गूंडि कीसि, येडुङ मोर्क वाट्सि मंवल पान
5
1 अद आता पेजे, रंड बाज्क लिहि कीसि, गूंडि कीसि मंवल येडुङ मोर्क वाले उंदि पान, अद राजा-गादितगा उच्चि मंवना केय्दे दिस्ता.
2 अस्के, “गूंडि कीसि मंवल पांदगा चिप्तुंडुसि मंवलिक अव मोरकुन उरुसि कोलि किय्ले कामि सीनल बोर मंतोर?”
इन्जेर ताकद वाले वोरोर दूतल जोर्ते किलंडि वाट्तोर.
3 बति स्वर्ग्नगन आयि, दर्तुरितुन पोरोन आयि, दर्तुरितुन बूडे आयि, अद गूंडि कीसि मंवल पांदुन कोलि कीसि, सूडा परनल बोरे दिस्मकि.
4 अद गूंडि कीसि मंवल पांदुन कोलि कीसि, सूडा परनल बोरे कामि सीनल सेल्वा काड्कि, नना बेय दुक्सते आड्तोन.
5 अस्के वूर पेदोल्क्नगटल वोरोर ना सङा, “आड्मा!
इचुला!
अव येडुङ मोर्क वाले गूंडि कीसि मंवल पांदुन कोलि किय्ले, यूदा कांदता चिहो* इन्जेर केय्वल अनि दाविद्नोर मरि इंवल लडेयतुन मेय्सि मंतोर” इन्जेर वेह्तोर.
6 अस्के नना अद राजा-गादित, स्वर्ग्नगा मंवलिक अव नालुङ जीवन अनि पेदोलकुन नड्डुम गोटि कोय्तपिनय मंवल गोरे पिलतुन+ सूड्तोन.
तान येडुङ कोह्क अनि येडुङ कड्क मत्तङ.
अव कड्क दर्तुरित पोरो नालुङ कोन्क्नगा रोह्तङ अव बगवंतनङ आत्मङ आंदुङ.
7 बगवंतना गोरे पिला आय्वल वासि, राजा-गादितगा उच्चि मंवना तिना केय्दल अद पांदुन येत्तोर.
8 अस्के स्वर्ग्नगा मंवलिक अव नालुङ जीवङ अनि वीसा नाल्विर पेदोल्क, चोंड्कङ अनि दूप सिय्वलिक चीज्क्ने निन्चि मंवलिक सोनेतङ दूपेरङ पिय्सि, बगवंतना गोरे पिला आय्वन मुने गप्ने काल्क कर्तेर.
अव दूपेरङ बगवंतनुर लोकुरङ पार्तनङ आंदुङ.
9 अस्के वूर इद पूना कीर्तन:
“निमेय अद गूंडि कीसि मंवल पांदुन येच्चि,
तानङ मोरकुन कोलि किय्ले कामि सींति.
निमेय सम्दिरङ पापकुन कंडि किय्ले अर्पना आसि,
हर जातितल, हर बासतुर्गटल,
हर पर्जतल, हर देसनल,
बगवंतन साटि माय्नलिरकुन नीवा नेतुर सीसि येत्ति.
10 वोना राज्नगा मा बगवंतना सेवा किय्ले,
वूरकुन कटोडलिर मोडि नेमि कीतोर.
अनि वूर इद दर्तुरितुन पोरो राज ताकुसंतेर”
इन्जेर वार्तेर.
11 अद आता पेजे नाकुन स्वर्ग्नगा मंवलिक अव नालुङ जीवन सिर्मुट, राजा-गादित सिर्मुट अनि वूर पेदोलकुन सिर्मुट बेय वेलेटिर दूतलिरा लेङ केन्जा वाता.
वूरा लेका हजरो-हजर, करोडो-करोड मत्ता.
12 वूर सम्दिर जोर्ते,
“अदिकार, दन-दव्लत, गियन, ताकद, मान,
मय्मा अनि डगुर-पान येत्ले तंवा अर्पना कीतोर वोर गोरे पिला आय्वले कामि सींतोर”
इन्जेर वार्तेर.
13 अद गट्कते स्वर्ग्नगा, दर्तुरितगा, दर्तुरित बूड अनि सम्दुरतगा मंवलिक सम्दो इहिन,
“राजा-गादित पोरो उच्चि मंवन अनि गोरे पिलत मोडि तंवा अर्पना किय्वन,
बस्केट डगुर-पान, मान, मय्मा अनि सक्ति मंदना”
इन्जेर वेह्वल केन्ज्तोन.
14 स्वर्ग्नगा मंवलिक अव नालुङ जीवङ, ‘आमेन्’ इन्जेर वेह्ता पेजे, वूर पेदोल्क गप्ने अर्सि पार्तना-विंति कीतेर.