जीवा निपुस्वल येर वाले लव्डि
22
1-2 अद आता पेजे वोर दूतल नाकुन बेय चक येर मंवल लविडुन तोह्तोर.
तान्गा जीवा निपुस्वल येर मत्ता.
अद लव्डि बगवंतल अनि गोरे पिला आय्वल उच्चि मंवल राजा-गादितल सुरु आसि, नगुडा डगुर बाजरतुन नड्डुमनल पार्सेर मत्ता.
अद लविडङ रंडुते डर्डिनगा जीवा निपुस्वलिक मरक मत्तङ.
अव मरक साल्दा हर महिना बारा जोकङ, बारा तीर्क्नङ पंडिङ साद्चेरेन मंदंतङ.
जातिनुर चोकोट आय्ले अवेनङ आकिङ वाप्रि कींतेर.
3 अद नगुडुन रोपो सापेना लाग्तङ बवे मनोङ.
बारितेके अगा बगवंतना अनि गोरे पिला आय्वना राजा-गादि मंदंता.
वोनुर सेव्कलिर वोना सेवा कींतेर.
4 वूर वोना मोकोम सूडंतेर.
वोना पोरोल वूरङ कपक्नगा मंदंता.
5 अगा रात इंवल उंडे बस्केन मनो.
डिवेता वेड्चिय आयि, पोड्द्ना वेड्चिय आयि, वूरकुन जुरत सेले.
बारितेके पर्बु आय्वल बगवंतले, वूर पोरो वेड्चि पारुसंतोर.
वूर बस्केट राज ताकुसंतेर.
6 वोर दूतल ना सङा, “इव गोस्टिङ बरोसतङ अनि सतेम्नङ आंदुङ.
पर्वक्तलिर्कुन ताकुस्वल पर्बु आय्वल बगवंतल, इंके तप्वक जर्ग्ले मंवलिकुन तंवुर सेव्कलिरकुन तोहन साटि, तंवोर दूतन रोह्तोर” इन्जेर वेह्तोर.
येसु वेय्ने मल्सि वाय्वल मंतोर
7 अद आता पेजे येसु, “इचुला!
नना वेय्ने वासेर मंतोन.
इद ग्रंत्नगा लिहि कीतङ नावङ वचन्क तीर ताक्वल आसिर्वाद येतंतोर” इन्जेर वेह्तोर.
8 योहन इंवना नना इव सम्दोन बारेते केन्ज्तोन अनि सूड्तोन.
नना अवेन केन्चि, सूड्तोन अस्के, नाकुन तोह्वल दूतन पार्तना-विंति कीका इन्जेर वोनङ काल्क्नगा गप्ने अर्तोन.
9 बति वोर ना सङा, “अहन किय्मा!
नना नी बरोबर्तोर सेव्कना आंदुन.
इद ग्रंत्नङ गोस्टिङ पिय्सि ताक्वलिर बगवंतनुर बक्तलिर बरोबर अनि पर्वक्तलिर बरोबर दासिनय आंदुन.
निमे बगवंतने पार्तना-विंति कीम” इन्जेर वेह्तोर.
10 वोर उंडे गिर ना सङा, “इव वेय्ने जर्ग्वलिक मंतङ.
अदेन साटि इद ग्रंत्नगा वेह्तङ बविसत्ने जर्ग्वलिक गोस्टिन मक्डिते इर्मा.
11 बोरे आयि वायुट ताक्वल मंदनुर्ते, वोर अह्ने ताक्सेर मनिर.
बोरे आयि करब-पांदे ताक्वल मंदनुर्ते, वोर अह्ने ताकिर.
बोरे आयि नियत्ने पिस्वल मंदनुर्ते, वोर अह्ने पिसिर.
बोरे आयि पवित्रा मंदनुर्ते, वोर अह्ने मनिर” इन्जेर वेह्तोर.
12 अस्के येसु ना सङा, “इचुला!
नना वेय्ने वासेर मंतोन.
हर वोरोन गिर वोर कीततुन पिय्सि, वोन सिय्ले नह्गा इनम मंता.
13 ननय अल्पाता अनि ओमेगाता आंदुन.
इत्तेके, ननये मोदोडोना अनि आक्रितोना आंदुन.
ननय सुरु किय्वना अनि मह्वना आंदुन.
14 “तम्वङ पाङुक चक सुक्तुर वूर, आसिर्वाद येतंतेर.
बहन इतेके जीवा निपुस्वल मरता पंडि तिंले हक वालिर आंतेर अनि वूर पाटकनल अद नगुडे नेङा परंतेर.
15 बति अद नगुडुन बह्रि नेयकुन मोडितुर,* सोदेङ किय्वलिर, लन्जेतनम किय्वलिर, जक्वलिर, मूर्तिना पूजा किय्वलिर अनि लबडुन पसंद कीसेर पकट वेह्चेर मंवलिर सम्दिर गिर मंदंतेर.
16 “नना येसुना आंदुन.
इव गोस्टिन चर्चिनुर्गा वेहना इन्जेर मिह्गा नावोर दूतन रोह्तोन.
दाविदनल पूटे माता सीर्दा अनि संतांदा ननय आंदुन.
सक्रे जगर्ने मिड्च्वल सुकुम्ना ननय आंदुन” इन्जेर वेह्तोर.
17 बगवंतना आत्मा अनि नोव्रि, “वरा!”
इन्जेर वेह्चेर मंतेर.
इद गोस्टि केन्ज्तोर वोर गिर, “वरा!”
इंदा लागर.
येर वट्का वस्वल वायना.
पसंद मंवल बोरे आयि, पोकोटे जीवतुन निपुस्वल अद येर उंडा वचो.
आक्रितङ गोस्टिङ
18 इद ग्रंत्नगा मंवल बविसतुन बारेतङ वचन्क केन्ज्वल हर वोरोन इहिन दम्कि सीसेर मंतोन.
उंदि मोका बोरे आयि इदेनगा बतय जोडि कीतेके, इद ग्रंत्नगा लिहि कीतङ गंडम्क बगवंतल वोन पोरो वायुसंतोर.
19 अनि बोरे आयि बविसत्ने जर्ग्वलिकुन बारेते मंवल इद ग्रंत्नङ गोस्टिनल बवेने तेंड्सि वाड्तेके, बगवंतल इद ग्रंत्नगा लिहि कियुस्तङ जीवा निपुस्वल मरतगा अनि पवित्रा नगुडगा वोन ईसा पुटो.
20 इव सम्दोन येसु पर्बुये गवदारल आंदुर.
अनि वोर, “हो!
करलेन नना वेय्ने वाय्वल मंतोन” इन्जेर वेह्चेर मंतोर.
आमेन!
हो, येसु पर्बु!
वरट!
21 बगवंतनुर लोकुर पोरो येसु पर्बुना पेर्मता-दया मनि!
आमेन!