सार्दिस्नगा मंवल चर्चितुर साटि वचन
3
1 “सार्दिस्नगा मंवल चर्चितुरोर दूतन लिहि कीम.
बगवंतनङ येडुङ आत्मङ मंवल अनि येडुङ सुकुक मंवल इहिन वेह्चेर मंतोर:
“मिरट किय्वलिक काम्क नाकुन टावा.
मिरट जीवते मंतिट इंवल पोरोल मंता बति, सातपिनय आसि मंतिट.
2 ते दिहंते मन्जि, मिह्गा बतल्ते इचुसि मेय्सि मंतयो, अदेन काबाड्सि बडे मानल सूडट.
बारितेके ना बगवंतना नदुडे मिरट किय्वलिक काम्क उंडे गिर बर्पुर आय्लेके मंतङ.
3 मिरट बगवंतना बोदतुन बहन केन्ज्तिटो अनि बहन वोप्तिटो हेतु कीम्ट.
अदेन तीर ताकट अनि चुक चुके माम्ट.
बति मिरट दिहंते मंवेके दाकिट्ते, वोरोर कलेन मोडि अचनक वातपिनय, नना गिर मिह्गा वांतोन.
नना मिह्गा वाय्वल गट्का मीकुन असले टावा सेले.
4 “बति मिह्गटल कहितुर गल्ति काम्क्नगा कोंडे माय्वक, तम्वङ पाङुकुन पोरो पाप्ना डाग सेल्वक मंतेर.
वूर कामिसिय्वलिर आता काड्कि, दव्रलिक पाङुक पोंड्सि, ना बरोबर ताकंतेर.
5 करबुन मेय्वन, अद तीर्दे दव्रलिक पाङुक पोंडुस्वल जर्गंता.
स्वर्ग्नगा बस्केट जीवते मंवलिरङ पोरोल्क मंवल जीवता ग्रंतनल वूरङ पोरोलकुन नासि कियोन.
नना वूरकुन नावुर इन्जेर ना बाबोन मुने, वोनुर दूतलिर मुने वोपंतोन.
6 “बगवंतना आत्मा चर्चितुर साटि वेह्वडुन अर्तम कीका इंवल दिहंते केन्जना!
पिलदेल्पियतगा मंवल चर्चितुर साटि वचन
7 “पिलदेल्पियतगा मंवल चर्चितुरोर दूतन लिहि कीम.
पवित्रवंतल, सतेवंतल अनि दाविद्ना कुन्जि* मंवल, तेरितोर इत्तेके तान बोरे मुहा परुर.
अनि वोर मुह्तोर इत्तेके, बोरे तेरिया परोर.
वोर इहिन वेह्चेर मंतोर:
8 “मिरट किय्वलिक काम्क नाकुन टावा.
इचुला!
जिगि सेल्वक मनेके गिर, मिरट नावा वचन तीर ताक्तिट.
अनि नावा पोरोल्डुन साटि गवदार्क आसि मंतिट.
अदेन साटि मी मुने नावा कावड तेरिसि इर्तोन.
अदेन बोरे मुहा परुर.
9 केन्जट!
तमा यूदुल्क आय्वेके गिर यूदुल्क आंदुम इंवलिर, सय्तंदा बाज्नुर मीवङ काल्क्नगा मुर-टोङ्रङ कोट्सि, मानि कीनल कींतोन.
अस्के नना मीकुन बचोर पेर्मा कींतोनो, वूर करि कींतेर.
10 “मिरट तक्लिबकुन वोर्चेर मुने दायना इन्जेर आगे सीतोन.
अद आगे पिय्सि ताक्ता काड्कि, परिक्सा किय्वल गट्कते मीकुन बचि कींतोन.
इद परिक्सा किय्वल गट्का दुनियतुर सम्दिर पोरो वाय्वल मंता.
11 केन्जट!
नना सप्ने मल्सि वाय्वना मंतोन.
मीकुन पुट्वल इनम्ना किरिटुन बोरे कल्वक मनल, इंके मिरट पिय्सि ताक्वलिकुन उंडे गट पिय्सि ताकट.
12 इहिन करबुन मेय्तुरकुन, नावोर बगवंतना मंदिरतगा मोग्रमकुन मोडि इरंतोन.
अद जागतुन सुटि कीसि, वूर बेकेन सोनुर.
नना नावोर बगवंतना पोरोल अनि ना बगवंतना नगुर आय्वल पूना येरुसलेम्ना पोरोल, वूर पोरो लिहि कींतोन.
इद येरुसलेम स्वर्ग्नगा मंवल ना बगवंतनल रेय्सि वांता.
नावा पूना पोरोल गिर वूर पोरो लिहि कींतोन.
13 “बगवंतना आत्मा चर्चितुर साटि वेह्वडुन अर्तम कीका इंवल दिहंते केन्जना!
लवोदिकयतगा मंवल चर्चितुर साटि वचन
14 “लवोदिकयतगा मंवल चर्चितुरोर दूतन लिहि कीम.
इव गोस्टिन, ‘आमेन्’ इन्जेर केय्वल* अनि वोन हिंदले कलितगा मंवलिक सम्दोन बगवंतल गडि कीतोर, वोर बरोसा वाले अनि करल गवदारल इहिन वेह्चेर मंतोर:
15-16 “मिरट किय्वलिक कामकुन बारेते नाकुन टावा.
इव काम्क नह्गा बर्पुर बरोसा इर्सि किय्वलिरन मोडि कास्तङ सेलेङ अनि नाकुन उल्टा तिरिवलिर किय्वलिकुन मोडि किनन गिर सेलेङ.
बद तेर उंदि तीर्दे मंदना इंवले नावा इचा.
इत्तेके येतुन मोडि कास्ता मंवक्ने किनन मंवक्ने निस्तो मलमला मंतिट.
अदेन साटि ना तोड्दल मीकुन बह्रि उस्क्सि वाट्वना मंतोन.
17 ‘ममोट दनेवंतलिर आंदुम.
मह्गा जाय्जत वेले मंता.
माकुन बततय कमि सेले’ इन्जेर मिरट इंतिट.
बति मिरट दिक सेलुर वूर आंदिट.
मी पोरो किवुल वानल मीवा गति मंता.
मिरट गरिब-पांदे मंतिट.
मिरट गुड्डिर आसि मंतिट अनि कुडेकेय मंतिट इंवलिक बवे मीकुन टावा सेले.
18 अदेन साटि मीकुन सूचना वेह्वल बतल इत्तेके, मोका मिरट दनेवंतलिर आकोम इंद्किट्ते, कोल्मितगा गरि कीता पिवर सोने नह्गा मंता.
अदेन येतट.
अनि मिरट कुडेका दिसि, मीवा हिजत सोंवक मंले, पोंड्ले दव्रलिक कप्डिङ नह्गा मंतङ अनि मीवङ कडकुन साटि मत गिर मंता.
अवेन नह्गटल येतट.
अस्के मिरट तात्कर सूडा परंतिट.
19 नना लाड किय्वलिर सम्दिरकुन दम्कि सीसि, जरब्ने इरंतोन.
अदेन साटि आसते लह्कि वर्सि, चुक चुके मासि मंदुन मार्युसट.
20 “इचुला!
नना कावडुन करुम निल्सि, तापि कीसेर मंतोन.
बोरे नावा लेङ केन्चि, कावड तेरितेके, नना रोपो सोन्जि, वोन सङा मीरे मासि जेवुन कींतोन.
21 नना करबुन मेय्सि, ना बाबोन सङा, वोना राजा-गादितगा उच्चि मंतोन.
अदे तीर्दे करबुन मेय्तोर वोन, ना सङा नावा राजा-गादितगा उदा सींतोन.
22 “बगवंतना आत्मा चर्चितुर साटि वेह्वडुन अर्तम कीका इंवल दिहंते केन्जना” इन्जेर वेह्तोर.