गोरे पिला आय्वल मोरकुन कोलि किय्वल
6
1 बगवंतना गोरे पिला आय्वल अव येडुङ मोर्कनल उंदितुन कोलि किय्वल सूड्तोन.
अस्के स्वर्ग्नगा मंवलिक अव नालुङ जीवनल उंदि गर्ज्वडुन मोडिता लेङ्ने ना सङा, “वरा!”
इंवल केन्ज्तोन.
2 ते हके सूड्नेके, उंदि दव्रल कोडा दिस्ता.
तान पोरो वोरोर उंदि बान पिय्सि उच्चि मत्तोर.
वोन उंदि किरिट सिय्वल जर्ग्ता.
लडेयतगा मेय्तोर वोर उंडे मुने मेय्ले सोत्तोर.
3 वोर गोरे पिला आय्वल रेंडवा मोरदुन कोलि कीता पेजे, स्वर्ग्नगा मंवल रेंडवा जीवा, ना सङा, “वरा!”
इन्जेर केय्वल केन्ज्तोन.
4 अस्के रगल रङ्ना उंदि कोडा बह्रि पेसिता.
दर्तुरित पोरो सांति सेल्वक किय्ले, माय्नलिर वोरोना वोरोर जकनल तान पोरो उच्चि मंवन अदिकार अनि वोना केय्दे उंदि डगुर तल्वर गिर सिय्वल जर्ग्ता.
5 वोर गोरे पिला आय्वल मूडवा मोरदुन कोलि कीता पेजे, स्वर्ग्नगा मंवल मूडवा जीवा, ना सङा, “वरा!”
इन्जेर केय्वल केन्ज्तोन.
अस्के सूड्नेके नाकुन उंदि कार्यल कोडा* दिस्ता.
तान पोरो ताग्डि पिय्सि, वोरोर उच्चि मत्तोर.
6 अस्के स्वर्ग्नगा मंवलिक अव नालुङ जीवन नड्डुमनल, “अद करुता गट्कते उंदि दियता बूतिते सिरिप उंदि किलो गोह्क सेलेके मूंद किलोङ वन्जिङ येता परंतेर.
बति ओलिवा मरकुन अनि आङुर्क्नङ वाडिन नुक्सन किय्वा” इन्जेर वेह्वल उंदि लेङ केन्ज्तोन.
7 वोर गोरे पिला आय्वल नाल्गवा मोरदुन कोलि कीता पेजे, स्वर्ग्नगा मंवल नाल्गवा जीवा ना सङा, “वरा!”
इन्जेर केय्वल केन्ज्तोन.
8 अस्के सूड्नेके नाकुन नीरदुन मोडिता रङ्ना उंदि कोडा दिस्ता.
तान पोरो उच्चि मंवना पोरोल ‘मरन्’ अनि वोन पेजेय, ‘साना लोकम’ वासेर मत्ता.
तल्वर्ते, करुते, बेमरिने, केडता जिव्रस्ने माय्नलिरकुन जक्ले, दर्तुरितङ नालुङ ईसनल उंदि ईसत पोरो, वोन अदिकार सिय्वल जर्ग्ता.
9 अय्दवा मोरदुन बगवंतना गोरे पिला आय्वल कोलि कीतोर.
अस्के बगवंतना वचंतुन पचर कीततुन हिंदल अनि तान साटि गवदार्क आसि निल्ततुन हिंदल बोनङ्ते परन्क सोत्तङो, वूरङ आत्मङ बलिदान सिय्वल बोव्लतुन बूड दिस्तङ.
10 वूर बेय जोर्ते, “सर्वा सक्तिवंतल पर्बु!
निमे सतेवंतनि अनि पवित्रवंतनि आंदि.
बस्के वेरि माकुन जक्तुरकुन तस्वा अनि सिक्सा किय्वक्ने मंदंति?”
इन्जेर किलितेर.
11 अद आता पेजे, हर वोरोन गिर दव्रल पाङुड सिय्वल जर्ग्ता.
अनि, “मी दाते मी बरोबर्तुर सेव्कलिरा अनि बक्तलिरा जीवा वूर येतंतेर.
इहिन साय्वलिरा इसोब निंदनल वेरि, मिरट उंडे जरसि कालम वेरि आरम कीसेर सूडा लागर” इन्जेर वेह्तोर.
12 वोर आरवा मोरतुन कोलि कीनेके, नना सूड्तोन.
अस्के उंदि बेय डगुर बूकंप वाता.
पोड्द्ना रङ कार्यल गम्डित दात मारिता अनि पूरो नेलेन्ज्ना रङ नेतुडुन मोडि मारिता.
13 अनि बेय वडि-दूंदड पेसितेके, हाले मासि बूड जडे माय्वलिक अन्जुरि पंडिन मोडि, हाबडङ सुकुक दर्तुरित पोरो अर्तङ.
14 हाबर कागुतुन मोडि गूंडे मासि, मयेडा आता.
हर उंदि गुटा अनि लंकङ अवेनङ जागनल बह्के मातङ.
15 अस्के इद दर्तुरित पोरो राज ताकुस्वलिर राजलिर, राजलिरुर मर्क, सिपायिरुर अदिकारिर, दनेवंतलिर, सक्तिवंतलिर, दासिर, दासिर आयुर वूर, बुयरिनगा अनि पेर्सङ गुटनगा मंवलिक बंडन नड्डुम मक्तेर.
16 वूर पेर्सङ गुटन अनि बंडन सङा, “मा पोरो अर्सि, राजा-गादितगा उच्चि मंवना नदुडल अनि बगवंतना गोरे पिला आय्वना सोङनल माकुन बचि कीम्ट.
17 बारितेके वोना सोङ तोह्वल दिवोस वाता.
तान उल्टा आसि बोर निला परनुर?”
इन्जेर किलितेर.