जंवरतुन पोरो उच्चि मंवल पोरोल सोत्ता अद लन्जे
17
1 अस्के येडुङ टगोरङ पिय्सि मंवलिर येड्विर दूतलिर्गटल वोरोर नह्गा वासि, “इगे वरा!
बेय वेले सम्दुरकुन पोरो उच्चि मंवल पोरोल सोत्ता अद लन्जे वेय्लोन अनि तान पुट्वल सिक्सतुन तोहंतोन.
2 तान सङा दर्तुरितुर राजलिर पिर कीतेर.
अनि अद, दर्तुरितुर सम्दिरकुन, बगवंतन सोङ तरुस्वल ताना लन्जेतनम इंवल आङुर्क्ना कलदुन उह्चि, वूर जिङ्डे मानल कीता” इन्जेर वेह्तोर.
3 बस्केते पवित्रा आत्मा नाकुन तंवा सक्तिते आगुटि कीतयो, अस्के वोर दूतल नाकुन, बोडि गुटनगा वोतोर.
अगा नाकुन बेय रगल रङ्ने मंवल जंवरतुन पोरो उंदि वेय्लो उच्चि दिस्ता.
अद जंवर्ता मेंदोल पूरो बगवंतन सापेना सिय्वलिक गोस्टिङ लिहि कीसि मत्तङ.
अद जंवरतुन येडुङ तलङ अनि दहा कोह्क मत्तङ.
4 अद वेय्लो मस्रल अनि बेय रगलिक कप्डिङ पोंड्सि मत्ता.
सोने अनि बारितङ हीरङ-मोतिने सव्रे मासि मत्ता.
अद वेय्लोना केय्दगा उंदि सोनेता चंबु मत्ता.
अद चंबु पूरो, बे-सुदुड चीज्क्ने अनि अद कीता लन्जेतनम्ने निन्चि मत्ता.
5 ताना कपडगा,
“लन्जे वेय्लोकुन
अनि दुनियता करब अनि बे-सुदुडुन अवल आय्वल
बेय पेर्सा बबुलोन नगुर”
इंवल पोरोल लिहि कीसि मत्ता.
6 अद वेय्लो बगवंतनुर बक्तलिरा अनि येसुन साटि तम्वा जीवा सीतुर वूरा नेतुर उन्जि, निसते दिस्ता.
ते नना बेय गुल आतोन.
7 अस्के वोर दूतल ना सङा, “निमे बारि अचोर गुल आंति?
अद वेय्लोन बारेते अनि अद उच्चि मंवल येडुङ तलङ अनि दहा कोह्क वाले जंवरतुन बारेते सतेमुन नीकुन वेहंतोन.
8 निमे सूड्वल जंवर इंके सेले बति, तोले मत्ता.
अंत-लागो अद कोल डोडोतल, अद जंवर वेय्ने पेसिवल मंता.
अनि अद बस्केट नासेडम आय्वल मंता.
कलि गडे मातगटल बस्केट मंवलिरङ पोरोल्क लिहि कीसि मंवल जीवता ग्रंत्नगा बोनङ्ते पोरोल्क मनोङो, वूर अद जंवरतुन सूड्सि गुल आंतेर.
बारितेके अद तोले मत्ता.
इंके सेले बति, मुने वाय्वल मंता.
9 “इदेन सम्जे माय्ले तेलिवि-गियंता जुरत मंदंता.
अव येडुङ तलङ इत्तेके, अद वेय्लो उच्चि मंवलिक येडुङ गुटङ आंदुङ.
अह्ने येड्विर राजलिर इन्जेर गिर अवेना अर्तम.
10 वीर्गटल सिय्विर बूड अर्तेर.
वोरोर इंके मंतोर अनि उंडे वोरोर वाय्वल मंतोर.
बति वोर जरसि कालम वेरिन तंवा राज ताकुसंतोर.
11 तोले मन्जि इंके सेले अद जंवर येनिमिदोवा राजल आंदुर.
वोर येड्विर राजलिर मोडितोर आंदुर बति, वोर गिर नासेडम आंतोर.
12 “निमे सूड्ति अव दहा कोह्क, दहा जन्क राजलिर आंदिर.
वूर उंडे गिर राजा-गादितगा उद्मकि.
उंदि गंटमेन वूर राजलिर आसि, अद जंवरतुन बरोबर राज ताकुस्ले वूरकुन अदिकार सिय्वल जर्गंता.
13 वूर सम्दिर उंदि येकि आसि, तम्वा ताकदुन अनि अदिकारदुन अद जंवर्ता केय्दे हव्लि कींतेर.
14 अनि वूर राजलिर, गोरे पिला आय्वन उल्टा लडेय कींतेर.
बति वोर तना केय्सि नेमि कीतुर वूर बक्तलिर सङा मीरे मासि, वूर राजलिरकुन हारि कींतोर.
बारितेके वोरे पर्बुरोर पर्बु अनि राजलिरोर राजल आंदुर” इन्जेर वेह्तोर.
15 अद आता पेजे वोर दूतल ना सङा, “निमे अद वेय्लो उत्ता अव सम्दुरकुन सूड्ति.
अव सम्दुर्क: मांदितुन, जातिन, देसेलकुन अनि बासन तोहंतङ.
16 निमे सूड्ति अद जंवर अनि तानङ दहा कोह्क अद वेय्लोन पसंद कियोङ.
अनि अव, अद वेय्लोन दिक सेले अदेन मोडि, कुडेकेय सुटि कींतङ.
अव ताना मेंदोडा सवितुन तिन्जि, ताना आंवल बतय मेय्वक तड्मिते डुंडुसंतङ.
17 बारितेके अव सम्दो उंदि येकि आसि, तम्वा राज अद जंवरतुन सिय्ले मंदगा वोपनल बगवंतल कीतोर.
इद तीर्दे तंवङ जबनकुन पूरि कियुस्तोर.
18 अनि निमे सूड्ता अद वेय्लो, दुनियतुर राजलिरकुन ताकुसेर मंवल अद पेर्सा नगुरे आंद” इन्जेर वेह्तोर.