सोङ्ने निन्चि मंवलिक येडुङ टगोरङ
16
1 अद मंदिर्तल उंदि लेङ जोर्ते वूर येड्विर दूतलिर सङा, “बगवंतना सोङ्ने निन्चि मंवलिक अव येडुङ टगोरन वोसि, दर्तुरित पोरो वेडियट!”
इन्जेर वेह्वल नाकुन केन्जा वाता.
2 ते मोदोडोर दूतल सोन्जि, तंवा टगोरतुन बोमित पोरो वेडितोर.
अस्के जंवर्ता मोर मंवलिरा मेंदोड पोरो, अद जंवर्ता पुत्लतुन पूजा कीतुरा मेंदोडुन पोरो लेसा लेसा पुन्क आतङ.
3 अद आता पेजे रेंडवा दूतल, तंवा टगोरतुन सम्दुरतुन पोरो वेडितोर.
अस्के अद सम्दुर कूरदुन रोपो मंवल नेतुडुन मोडि मारिता.
ते सम्दुरतगा जीवते मंवलिक सम्दो सातङ.
4 मूडवा दूतल तंवा टगोरतुन लव्डिन पोरो अनि जलन पोरो वेडितोर.
अवेना येर नेतुडुन मोडि मारिता.
5 अस्के येतुन पोरो अदिकार मंवल दूतल,
“ये पवित्रा वाले बगवंता!
तोले, इंके अनि बविसत्ने मंवनि निमेय आंदि.
निमे किय्वल तस्वा बरोबर आंद.
6 वूर नीवुर बक्तलिरा, पर्वक्तलिरा नेतुर तुह्तेर अनि वूरा जीवा येत्तेर.
अदेन साटि निमे वूर उंले नेतुर सीति.
वूरकुन बतल पुटनयो अद बरोबर पुट्ता”
इन्जेर वेह्तोर.
7 अस्के बलिदान सिय्वल बोव्लतल,
“हो, निमे सर्वा सक्तिवंतल पर्बु आय्वल बगवंतनि आंदि.
निमे किय्वल तस्वा सतेम्ना अनि नायम्ना आंद”
इंवल उंदि लेङ केन्जा वाता.
8 नाल्गवा दूतल तन्गा मंवल टगोरतुन पोडदुन पोरो वेडितोर.
अस्के लोकुरकुन मडुस्ले अद पोडदुन अदिकार पुड्ता.
9 ते लोकुर बेय दगड्ते मडुतेर.
अस्के इव गंडमकुन पोरो अदिकार वाले बगवंतन रेह्चि वड्क्तेर.
बति वूर तम्वङ पापकुन बारेते चुक चुके माय्मकि.
अनि वोर बगवंतन डगुर-पान सिय्ले गिर वोप्मकि.
10 अय्दवा दूतल तंवा टगोरतुन अद जंवर्ता कचुरित पोरो वेडितोर.
अस्के ताना राज पूरो कह्चर सिकटि आता.
लोकुर अद दुक्सतुन आपुसा पर्वा सोन्जि, तम्वङ वेन्जेक कच्तेर.
11 तमकुन वातङ दुक्सन पिय्सि, पुनकुन पिय्सि स्वर्ग्नगा मंवल बगवंतन रेह्चि वड्क्तेर.
बति तम्वङ करेबलिक कामकुन सुटि किय्ले मनकुन मार्युस्मकि.
12 आरवा दूतल तंवा टगोरतुन युप्रटिस इंवल पेर्सा लविडुन पोरो वेडितोर.
सिडय्तुर राजलिर वाय्ले सरि आय्ले, ताना येर कोडोड्क्ने वत्ता.
13 अस्के अद मारेल्क वाले मासुडा तोड्दल, जंवर्ता तोड्दल अनि लबड पर्वक्तना तोड्दल, पेनेन मोडितङ मूंद बे-सुदुड आत्मङ बह्रि वासेर दिस्तङ.
14 अव आत्मङ बूत्क्नङ आंदुङ.
अवेनगा मय्मतङ निसनिङ कीसि तोह्वल सक्ति मंता.
इव आत्मङ सर्वा सक्ति वाले बगवंतना पेर्सा दिवोसुन नेटि जर्ग्वल लडेयतगा, दुनियतुर राजलिरकुन तयर किय्ले, वूर्गा सोंवलिक आंदुङ.
15-16 अनि अव आत्मङ, वूर राजलिरकुन हेब्रि बासते हर-मेगिद्दोन इंवल जागतगा मीरि कींतङ.
अदेन साटि येसु पर्बु, “इचुला!
नना कलेन मोडि अचनक वांतोन.
तंवा तना दिहंते मन्जेर, पोंड्ले तंवङ पाङुकुन तयर इर्वल आसिर्वाद येतंतोर.
बोरे आयि अहन मंवेके दानुर्ते, मेंदोल कुडेके दिस्वडुन हिंदल तंवा तना लजा वोतोर आंतोर” इन्जेर वेह्तोर.
17 अस्के येडवा दूतल तंवा टगोरतुन वडिदगा वेडितोर.
अद गट्कते स्वर्ग्ना मंदिर्ता कचुरितल उंदि लेङ जोर्ते, “सम्दो मार्ता” इन्जेर केन्जा वाता.
18 अस्के मिड्च्वल, गर्ज्वल अनि तीज-बीज्क्ना आवज पूटे माता.
अनि पेर्सा बूकंप वाता.
दर्तुरित पोरो मायनल पय्दोस आतोर अगटल, बस्केन अचोर पेर्सा बूकंप वाय्मकि.
19 बेय पेर्सा मंवल बबुलोन नगुर मूंद बागल्क आसि, तिव्ता.
अनि दुस्रोक देस्क्नङ नगुक पूरो उल्टे मातङ.
बगवंतल अद पेर्सा बबुलोन नगुडुन सिक्सा किय्वल मरुङ्मकि.
अद उंले तंवा सोङ इंवल आङुर्क्ना कलदुन चंबुतगा वेडिसि उह्तोर.
20 अस्के सम्दो लंकङ मयेडा आतङ अनि डङलिक गुटङ बोमित मट्रम आतङ.
21 लग-बग अर्दो कुंटल वजन मंवलिक गार-बंडङ हाबडल माय्नलिर पोरो अर्तङ.
अव गार-बंडना गंडम वेले नुक्सन कीता काड्कि, लोकुर अदेन हिंदल बगवंतन रेह्चि वड्क्तेर.