यूदुल्क्ना जातितुर बगवंतन पार्तना-विंति किय्वल तरिका
- - - - - - - - - - - - - - - - - - - - -
- - -
इज्रयेल पर्जा ईजिप्ट देस्ने दासिर आसि, पिसेर मत्तेर. अगा वूर वेले सिक्सङ बोगे मासेर मत्तेर. बगवंतल मोसेना केय्दे, इज्रयेल पर्जतुन ईजिप्ट देसनल सुटि कियुसि, कनान देस्ने तच्चेर मनेके, बगवंतल वूर पर्जत साटि मोसेना केय्दे दहा हुकुम्क सीतोर. अस्के बगवंतल (बह्रि पेसिवल 25:8) वूर पर्जतुन नड्डुम मंदन साटि, “मिरट नावा पार्तना-विंति किय्ले उंदि डेरा वाटट” इन्जेर मोसे पर्वक्तन वेह्तोर. अनि अद पार्तना-विंति किय्वल डेरतुन बहन तयर कियना इंवल उंदि नमुना वोन तोह्तोर.
पार्तना-विंति किय्वल डेरता आव्रा: सिर्मुट पड्दन उंदि वेलुमुन दात दोह्ता अव्रतुन रोपो, इद पार्तना-विंति किय्वल डेरा मंदु. रोपो नेङन साटि पड्दङ दोह्चि मंदुङ. पार्तना-विंति किय्वल डेरतुन बह्रि मंवल आव्रतगा, रंड वस्तुङ मंदुङ. अव बलि चडि किय्वल बोव्ला अनि येते निह्चि मंवल डगुर गङर.
बलि चडि किय्वल बोव्ला: इद डगुर बोव्ला अव्रतुन रोपो नेङन साटि मंवलिक पड्दन करुम मंदु. इद बोव्ला तुंमा मोद्ने तयर कीसि, पोरोडा बाजुन पितुडा अत्क वाट्सि मंदु. इदेनगा कटोडलिर जंवर्क्ना बलिदान अनि अर्पनङ सींदिर. वूर कटोडलिर इदेनगा बस्केट तड्मि पोतनल सूड्सेर मंदिर.
येते निह्चि मंवल डगुर गङर: इद गङर पितुडे तयर कीसि मंदु. गङर पार्तना-विंति किय्वल डेरतुन अनि बलि चडि किय्वल बोव्लतुन नड्डुम मंदु. इद गङडा येते कटोडलिर केय-काल्क नोर्सि, तम्वा तमकुन सुदुड कींदिर.
पार्तना-विंति किय्वल डेरा: इज्रयेल लोकुर तम्वङ काय्दङ-कानुन्क ताकुस्ले, बगवंतल नेमि कीता जागये, “बगवंतना सक्ति तात्कर दिस्वल पार्तना-विंति किय्वल डेरा” आंद. इदेन उंदि जागतल उंडे उंदि जागते उक्लि कीसि वोसि, वाटनल अद डेरतङ वस्तुङ मत्तङ. इज्रयेल लोकुर ईजिप्टनल वाता सरि-मारग्ने इत्तेके, इद डेरतुन सिनायि गुटतल ते, कनान वेरि तम्वा सङा वोतेर. इदेन सिर्मुट इज्रयेल लोकुर तम्वङ कांदान्क पिय्सि, डेरङ वाट्सि मंदिर.
इद डेरतगा सिरिप रंड अरङ मंदंतङ. मोदोडा अरतुन मुने उंदि पड्दा मंदु. अद पड्दतुन बग्ला जर्गुसि मोदोडा अरतगा नेङा वांदु. अद मोदोडा अरता जागतुन पवित्रा जागा इंतेर अनि पेजेटा अरता जागतुन बेय पवित्रा जागा इंतेर.
पवित्रा जागा: इद पवित्रा जागता अरा तीसा (30) कूटङ लामुन अनि पंद्रा (15) कूटङ बेडुंदि मंदु. इदेनगा मूंद वस्तुङ मंदुङ:
(1) येडुङ डिवेना जल्करा: इद जल्करा पूरो पिवर सोनेते निव्डि कीसि मंदु. पवित्रा जागता डेमा बाजुन इदेन इर्ंदिर. अद अरतगा वेड्चि सियन साटि इद जल्करतगा मंवलिक डिवेङ बस्केट पोच्चेर मनल, कटोडलिर निय वेडिसेर मंदिर. (बह्रि पेसिवल 25:31-39; कटोडलिरा 24:1-4).
(2) निवोद्नङ सारिङ इर्वल टेबल: बगवंतना चर्नतुन मुने इर्वलिक निवोद्नङ सारिङ, इद टेबलतुन पोरो इर्ंदिर. इद टेबल पवित्रा जागता तिना बग्ला मंदु. इदेन तुमा मोद्ने निव्डि कीसि, तान पोरोट्क सोनेता रेक्ने अत्क वाट्सि मंदु. यूदुल्क्नङ काय्दङ-कानुनकुन पिय्सि, इद टेबलतुन पोरो, रंड देडियनगा सारुङ सारुङ सारिङ चव्डिङ कीसि इर्ंदिर. इव सारिन आरम्ना दिवोसुन नेटि, अवेन तेंड्सि तातोक सारिङ इर्ंदिर. अव सारिन सिरिप कटोडलिरे तिंदिर. अवेन दुस्रुर बूरे तिंले हक सेले मत्ता. आरम्ना दिवोसुन मुने, इव सारिन लेवि जातितेर तयर कींदिर. कटोडलिरा 24:5-9.
(3) दूप निरुस्वल कुंडि: रंड अरन नड्डुम मंवल पड्दतुन करुम इद दूप निरुस्वल सोनेते तयर कीता कुंडि मंदु. इदेनगा दूपुन सुटि कीसि दुस्रोक जिव्रस, दानङ अनि पावेरङ बवेने लावि किय्वेके सोंदिर. सक्रे पोद्रेक दूप वाट्सेर मंदिर. इद कुंडि बेय पवित्रा जागतगा मंवलिक वस्तुना लेकतगन वांता. (हेब्रि 9:4).
बेय पवित्रा जागा: डेरता पेजेटा अरतुन बेय पवित्रा जागा इंदिर. इद अरा लाम अनि बेडुंदि पंद्रा (15) कूटङ मंदु. इद अरतगने नियम्ना संदोका मंदु. इद संदोकता पोरोडा मुचडगा बगवंतना सक्ति तात्कर दिस्ंदु. इदेन दयता कुतुल इन्जेर गिर केयंतेर. इद बेय पवित्रा जागतगा सालदुन उंदि जोका, सम्दिर पर्जतङ पाप्क मापि आय्ले, बलि सीता जंवर्क्ना नेतुर पिय्सि, सिरिप पेर्सोर कटोडले पड्दा जर्गुसि रोपो सोंदुर. (हेब्रि 9:11). अदे तीर्दे येसु मावोर पेर्सोर कटोडल आतोर. येसु मोदुन पोरो तंवा जीवा सीसि (हेब्रि 7:27), सम्दिरङ पापकुन उंदिय जोका कंडि किय्ले तंवा नेतुडा अर्पना सीतोर. अस्के अद येरुसलेम मंदिर्ता पड्दा पोरोडल्ते बूड सर्ता. (मत्तयि 27:51), इदेन मुने बेय पवित्रा जागतगा सिरिप पेर्सोर कटोडले अद पड्दतुन जर्गुसि सोंदुर. बति किरिस्तु तंवा जीवता अर्पना सीततुन हिंदल बोर्ते येसुन पोरो बरोसा इरंतोरो, वोर बगवंतना चर्नते सोंदा परंतोर.
नियम्ना संदोका: इद संदोका पूरो सोनेता रेक्ने अत्क वाट्सि मंदु. तान्गा मंवल मुचडा पोरोडा बाजुन पाप्क मापि किय्वल जागा इंतेर. बगवंतना मय्मतुन तोह्वलिक केरुबुल्क इंवलिक दूतलिक्नङ रूप्क, अद दयता कुतुडा जागतुन केप्सेर बूड मोकोम कीसि, मारेल्क्ने मुच्चि मंदुङ. इज्रयेल जातितुर ईजिप्टनल कनान वासेर मनेके, सर्दे कानेता इंतजम बगवंतल कीतोर. अद कानेतुन मंना इंतेर. अद मंना इर्ता सोनेता कोपा, बगवंतल मोदोल नेमि कीतोर वोर पेर्सोर कटोडल अहरोंता कोड्स्ता बेड्डे अनि बगवंतल हुकुम्क लिहि कीसि मोसे पर्वक्तना केय्दे सीतङ पाटिन दात चेक्तङ रंड बंडङ; इव सम्दो अद संदोकत रोपो मंदुङ.
कटोडलिर: इज्रयेल लोकुरा बारा कांदांतुर्गटल उंदि कांदांतुर लेवियुल्क इंवलिर आंदिर. इद कांदांतुर डेरतुन उंदि जागतल उंडे उंदि जागतगा उक्लि कीसि वोसि वाट्वलिर आंदिर. अद डेरतगा कार्यन ताकुस्वल, वीरा काम मत्ता. इद कांदांतोरे मोसे आंदुर. वेर मोसेनोर तादल अहरोन मोदोडोर पेर्सोर कटोडल आंदुर. वोनुर मर्क कटोडलिर आसि, वोन अद डेरतगा मदत कींदिर. सिरिप इद लेवि कांदांतुरे, अद डेरतगा सेवा कियना इंवल नेकि मत्ता.
बगवंतल दर्मा-ग्रंत्नगा वेह्ता तीर पर्जा सम्दिर नियत्ने, नाय्दे, सुदुड-पांदे, पवित्रा मन्जेर पिसना इन्जेर वेह्वल वजन वीर पोरो मत्ता. पर्जा तत्तङ अवेन बलि चडि किय्वल अनि अर्पनङ सिय्वल वीरा काम मत्ता. इद तीर्दे बगवंतन अनि पर्जतुन नड्डुम वूर कब्रियलिर दात मंदिर. अद पार्तना-विंति किय्वल डेरतगा रोजि डिवेन निरुस्वल, दूप सिय्वल काम कीसेर मंदिर.
पडना अनि पूना नियम: नियम इत्तेके, इविर माय्नलिर तम्वा नड्डुम उंदि कार्या जर्गन साटि वोप्ता गोस्टि. नियमुन वोरोर तप्सि ताक्तेके, तप्तोन सिक्सा वाट्वल अदिकार तप्मकि वोन मंता. बति इगे वेह्वल नियम बगवंतन अनि माय्नलिर नड्डुम वोप्ता गोस्टि आंद.
पडना नियमुन बगवंतले सीतोर बति, बस्केट मंले आयो. सिरिप येसु किरिस्तुना वाय्वल सरि-मारगुन सुद्रि कियन साटिने, इद नियम्ना काम मत्ता. इदेनगा मंवलिक बवे कानुन्क, रीति-रिवज्क पापकुन कंडि किया पर्मकि. बति अवेना चुक्ततुन येसु किरिस्तु तंवा जीवा मोदुन पोरो अर्पना सीसि कंडि कीतोर. अहन येसुना मरन पापुन बद्लि, पवित्रा तचि, बगवंतना चर्नते सोंले सरि-मारग तेरिता. इद किरिस्तुना मरने माकुन अनि बगवंतन नड्डुम पूना नियम आसि निल्ता. इद नियम बर्पुर आसि, बस्केट निल्सि मंदंता.
बलिदान्क: बगवंतन पोरो तम्वकुन मंवल बक्तितुन तोहन साटि, पर्जा बक्रना बलि चडि कींतेर. अह्ने दुस्रोक दुस्रोक बगवंतनल पुट्वलिक पाय्दन साटि, बलि चडि कींतेर. तमा कीतङ तपकुन अनि पापकुन कंडि कियन साटि इव बलिदान्क सींदिर. बति इव सीतङ बलिदान्क पापकुन बस्केन कंडि कियोङ. इवेन हिंदल, पाप्क्ना चुक्तता सरि-मारग करि कीनिर इन्जेर बगवंतल इर्तोर. अद सरि-मारग सिरिप उंदिय मंता. अद बद इत्तेके, येसु पर्बु तंवा तना मोदुन पोरो जीवा सुटि किय्वल. अदेन साटि इंके, बवे जंवरकुन बलिदान सिय्वल जुरत सेले.