बगवंतना गोरे पिला आय्वल अनि वोना पर्जा
14
1 नना उंडे गिर अहन सूड्सेर मनेके, सियोन गुटत पोरो बगवंतना गोरे पिला आय्वल निल्सि दिस्तोर.
अगा वोन सङा, वोना अनि वोनोर बाबोना पोरोल कपडगा लिहि कीसि मंवलिर, उंदि लाक चालिस नालुङ हजर्क (1,44,000) मांदि गिर मत्तेर.
2 येता बोद्रता अनि जोर्ते गर्ज्वडुन मोडिता आवज स्वर्गनल वाय्वल केन्ज्तोन.
अद आवज चोंड्कन नेकुस्तेके वाय्वल आवजुन मोडि मत्ता.
3 वूर उंदि लाक चालिस नालुङ हजर्क मांदि बगवंतना राजा-गादित मुने, स्वर्ग्नगा मंवलिक अव नालुङ जीवन मुने अनि वूर पेदोलकुन मुने निल्सि, पूना कीर्तन वार्सेर मत्तेर.
दुनियतल बचे मातुर वीर तपुसि, दुस्रुर बूरे अद पाटतुन करिया पर्मकि.
4 वीर मांदि मर्मिङ आय्वक्ने, वेय्लोकनल लङ मन्जेर, तम्वा तमा सुदुड इर्तुर आंदिर.
गोरे पिला आय्वल बगा सोत्तेके गिर वोन पेजेय वीर सोंवलिर आंदिर.
वीरे बगवंतन साटि अनि गोरे पिला आय्वन साटि माय्नलिर सम्दिर्गटल बचे मासि, मोदोल पंड्ता पंटत मोडितुर आंदिर.
5 वीर बस्केन लबड वड्क्तुर आयुर अनि बे-कसुर वालिर आंदिर.
मुविर दूतलिर
6 अद आता पेजे नाकुन दुस्रुर मुविर दूतलिर्गटल मोदोडोर दूतल हाबडगा परिसेर दिस्तोर.
वोन्गा दर्तुरितगा पिस्वलिर इत्तेके, हर उंदि देस्नुर, हर जातितुर, हर बासतुर अनि पर्जतुन साटि पह्जे मंवल बस्केट जीवते मंवडुन बारेता चोकोट्ना कबुर मत्ता.
7 ते वोर बेय जोर्ते, “बगवंतन वेरियट अनि वोन डगुर-पान वानल पिसट.
वोर तस्वा किय्वल वकत करुम वाता.
हाबडुन, दर्तुरितुन, सम्दुरतुन अनि येतङ जलन गडि कीतोर वोन पार्तना-विंति कीम्ट” इन्जेर येलन कीतोर.
8 वोन पेजेय रेंडवा वाले दूतल वासेर, “बबुलोन नगुर नासेडम आता.
अचोर पेर्सा मंवल अद नगुर पूरो नासेडम आता.
बगवंतन सोङ तरुस्वल ताना लन्जेतनम इंवल आङुर्क्ना कलदुन सम्दो जातिनुरकुन उह्ता” इन्जेर येलन कीतोर.
9-10 वूर इविर पेजेय मूडवा दूतल वासेर, “बूरे आयि अद जंवरतुन, सेलेके ताना पुत्लतुन पूजा कीतेकेन आयि, सेलेके ताना मोर बूरय कपडगा मत्तेकेन आयि, सेलेके केय्दगा मत्तेकेन आयि, वूर बगवंतना सोङ इंवल कलदुन उंडय लागर.
कल्ति सेले अद सोङ इंवल आङुर्क्ना कलदुन बगवंतल चंबुतगा वेडितोर.
अहन किय्वलिरकुन पवित्रा दूतलिर मुने, गोरे पिला आय्वन मुने, गंदोक्ने रमा रमा पोत्वल तड्मितगा दुक्सा सिय्वल जर्गंता.
11 अहन वूर वेनेके पेसिवल पोया बस्केट पोरो तेच्चेरेन मंदंता.
अद जंवरतुन, सेलेके ताना पुत्लतुन पूजा किय्वलिरकुन, सेलेके ताना मोर मंवलिरकुन रात-दिहा जरा गिर आरम मनो” इन्जेर जोर्ते येलन कीतोर.
12 इत्तेके, बगवंतनङ आगेङ पिय्सि ताक्वलिर बक्तलिर अनि येसुनगा बरोसा इर्वलिर दुक्सङ वोर्चेर ताका लागर.
13 अद आता पेजे, स्वर्गनल उंदि लेङ, “इङेडल पर्बुनगा बरोसा इर्सि, मरन आतुर वूर आसिर्वाद येतंतेर इंवल मुके गोस्टितुन लिहि कीम” इन्जेर नाकुन केन्जा वाता.
“हो!
इद सतेम आंद.
वूरकुन आरम पुटंता.
वूर कीतङ काम्क वूर पेजेय दांतङ” इन्जेर आत्मा जवब वेह्वल केन्ज्तोन.
दर्तुरित पोरोडा पंटा कोय्वल
14 नना अह्ने सूड्सेर मनेके, नाकुन उंदि दव्रल टेपा अनि तान पोरो स्वर्ग्नोर माय्नन मोडितोर वोरोर उच्चि दिस्तोर.
वोना तलदगा सोनेता किरिट मत्ता अनि वोना केय्दगा दार वाले सेटेड मत्ता.
15 अस्के बगवंतनोर वोरोर दूतल मंदिर्तल बह्रि वासि, टेपतगा उच्चि मंवन सङा, “दर्तुरित पोरो पंटा पंड्ता.
अदेन निमे कोय्वल वकत वाता.
अदेन साटि अद पंटतुन नीवा सेटेडे कोया” इन्जेर जोर्ते वेह्तोर.
16 ते अद टेपत पोरो उच्चि मंवल दर्तुरितगा तंवा सेटेड चह्तोर.
अस्के दर्तुरिता पंटा कोय्वल जर्ग्ता.
17 अद आता पेजे, स्वर्ग्नगा मंवल मंदिर्तल उंडे वोरोर दूतल वातोर.
वोन्गा गिर दार वाले सेटेड मत्ता.
18 उंडे वोरोर दूतल बलिदान सिय्वल बोव्लतल वातोर.
वेर दूतल तड्मित पोरो अदिकार वाले आंदुर.
सेटेड पिय्सि मंवल दूतन सङा वेर जोर्ते, “दर्तुरित पोरोडा वाडितङ आङुर्क्ना पंटा पंड्ता.
दार वाले नीवा सेटेड चह्चि, आङुर्क्नङ गुतिङ कोया” इन्जेर वेह्तोर.
19 ते वोर दूतल तंवा सेटेड चह्चि, दर्तुरित पोरोडा आङुर्क्ना वाडितङ गुतिङ कोय्सि, बगवंतना सोङ इंवल पंडिङ दीव्स्वल नारिता बंडतगा वाड्तोर.
20 नगुडुन बह्रि मंवल अद बंडतगा आङुर पंडिन दीव्स्वल जर्ग्ता.
अद बंडतल लग-बग नूर (100) कोस्क लङ वेरि अनि रंड मीटर्क कोल नेतुर पोङ्ता.