उजगिरि अरुस्वल 15

येडुङ गंडम्क पिय्सि येड्विर दूतलिर निल्वल

1 अनि नना स्वर्ग्नगा उंडे उंदि मय्मता सूड्तोन. अद बतल इत्तेके, येडुङ गंडलकुन केय्दे पिय्सि येड्विर दूतलिर दिस्तेर. बगवंतना सोङ तोह्‍ले, वाप्रि किय्वलिक इवे आक्रितङ गंडम्क आंदुङ.

2 सीसा अनि तड्मि मिसडि मंवल सम्दुर नाकुन दिस्ता. जंवरतुन, ताना पुत्लतुन अनि ताना पोरोल्दा नंबरतुन पोरो लडेय कीसि मेय्तुर वूर, अद सम्दुर्ता डर्डितगा निल्सि दिस्तेर. वूरङ केय्क्नगा बगवंतल सीतङ चोंड्कङ पिय्सि मत्तेर. 3 बगवंतनोर सेव्कल आय्वल मोसेना पाटतुन अनि गोरे पिला आय्वना पाटतुन,

“सर्वा सक्तिवंतल पर्बु आय्वल बगवंता!

नीवङ काम्क बेय डगुक अनि चमत्कार्दङ आंदुङ.

पिडिनङ-पिडिङ सम्दो जातिनुरकुन निमेय राजनि आंदि.

नीवङ सरिङ सतेम्नङ अनि नायम्नङ आंदुङ.

4 पर्बु! सिरिप निमेये पवित्रा वालेनि आता काड्कि,

नीकुन वेरिवक बोर मंदा परंतेर?

नीवा पोरोलदुन डगुर-पान सिय्वक बोर मंदंतेर?

नीवङ नियत्नङ काम्क तात्कर दिसंतङ.

अदेन साटि पर्जा सम्दिर वासि नीकुन पार्तना-विंति कींतेर”

इन्जेर वार्तेर.

5 अद आता पेजे स्वर्ग्नगा मंवल मंदिरतुन सूड्तोन. इत्तेके, पवित्रा जागा उग्डो आसेर दिस्ता. 6 अद मंदिर्तल येड्विर दूतलिर येडुङ गंडल्क पिय्सि, बह्‍रि वातेर. वूर चक दव्रलिक पाङुक पोंड्सि मत्तेर. वूरा सातित पोरो सोनेता पटि केर्सि मत्तेर. 7 अस्के स्वर्ग्नगा मंवलिक अव नालुङ जीवनल, उंदि बस्केट जीवते मंवल बगवंतना सोङ्ने निन्चि मंवलिक सोनेतङ येडुङ टगोरन वीर दूतलिरा केय्दे अंदुस्ता. 8 अस्के अद मंदिर पूरो बगवंतना सक्तिते अनि वोना मय्मता वेड्चिता पोयते निंता. अदेन साटि बगवंतनुर येड्विर दूतलिर अनि येडुङ गंडल्क बर्पुर जर्गनल वेरि रोपोडा मंदिरतगा बोरे नेङा पर्मकि.

उंडे करि कीका इंदकिते, www.koyang.in सूडा.