दूतल अनि वोना केय्दगा मंवल चुडुसि पान
10
1 अस्के उंडे वोरोर ताकद वाले दूतल स्वर्गनल वाय्वल सूड्तोन.
वोर पाङुडुन मोडि टेपतुन पोंड्सि मत्तोर.
अनि वोना तलत पोरो कमल-पटि मत्ता.
वोना मोकोम पोडदुन मोडि मत्ता.
वोनङ काल्क तड्मितङ दारुमकुन दात मत्तङ.
2 गूंडि कीसि मत्ता अद चुडुसि पान वोना केय्दगा कोलि कीसि दिस्ता.
वोर तंवा तिना काल सम्दुरतुन पोरो अनि डेमा काल बोमित पोरो नेटि कीतोर.
3 अनि चिहोत मोडि बेय जोर्ते हंकत कीतोर.
अस्के येडुङ जोकङ गर्ज्वल आवज वाता.
4 अद आवज वाता पेजे, नना लिहि किय्ले आतोन.
बति अस्केने स्वर्गनल उंदि लेङ ना सङा, “गर्ज्चि आवज वातता अर्तमुन दुस्रुरकुन वेह्मा अनि लिहि गिर किय्मा” इंवल नना केन्ज्तोन.
5 अद आता पेजे, सम्दुरतगा अनि दर्तुरितगा काल्क नेटि कीसि निल्वल दूतल, तंवा तिना केय स्वर्ग्नेके तह्वल सूड्तोन.
6 अस्के वोर दूतल, स्वर्गुन अनि तान्गा मंवलिक सम्दोन, दर्तुरितुन अनि तान्गा मंवलिक सम्दोन, सम्दुरतुन अनि तान्गा मंवलिक सम्दोन गडि कीसि, पिडिनङ-पिडिङ जीवते मंवना पोरोडे वोट वाट्सि, “उंडे गिर कोरुम मनो.
7 बस्केते येडवा दूतल तंवा तुरतुन उह्कंतोरो, अस्के बगवंतना मक्डिता पिलन बर्पुर पूरे मांता.
बगवंतल तंवुर सेव्कलिर आय्वलिर पर्वक्तलिर्कुन वेह्ता तीरे इद जर्गंता” इन्जेर वेह्तोर.
8 अस्के उंडे उंदि जोका स्वर्गनल लेङ ना सङा, “सम्दुरतगा अनि दर्तुरितगा काल्क नेटि कीसि, निल्तोर वोर दूतनगा सोन्जि, वोना केय्दगा कोलि कीसि मंवल चुडुसि पुस्तकुन येता” इंवल केन्ज्तोन.
9 अदेन साटि नना वोर दूतनगा सोन्जि, अद पुस्तकुन सीम इन्जेर तल्क्तोन.
ते वोर, “इचुला!
इदेन येच्चि, तिन.
इद नीवा तोडदुन काडल नियदुन मोडि गोड लागंता बति, नीवा पेटितुन केय्मुल मंदंता” इन्जेर ना सङा वेह्तोर.
10 ते वोर दूतना केय्दल अद पुस्तकुन येच्चि तितोन.
अस्के नावा तोड्दगा काडल नियदुन मोडि अद गोड लाग्ता बति, पेटितगा केय्मुल आता.
11 अस्के वोर दूतल ना सङा, “उंडे उंदि जोका निमे सोन्जि वेलेटिर पर्जतुन, सम्दो जातिनुरकुन, सम्दो बासङ वालिरकुन अनि राजलिरकुन बतल जर्ग्वल मंतयो, अदेन बारेते वेहा” इन्जेर इत्तोर.