उजगिरि अरुस्वल 4

स्वर्ग्नगा बगवंतना पार्तना-विंति

1 इव सम्दो जर्ग्ता पेजे नना कड्क तह्‍चि पोरो सूड्तोन.

अस्के स्वर्ग्नगा उंदि कावड तेरिसि दिस्ता.

अनि तुरता आवजुन मोडि मत्ता अद मोदोडा लेङ ना सङा, “इगे पोरो वरा!

इद आता पेजे तप्वक जर्ग्ले मंवलिकुन बारेते तोहंतोन” इन्जेर वड्क्वल केन्ज्तोन.

2 अस्के येंटने पवित्रा आत्मा नाकुन तंवा सक्तिते आगुटि कीता.

अस्के स्वर्ग्नगा नाकुन उंदि राजा-गादि दिस्ता.

अद राजा-गादितगा वोरोर उच्चि दिस्तोर.

3 अगा उच्चि मंवना मोकोम बक मिड्च्वल सूर्यकांतम^* इंवल कंकरतुन दात अनि पद्मरागमु^* इंवल कंकरतुन दात दिस्ता.

अनि वोना राजा-गादित सिर्मुट मरकतमु^* इंवल कंकरतुन मोडि कमल-पटि मिड्चेर दिस्ता.

4 अद राजा-गादित सिर्मुट वीसा नालुङ (24) राजा-गादिङ वाट्सि मत्तङ.

अव राजा-गादिनगा वीसा नाल्विर (24) पेदोल्क दव्रलिक पाङुक पोंड्सि, तम्वङ तलनगा सोनेतङ किरिट्क केर्सि उच्चि दिस्तेर.

5 अद राजा-गादितल मिड्च्वल दिस्ता अनि गर्ज्वल आवज केन्जा वाता.

अनि राजा-गादित मुने येडुङ डिवेङ पोच्चेर मत्तङ.

अव डिवेङ बगवंतनङ येडुङ आत्मङ आंदुङ.

6 अनि अद राजा-गादित मुने बेय चक येर मंवल सम्दुर मत्ता.

अद राजा-गादित सिर्मुट स्वर्ग्नगा मंवलिक नालुङ जीवङ हर उंदि बाज निल्सि दिस्तङ.

अवेकुन मुने-पेजे पूरो कड्क मत्तङ.

7 अवेनल मोदोडा वाले जीवा चिहोत मोडि दिस्ता.

रेंडवा वाले जीवा कोंदत मोडि दिस्ता.

मूडवा वाले जीवता मोकोम माय्नन मोडि दिस्ता.

नाल्गवा वाले परिवल गंदडुन मोडि दिस्ता.

8 इव नालुङ्ते स्वर्ग्नगा मंवलिक जीवन सारुङ मारेल्क मत्तङ अनि अवेनङ मेंदोल्क कड्क्ने निन्चि मत्तङ.

रात-दिहा रोम्वक्ने,

“तोले, इंके अनि बविसत्ने मंवल सर्वा सक्तिवंतल पर्बु आय्वल बगवंतल

पवित्रवंतल आंदुर!

पवित्रवंतल आंदुर!”

इन्जेर वार्सेरेन मत्तङ.

9 राजा-गादित पोरो उद्वन, बस्केट जीवते मंवन, मय्मा, डगुर-पान वायना इन्जेर अव जीवङ दनेवाद वेह्‍चेर वार्तङ.

10 अव अहन वार्सेर मनेके, वूर वीसा नाल्विर पेदोल्क अद राजा-गादितगा उच्चि मंवन मुने गप्ने काल कर्सि, बस्केट जीवते मंवन पार्तना-विंति कीतेर.

अनि तम्वङ किरिट्क अद राजा-गादित मुने वाट्सि,

11 “मा पर्बु, मा बगवंता!

निमे नीवा इचा तीर हर उंदितुन गडि कीति,

अनि हर उंदि गिर अहन मंदना इन्जेर कीता काड्कि,

निमे वोरोनिये मय्मा, डगुर-पान अनि अदिकार येत्ले कामि सीनल मंति”

इन्जेर इत्तेर.