोडङ आंदुङ.+
5 बूरे आयि वूरकुन नुक्सन किय्ले सूडनिर्ते, वूरा तोड्दल तड्मि बह्रि वासि, वूरुर पगा-दारकुन डुंडुसि वाटंता.
वूरकुन नुक्सन कीकोम इंवलिर इहिन मरन आया लागर.
6 बगवंतना वचन पचर कीनेके, पिर वाय्वक आपुस्वल अदिकार वूर्गा मत्ता.
अचोरे आय्वा तमकुन इस्टम वांता अस्के, येतुन नेतुडुन मोडि मार्युस्वल सक्ति वूर्गा मत्ता.
अनि सम्दो तीर्क्नङ गंडलकुन दुनियतगा पग्रि किय्वल अदिकार गिर वूरकुन मत्ता.
7 वूर बगवंतना वचन पचर किय्वल आता पेजे, अंत-लागो अद कोल डोडोतल उंदि वेरिनल मंवल जंवर वासि, वूर सङा लडेय कींता अनि वूरकुन हारि कीसि जकंता.
8 वूरङ कूर्क अद पेर्सा नगुडङ बाजर्क्नगा अर्सि मंदंतङ.
इगे मावोर पर्बुन मोद्नगा मोलने पासि टाङि किय्वल जर्ग्ता.
इद नगुडुर बारेते वेह्ले सोदोमा अनि ईजिप्ट्ना करेबल पर्जतुन बारेते नमुना येत्वल जर्ग्ता.
9 सडे मूंद रोज्क वेरि, हर पर्जा, हर जातितुर, हर बासतुर, हर देस्नुर अव कूरकुन सूडंतेर.
बति वूर अव कूरकुन माति किय्ले बोने वोपुर.
10 वूर इविर गवदार्क आय्वलिर पर्वक्तलिर हिंदल दर्तुरित पोरो दुक्सङ वाता काड्कि, वूरा मरंतुन पिय्सि, दुनियतुर सम्दिर वेले आनंद येच्चेर कुसि-गमत्ने मंदंतेर.
अनि वोरोन वोरोर इनम्क रोहंतेर.
11 बति अव सडे मूंद रोज्क आता पेजे, बगवंतल वूर पर्वक्तलिर्गा जीवता हूकुर रोह्तोर.
अस्के वूर तेच्चि निल्तेर.
वूरकुन सूड्तुर वूर बेय दड्कि तित्तेर.
12 अस्के स्वर्गनल उंदि लेङ बेय जोर्ते, “इगे पोरो वरट!”
इन्जेर केय्वल वूर इविर पर्वक्तलिर केन्ज्तेर.
वूरुर पगा-दार्क सूड्सेर मनेकेन, वूर उंदि टेपते स्वर्ग्नगा पोरो सोत्तेर.
13 अद गट्कतेन बेय डगुर बूकंप वाता काड्कि, अद नगुर नूटल दहा ईसङ नासेडम आता.
अद बूकंपुन हिंदल लग-बग येडुङ हजर्क (7,000) मांदि सातेर.
पिसि मंवलिर कड्मतुर बेय वेरिसेर स्वर्ग्नगा मंवल बगवंतन डगुर-पान सीतेर.
14 रेंडवा गंडम मार्ता.
मूडवा गंडम वेय्ने सुरु आय्वल मंता.
येडवा दूतल तंवा तुरतुन उह्क्वल
15 बस्केते येडवा दूतल तंवा तुरतुन उह्क्तोरो, अस्के स्वर्गनल उंदि लेङ,
“इद दुनियता राज पूरो पर्बुना
अनि वोनोर किरिस्तुना* आता.
वोर पिडिनङ-पिडिङ राज ताकुसंतोर”
इंवल जोर्ते केन्जा वाता.
16 अस्के बगवंतन मुने मंवलिक राजा-गादिनगा उच्चि मंवलिर वीसा नाल्विर (24) पेदोल्क गप्ने बूड अर्सि, पार्तना-विंति कीतेर.
17 अनि वूर,
“सर्वा सक्तिवंतल पर्बु आय्वल बगवंता!
निमे तोले मत्ति अनि इंके गिर मंति.
नीवा अदिक सक्तितुन हिंदल राज ताकुस्वल सुरु कीति.
अदेन साटि नीकुन मावा दनेवाद वेह्चेर दंडोस दोसेर मंतोम.
18 नीकुन दुस्रोक जातिङ उल्टा ताक्ता काड्कि, सोङ वाता.
सातुर वूरा तस्वा किय्वल वकत वाता.
नीवुर सेव्कलिर आय्वलिर पर्वक्तलिरकुन इनम सिय्वल गट्का वाता.
नीवुर बक्तलिरकुन, नीवा पोरोडुन मान सिय्वलिरकुन,
सादरन अनि डगुक लोकुरकुन
इहिन नीवुर सम्दिरकुन इनम सिय्वल कालम वाता.
दर्तुरितुन नासेडम किय्वलिरकुन नासेडम किय्वल गट्का वाता”
इन्जेर पार्तना-विंति कीतेर.
19 अस्के स्वर्ग्नगा बगवंतना मंदिर उग्डो आता.
ते अगा बगवंतना नियम्ना संदोका+ दिस्ता.
अस्के मिड्च्वल, गर्ज्वल आवज, बूकंप अनि डगुक डगुक गार-बंडङ वातङ.