तम्वा कपडगा बगवंतना मोर सेलुर वूर पोरो वाय्वल गंडम
9
1 अय्दवा दूतल तंवा तुरतुन उह्क्तोर.
अस्के हाबडल दर्तुरित पोरो उंदि सुकुम* अर्वल सूड्तोन.
ताना केय्दे, अंत-लागो अद कोल डोडोता कुन्जि सिय्वल जर्ग्ता.
2 अद सोन्जि अद डोडोतुन तेरिता.
अस्के बेय पेर्सा कोल्मितल पोया पेसितपिनय तान्गटल पोया पेसिता.
अद पोया पोडदुन अनि वडिदुन कप्सि सिकटि कीता.
3 अद पोयतल जाडि-कोडङ दर्तुरित पोरो वातङ.
बोमित पोरो मंवलिक मिचोन ताकद मत्तपिनय अवेकुन ताकद सिय्वल जर्ग्ता.
4-5 अदेने अव दर्तुरित पोरो मंवल जाडितुन आयि, पोदेलन आयि, मरकुन आयि नुक्सन किय्वा.
सिरिप तम्वा कपडगा बगवंतना मोर सेलुर वूरकुन सियुङ महिनङ वेरि दुक्सा सिय्ले अवेन अदिकार मत्ता.
उंदि मिचो कोडितेके बहंते नोपि मंदंतयो, अह्ने अद नोपि मंदु.
बति वूरकुन जक्वा इन्जेर अवेन आगे सिय्वल जर्ग्ता.
6 अव दिवोस्क्नगा वूर माय्नलिर सावदुन मह्कंतेर बति, अद वूरकुन पुटो.
सायना इन्जेर आसा कींतेर बति, अद साव वूर्गटल परर आंता.
7 अव जाडि-कोडङ लडेय किय्ले तयर कीतङ अव कोडन दात दिस्तङ.
अवेनङ तलन पोरो सोनेतङ किरिटकुन मोडितङ मत्तङ.
अवेनङ मोकोम्क माय्नलिरङ मोकोमकुन मोडि मत्तङ.
8 वेय्लोक्नङ केलकुन मोडि अवेनङ केल्क मत्तङ.
अवेनङ कोरेल्क चिहोनङ कोरेलकुन मोडि मत्तङ.
9 लोकोंड्नङ कवच्क अव केर्सि मत्तङ.
लडेय किय्ले वित्वलिक बेय वेले कोडङ वाले रत्क्ना आवजुन मोडि अवेनङ मारेल्क्ना आवज मत्ता.
10 अवेकुन मिचोन मोडि तोकोक अनि कोंडिङ मत्तङ.
सियुङ महिनङ वेरि, तम्वङ तोकोक्ने माय्नलिरकुन नोमुर किय्ले, अवेकुन अदिकार सिय्वल जर्ग्ता.
11 अंत-लागो अद कोल डोडोतोर दूतल अवेकुन पोरो राजल आसि मंतोर.
हेब्रि बासते वोना पोरोल अबदोन* अनि ग्रीकु बासते वोना पोरोल अपोल्योन.*
12 इद मोदोडा गंडम वीड्ता.
इचुला!
उंडे रंड गंडल्क वाय्वलिक मंतङ.
अरवा तुरा रेंडवा गंडमुन तर्वल
13-14 आरवा दूतल तंवा तुरतुन उह्क्तोर.
अस्के बगवंतन मुने मंवल सोनेता बोव्लतङ कोह्कनल उंदि लेङ, आरवा दूतन सङा, “युप्रटिस इंवल पेर्सा लविडगा दोह्चि मंवलिर नाल्विर दूतलिरकुन सुटि कीम” इंवल केन्जा वाता.
15 ते वूर दूतलिरकुन अदे गट्कते, अदे दिवोस, अदे महिना अदे साल्दगा सुटि कियन साटि बगवंतल दोह्चि इर्सि मत्तोर.
ते माय्नलिर्गटल मूंद ईसनल उंदि ईसा लोकुरा जीवा, येतन साटि वूरकुन सुटि किय्वल जर्ग्ता.
16 वूर कोडन पोरो वाय्वलिर सिपायिरा संके पूरो वीसा करोड्क (20,00,00,000) इंवल केन्ज्तोन.
17 अनि नाकुन दिस्ता इद दर्संतगा अव कोडङ ताकुस्वलिरङ कवच्क तड्मित मोडि रगलिक, कंकरतुन मोडि नीलि रङ अनि गंदोकुन मोडि बोडल रङ्ने दिस्तङ.
अह्ने अव कोडनङ तलङ चिहोनङ तलन मोडि मत्तङ.
अवेना तोड्दल तड्मितङ जार्क, पोया अनि गंदोक बह्रि वासेर दिस्ता.
18 इव मूंद गंडल्क्ने इत्तेके कोडना तोड्दल बह्रि वाय्वल तड्मिते, पोयते अनि गंदोक्ने दर्तुरित पोरो मंवल मूंद ईसनल उंदि ईसा मांदिता जीवा येत्वल जर्ग्ता.
19 अव कोडना सक्ति अवेनङ तोड्डिनगा अनि तोकोक्नगा मत्ता.
बारितेके अवेनङ तोकोक तरसुन मोडि तलङ वालेक आता काड्कि, अवेने माय्नलिरकुन बेय नोमुर कींतङ.
20 बति अव गंडल्क्ने, इचोर वेले नासेडम जर्ग्नेके गिर, जीवते मंवलिर माय्नलिर तमा कीतङ करब कामकुन बारेते चुक चुके माय्मकि.
सोने, कूरा, पितुड, बंडा अनि चेकते निव्डि कीतङ मूर्तिना अनि बूत्क्ना पूजा किय्वल इंवलिक कार्यङ वूर कीसेरेन मत्तेर.
इव मूर्तिङ सूडोङ, केन्जोङ अनि जागतल मेलियोङ.
तेर बति वूर, अवेन पूजा किय्वल आपुस्मकि.
21 अचोरे आयो बति, दुस्रुरकुन जक्वडल, सोदेङ-रकस्क किय्वडल, लन्जेतनम किय्वडल, कले काम्क किय्वडल वूर तम्वा मंदुन गिर मार्युस्मकि.