एपेस्नगा मंवल चर्चितुर साटि वचन
2
1 “एपेस्नगा मंवल चर्चितुरोर दूतन लिहि कीम.
येडुङ सुकुकुन तंवा तिना केय्दे पिय्सि, सोनेतङ येडुङ दीसोडन नड्डुम तिरिवल इहिन वेह्चेर मंतोर:
2 “नीवङ कामकुन बारेते, नीवा काया-कस्टमुन बारेते अनि नीवा वोर्च्वडुन बारेते नाकुन टावये.
निमे करेबलिरकुन वोर्च्वि अनि अपोस्तुल्क आय्वेके गिर अपोस्तुल्क आंदुम इन्जेर वेह्वलिरकुन परिक्सा कीसि, पकट्क आंदिर इन्जेर करि कीति.
3 निमे वोर्चेर, नावा पोरोडुन साटि वेले काया-कस्टम कीसि गिर अविमकि इन्जेर नना करि कीतोन.
4 “तेर बति मोदोल नी रोपो मत्ता अद पेर्मतुन, इंके सुटि कीति इन्जेर, नना नी पोरो उंदि बद्नम दोसेर मंतोन.
5 निमे बूड अर्वक मनेके, ना सङा बचोर चोकोट मत्तियो, अदेन हेतु कीम.
अनि चुक चुके मासि निमे मोदोल कीता तीर काम्क कीम.
इहिन निमे चुक चुके मासि, किय्वेके दाकिते नना वासि, नीवा दीसोडतुन ताना जागतल तेंडंतोन.
6 बति नी रोपो उंदि चोकोट्ना गोस्टि दिस्ता.
बतल इत्तेके, नाकुन बहंते निकोलस्ना बोदा पिय्सि ताक्वलिरङ काम्क मेच्चा वसोयो, अह्ने नीकुन गिर वूरङ काम्क मेचा वसो.
7 “बगवंतना आत्मा चर्चितुर साटि वेह्वडुन अर्तम कीका इंवल दिहंते केन्जना!
करबुन मेय्वलिरकुन बगवंतना बस्केट मंवल सोबता वाडिता* जीवा निपुस्वल मरता पंडितुन तिंले हक सींतोन.
स्मुरुनतगा मंवल चर्चितुर साटि वचन
8 “स्मुरुनतगा मंवल चर्चितुरोर दूतन लिहि कीम.
मोदोडोर अनि आक्रितोर आय्वल अनि सासि-नेंड्सि जीवतेन मंवल इहिन वेह्चेर मंतोर:
9 “मीवा दुक्सतुन बारेते अनि मीवा गरिब-पांदुन बारेते नाकुन टावा.
तेर बति मिरट दनेवंतलिरे आंदिट.
मी बारेते कहितुर करब वड्क्सेर मंतेर.
वूर तम्वा तमा यूदुल्क आंदुम इंतेर बति, वूर असले यूदुल्क आयुर.
बारितेके वूर सय्तंदा बाज्नुर आंदिर.
10 मीवा बरोसतुन परिक्सा कियना इन्जेर, मिह्गटल कहितुरकुन सय्तन, इङे वेय्ने जेल्क्नगा वाटुसंतोर.
दहा रोज्क मिरट दुक्सा बोगे माया लागर.
बति इवेन बारेते वेरिमट.
मरन आनल वेरि ना पोरो बरोसते मंट.
अस्के मीकुन जीवता किरिट सींतोन.
11 “बगवंतना आत्मा चर्चितुर साटि वेह्वडुन अर्तम कीका इंवल दिहंते केन्जना!
करबुन मेय्वलिरकुन बगवंतल रेंडवा मरंतुन+ हिंदल, नुक्सन जर्गसियोर.
पेर्गमम्नगा मंवल चर्चितुर साटि वचन
12 “पेर्गमम्नगा मंवल चर्चितुरोर दूतन लिहि कीम.
रंड काक दार वाले तल्वर मंवल इहिन वेह्चेर मंतोर:
13 “सय्तंदा कचुरि मंवल जागतगा मिरट पिसेर मंतिट इंवल नाकुन टावा.
अहन मनेके तेर बति, नावा पोरोडगा बर्पुर बरोसा इर्तिट.
अगा अंतिपस इंवल बरोसतोर गवदारना जीवा येत्तेर.
तेर बति, मिरट मीवा बरोसतुन सुटि किय्मकि.
14 “बति मी पोरो कहितङ बद्नम्क दोसेर मंतोन: अव बव इत्तेके, बिलाम्ना बोदा तीर+ ताक्वलिर कहितुर मी रोपो मंतेर.
मूर्तिनगा अर्पना सीतङ अवेन तिनल अनि लन्जेतनम कीनल इज्रयेल पर्जतुन करुसि, वूरकुन कोदा पासि अरुसना इन्जेर बालकुन, वोर बिलामु करुस्तोर.
15 अदे तीर्दे निकोलस्ना बोदा तीर ताक्वलिर गिर मी नड्डुम मंतेर.
16 अदेन साटि मिरट चुक चुके मासि, अवेन सुटि कीम्ट.
सुटि किय्वेके दाकिट्ते नना कोरुम किय्वक मिह्गा वासि, नावा तोड्दल वाय्वल तल्वर्ते वूर सङा लडेय कींतोन.
17 “बगवंतना आत्मा चर्चितुर साटि वेह्वडुन अर्तम कीका इंवल दिहंते केन्जना!
करबुन मेय्वलिरकुन दिस्वक मंवल स्वर्ग्ना मंना+ इंवल कानेतुन सींतोन.
अदे तीर्दे हर वोरोन पूना पोरोल चेक्सि मंवल उंदि दव्रल बंडतुन सींतोन.
अद बंडतुन येत्वन तपुसि, दुस्रोन बोने अगा मंवल पोरोडा अर्तम टावा सेले.
तुयतय्रतगा मंवल चर्चितुर साटि वचन
18 “तुयतय्रतगा मंवल चर्चितुरोर दूतन लिहि कीम.
तड्मितङ जारकुन मोडि कड्क मंवल अनि कोल्मितगा कासुस्ता पेजे मिड्च्वल पितुडुन मोडि काल्क मंवल बगवंतनोर मरि इहिन वेह्चेर मंतोर:
19 “मीवङ काम्क, मीवा पेर्मा, मीवा बरोसा, मीवा सेवा अनि मीवा वोर्च्वडुन बारेते नाकुन टावा.
मीवङ मोदोडङ चोकोट्नङ कामकुन तेर मिरट इंके किय्वलिक काम्क वेले अदिक्नङ आंदुङ इन्जेर गिर नाकुन टावा.
20 बति नना मी पोरो उंदि बद्नम दोसेर मंतोन: अद बतल इत्तेके, येजेबेल* इंवल तंवा तना पर्वक्ति इन्जेर केय्वल वेय्लोन मी नड्डुम मंदा सीसेर मंतिट.
अद तंवा बोदते नावुर सेव्कलिर लन्जेतनम कीनल, मूर्तिनगा अर्पना सीततुन तिनल बह्कि कीसेर मंता.
21 तंवा लन्जेतनम्नङ पापकुन बारेते चुक चुके माय्ले, तान वकत सीतोन.
बति अद चुक चुके माय्ले वोप्सेर सेले.
22 अदेन साटि नना तान कटुल पियुसंतोन.
अनि तान सङा मींड्वलिर तमा पीर कीततुन बारेते चुक चुके माय्वेके दानिर्ते, वूर पोरो बेय दुक्सा वायुसंतोन.
23 तानुर मरि-मियडा परन येतंतोन.
अस्के मन-दिल्क्नगा मंवलिकुन परिक्सा किय्वना ननय आंदुन इन्जेर सम्दि चर्चिनुर करि कींतेर.
हर वोरोर कीतङ कामकुन पिय्सि, अवेना पंडि वूरकुन सींतोन.
24-25 बति तुयतय्रतगा मंवलिर कड्मतुर मिरट, ताना बोदतुन वोप्सि ताक्मकि.
इत्तेके सय्तंदङ मक्डिते मंवलिकुन बारेते वूर दुस्रुर दात करिमकि.
अदेन साटि मी पोरो दुस्रो बदे वजन वाटोन.
बति नना वानल वेरि, नह्गा इर्ता मीवा बरोसतल बह्के माय्वक्ने गट पिय्सि ताकट.
26-28 “करबुन मेय्सि, आक्रि वेरि नावा इचा तीर ताक्वलिरकुन जातिन पोरो अदिकार सींतोन.
‘वूर पोरो वोर बेय कडक राज ताकुसंतोर.
वूर कुमना बुडित मोडि वोर्सि, बिचङ बिचङ आंतेर.’
+
“इद अदिकार नाकुन बाबो बगवंतल सीतोर.
बाव-बक्तिता लडेयतगा मेय्तुरकुन गिर इदेन सींतोन. अदे तीर्दे वूर पोरो वेड्चि पारुस्ले, सकेडा सुकुमुन* सींतोन.
29 “बगवंतना आत्मा चर्चितुर साटि वेह्वडुन अर्तम कीका इंवल दिहंते केन्जना!