उजगिरि अरुस्वल 7

बगवंतनुर सेव्कलिरकुन काबाड्वल जर्गंता

1 इव जर्ग्ता पेजे, बगवंतनुर नाल्विर दूतलिर दर्तुरितङ नालुङ कोन्क्नगा निल्सि दिस्तेर.

अनि वूर दर्तुरित पोरोन आयि, सम्दुरतुन पोरोन आयि अनि बवे मरकुन पोरोन आयि वडि पाय्वक्ने नालुङ कोन्कनल वाय्वल वडितुन आपुस्तेर.

2-3 अनि जीवा वाले बगवंतना मोरदुन पिय्सि, उंडे वोरोर दूतल पोड्द पेसिवल बाजनल पोरो वासेर दिस्तोर.

अनि वोर, दर्तुरितुन अनि सम्दुरतुन नुक्सन किय्ले, अदिकार वालिर नाल्विर दूतलिर सङा जोर्ते, “बगवंतना सेवा किय्वलिरङ कपक्नगा मोर वाटनल वेरि, दर्तुरितुने आयि, सेलेके सम्दुर्तुने आयि, सेलेके मरकुने आयि नुक्सन किय्मट” इन्जेर वेह्‍तोर.

4 अद आता पेजे मोर वाट्तुरा हिसोब वेह्‍नेके केन्ज्तोन.

अद हिसोब उंदि लाक चालिस नालुङ हजर्क (1,44,000) मांदि मत्ता.

वीर सम्दिर इज्रयेल लोकुरङ सम्दो कांदनुर आंदिर.

5-8 यूदा, रूबेन, गाद, असेर, नप्तालि, मनसे, सिमियोन, लेवि, इसकर, जेबुलुन, योसेप अनि बेंयमीन इंवलिक इव बारा (12) कांदनल, हर कांदतगा बारा हजर्क (12,000) मांदित पोरो मोर वाट्वल जर्ग्ता.

बगवंतना राजा-गादित मुने अनि बगवंतना गोरे पिला आय्वन मुने वेले मांदि निल्वल

9 इद आता पेजे, बोरे लेका किया परोर अचोर मांदि दिस्तेर.

वूर मांदित रोपो हर देसनल, हर जातितल, हर बासतल, हर पर्जतल मत्तेर.

वूर सम्दिर गिर दव्रलिक पाङुक केर्सि, केय्क्नगा कजुर मरक्नङ कांदङ पिय्सि मत्तेर.

वूर बगवंतना राजा-गादित मुने अनि बगवंतना गोरे पिला आय्वन मुने निल्सि मत्तेर.

10 वूर सम्दिर,

“राजा-गादितगा उच्चि मंवल बगवंतन

अनि बगवंतना गोरे पिला आय्वने बचि किय्वल सक्ति मंता!”

इन्जेर जोर्ते किलितेर.

11-12 अद आता पेजे राजा-गादित सिर्मुट, पेदोलकुन अनि स्वर्ग्नगा मंवलिक नालुङ जीवन सिर्मुट, बगवंतनुर दूतलिर सम्दिर निल्सि दिस्तेर.

वूर सम्दिर राजा-गादितुन मुने गप्ने अर्सि,

“मा बगवंतन डगुर-पान, मय्मा

गियन, मान, अदिकार अनि सक्ति बस्केट मंदना इन्जेर

दनेवाद्क वेह्‍चेर, आमेन!”

इन्जेर पार्तना-विंति कीतेर.

13 पेदोल्क्नगटल वोरोर, “वीर दव्रलिक पाङुक केर्तुर बूर आंदिर अनि बगटल वातेर?”

इन्जेर नाकुन पूसि कीतोर.

14 ते नना, “साब!

नाकुन टावा सेले बति, नीकुने टावा!”

इन्जेर वेह्‍तोन.

ते वोर ना सङा, “वीर बेय वेले दुक्सङ बोगे मासि, अवेन वीड्सि वातुर आंदिर.

वीर तम्वङ पाङुकुन गोरे पिला इंवना नेतुडगा सुक्सि, चक दव्रलिक कीतुर आंदिर.

15 अदेन साटिने वूर बगवंतना राजा-गादित मुने मन्जेर, रात-दिहा मंदिरतगा वोना सेवा कीसेर मंतेर.

राजा-गादितगा उच्चि मंवल वूर पोरो तंवा डेरा परुसि, काबाडंतोर.

16 वूरकुन इङेडल बस्केन कर वसो अनि येर वट्का वसो.

पोड्द तंवा येदिते वूरकुन मडुसो अनि दुस्रो बदे येदि गिर वूरकुन पायो.

17 बारितेके अद राजा-गादितुन नड्डुम^* मंवल गोरे पिला आय्वले वूरकुन गाय्कि आसि मंदंतोर.

जीवा निपुस्वल जलतगा वूरकुन ताकुसंतोर.

अनि बगवंतले वूरङ कड्कनल तूर्वल हर काडेडुन उस्मंतोर” इन्जेर वेह्‍तोर.