उजगिरि अरुस्वल 1

उजगिरि अरुस्वल

उजगिरि अरुस्वल पुस्तक

वोड्कि अरुस्वल गोस्टि

1 इद पुस्तक्नगा लिहि कीसि मंवलिक गट्नङ येसु किरिस्तु उजगिरि अरुस्तङ आंदुङ.

इंके तप्वक जर्ग्ले मंवलिक मक्डितङ गट्नन बारेते, बगवंतल तंवुर सेव्कलिरकुन उजगिरि अरुसना इन्जेर, येसुन वेह्‍तोर.

ते वोर येसु इव गट्नन बारेते वेह्‍चि तोहना इन्जेर तंवोर दूतन, सेव्कल आय्वल योहंतगा रोह्‍तोर.

2 ते योहन बगवंतना वचंतुन बारेते, अनि येसु किरिसतुन बारेते, तना कुद सूड्ता तीर सम्दोन गवा सीतोर.

3 बगवंतल वेहुस्तङ इव गोस्टिन वाचि किय्वलिर अनि इवेन केन्चि, पिय्सि ताक्वलिर आसिर्वाद येतंतेर.

बारितेके इव जर्ग्वल वकत करुम येव्ता.

येडुङ चर्चिनुरकुन दंडोस

4-5 आसिया येरियतगा मंवलिक येडुङ चर्चिनुरकुन योहन इंवना दंडोस दोसि लिहि कीसेर मंतोन.

बतल इत्तेके, तोले, इंके अनि बविसत्ने मंवनल, वोना राजा-गादित मुने मंवलिक येडुङ आत्मनल अनि येसु किरिस्तुनल मीकुन पेर्मता-दया अनि सांति पुटि!

वोर येसु बरोसतोर गवदारल आंदुर.

सासि-नेंड्सि मर्ला साय्मकि वूर्गटल मोदोडोर वोरे आंदुर.

दर्तुरित पोरो राज ताकुस्वलिर सम्दिरकुन अदिकारि वोरे आंदुर.

वोर माकुन लाड कीतोर अनि तंवा नेतुर सीसि, पाप्कनल माकुन सुटि कियुस्तोर.

6 वोना राज्नगा तंवोर बाबो आय्वल बगवंतना सेवा किय्ले, माकुन कटोडलिर मोडि नेमि कीतोर.

मय्मा अनि अदिकार पिडिनङ-पिडिङ वोने वायना!

आमेन.

7 इचुला!

वोर टेपन पोरो वासेर मंतोर.

⁺

वोन कोट्तुर वूरे आय्वा,⁺

हर वोरोर गिर वोन सूडंतेर.

दर्तुरितगा मंवलिर सम्दो जातिनुर गिर वोन सूड्सि,

कला कला आसि दुक्सते आडंतेर.

ते अदे तीर्दे जर्गि! आमेन.

8 “ननय अल्पाता^* आंदुन अनि ननय ओमेगाता^* आंदुन” इन्जेर पर्बु इंतोर.

वोर सर्वा सक्ति वाले पर्बु आय्वल बगवंतले तोले, इंके अनि बविसत्ने मंवल आंदुर.

स्वर्ग्नोर मायनल आय्वल किरिसतुन बारेता दर्सन

9 नना मी बरोबर्तोर बक्तल आय्वल योहंता आंदुन.

पर्जा मीकुन दुक्सा सीतपे नाकुन गिर सीसेर मंतेर.

इव सम्दोन वोर्चि बोगे मासेर मंतोन.

बारितेके नना गिर मी दाते बगवंतन नावोर राजल इन्जेर वोप्सि, मी बरोबर येसुनगा येकि आसि मंतोन.

नना बगवंतना कबुडुन पचर किय्वडुन हिंदल, अनि येसुन साटि गवदारना आय्वडुन हिंदल, वूर नाकुन पत्मास इंवल लंकतगा इर्तेर.

10 पर्बुना दिवोसुन नेटि पवित्रा आत्मा नाकुन तंवा सक्तिते आगुटि कीता.

अस्के नाकुन पेजेटल तुरता आवजुन मोडिता लेङ वाले, बोरो वोरोना लेङ केन्जा वाता.

11 वोर ना सङा, “निमे सूड्वडुन उंदि गूंडि कीसि इर्वल पांदगा लिहि कीसि एपेस, स्मुरुना, पेर्गमम, तुयतय्रा, सार्दिस, पिलदेल्पिया, लवोदिकया इंवलिक येडुङ चर्चिनुरकुन रोहा” इन्जेर वेह्‍वल केन्ज्तोन.

12 ते ना सङा बोर वड्कंतोर बेहे इन्जेर पेजे तिरितोन.

अस्के नाकुन सोनेतङ डिवेङ मंवलिक येडुङ दीसोडङ दिस्तङ.

13 अवेन नड्डुम स्वर्ग्नोर माय्नन मोडितोर मायनल नाकुन दिस्तोर.

वोर केर्ता लाम आङ्डे बूड अरिकाल्क वेरि मत्ता.

वोना सातित पोरो सोनेता पटि मत्ता.

14 वोना तला अनि तलदङ केल्क तिकल कापुसुन मोडि सेलेते दव्रल चेलितुन मोडि मत्तङ.

वोनङ कड्क तड्मितङ जारकुन मोडि मत्तङ.

15 वोनङ अरिकाल्क कोल्मितगा कासुस्ता पेजे मिड्च्वल पितुडुन मोडि मत्तङ.

वोना लेङ येता बोद्रता आवजुन मोडि मत्ता.

16 वोर तंवा तिना केय्दे येडुङ सुकुकुन पिय्सि मत्तोर.

वोना तोड्दल रंड काक दार मंवल तल्वर पेसिसेर मत्ता.

⁺ वोना मोकोम बार दुपरि बक्ने वेड्चि सिय्वल पोडदुन मोडि मत्ता.

17-18 नना वोन सूड्ता बरोबर जीवा सोत्तोन मोडि वोनङ काल्क्नगा सतेलम अर्तोन.

अस्के वोर तंवा तिना केय ना पोरो इर्सि, “वेरिमा!

ननय मोदोडोना अनि आक्रितोना आंदुन.

जीवते मंवना आंदुन.

नावा मरन आसि मत्ता बति, इचुला!

पिडिनङ-पिडिङ जीवतेन मंवना आंदुन.

मरंतङ अनि साना लोकम्नङ कुन्जिङ नह्‍गने मंतङ.^*

19 अदेन साटि निमे सूड्ति अवेन, इंके मंवलिकुन अनि उंडे मुने जर्ग्वलिकुन बारेते लिहि कीम.

20 निमे नावा तिना केय्दे सूड्तङ अव येडुङ सुकुक्ना अनि अव येडुङ दीसोडना अर्तम बतल इत्तेके: येडुङ दीसोडङ, येडुङ चर्चिनुर लोकुर आंदिर.

अनि येडुङ सुकुक इत्तेके, अव चर्चिनुरा चोकोट-वायुट सूड्वलिर येड्विर दूतलिर आंदिर.