येडवा मोरदुन गोरे पिला आय्वल कोलि किय्वल
8
1 येडवा मोरदुन बगवंतना गोरे पिला आय्वल कोलि कीतोर.
अस्के स्वर्ग्नगा लग-बग अर्दो गंटा सिम-सम आसि मत्ता.
2 अद गट्कते बगवंतन मुने येड्विर दूतलिर निल्सि मंवल सूड्तोन.
वूर तम्वङ केय्क्ने येडुङ तुरङ पिय्सि मत्तेर.
3 सोनेता दूपेरतुन पिय्सि मंवल उंडे वोरोर दूतल वासि, दूप सिय्वल बोव्लतुन मुने निल्तोर.
राजा-गादित मुने मंवल अद सोनेता बोव्लतगा बगवंतनुर बक्तलिरङ पार्तनङ मीरि कीसि वाट्ले, वोन्गा बेय वेले दूप सिय्वलिक चीज्क सिय्वल जर्ग्ता.
4 अस्के वोर दूतल वाट्ता दूप्ना अनि बगवंतनुर बक्तलिरा पार्तनना गाडि बगवंतना चर्नते येव्ता.
5 वोर दूतल दूपेरतुन पिय्सि, दूप सिय्वल बोव्लतगा मुडुसि गोक्कने निह्तोर अनि तान दर्तुरित पोरो वेडितोर.
अदेन हिंदल गर्ज्वल आवज, मिड्च्वल अनि बूकंप गिर वाता.
येड्विर दूतलिर अनि येडुङ तुरङ
6 अस्के येड्विर दूतलिर येडुङ तुरङ पिय्सि उह्क्ले तयर आतेर.
7 वूर्गटल मोदोडोर दूतल तंवा तुरतुन उह्क्तोर.
अस्के नेतुर मिसडि मंवल तड्मितुन अनि गार-बंडन दर्तुरितगा वाट्वल जर्ग्ता.
ते अवेने दर्तुरिता मूंद ईसनल उंदि ईसा वेता.
मरक्नगटल मूंद ईसनल उंदि ईसा वेता अनि हिर्वल जाडि गिर पूरो वेता.
8 रेंडवा दूतल तंवा तुरतुन उह्क्तोर.
अस्के तड्मिते वेसेर मंवल उंदि पेर्सा गुटत मोडिततुन सम्दुरतगा वाट्वल जर्ग्ता.
तान हिंदल सम्दुरतगा मूंद ईसनल उंदि ईसा नेतुर वरे माता.
9 सम्दुरतगा जीवते मंवलिक सम्दो मूंद ईसनल उंदि ईसा सातङ, अनि रूकनल मूंद ईसनल उंदि ईसा नासेडम आतङ.
10 मूडवा दूतल तंवा तुरतुन उह्क्तोर.
अस्के डिव्टित दात पोच्चेर मंवल बेय डगुर सुकुम हाबडल अर्सि, दर्तुरित पोरोडङ मूंद ईसनल उंदि ईसा लव्डिनगा अनि जलन पोरो अर्ता.
11 अद सुकुम्ना पोरोल केय्मुल.
तान हिंदल मूंद ईसङ येतल उंदि ईसा येर केय्मुल आता.
अदेन हिंदल माय्नलिर्गटल वेलेटिर सातेर.
12 नाल्गवा दूतल तंवा तुरतुन उह्क्तोर.
अस्के पोड्द, नेलेन्ज अनि सुकुकनल मूंद ईसनल उंदि ईसा नुक्सन आतङ.
अदेन हिंदल अव सिकटित मोडि मारितङ.
ते दिहतगा मूंद ईसनल उंदि ईसा अनि रात्नगा मूंद ईसनल उंदि ईसा सिकटिते निन्चि सोत्तङ.
13 नना उंडे गिर सूड्सेरेन मत्तोन.
अस्के हाबडुन नड्डुमनल उंदि गंदल परिसेर, “अय्यो!
दर्तुरित पोरो मंवलिरकुन वेले दुक्सा वाय्वल मंता.
बारितेके उंडे गिर मुविर दूतलिर तम्वङ तुरङ उह्क्वलिर मंतेर” इन्जेर जोर्ते किलंडि वाट्वल केन्ज्तोन.