बबुलोन नगुर नासेडम आय्वल
18
1 अद आता पेजे वेले अदिकार वाले वोरोर दूतल स्वर्गनल रेय्सि वाय्वल सूड्तोन.
वोना मय्मता वेड्चिते दर्तुरि पूरो जगर्ने निंता.
2 वोर दूतल जोर्ते,
“सूडट!
बबुलोन नगुर नासेडम आता.
अद पेर्सा नगुर पूरो नासेडम आसि,
बूत्क मनल तयर आता.
अद हर बूत तिरिवल जागा आता.
अद हर उंदि बे-सुदुड वालेक पिटेना बुयरि आसि मंता.
3 बारितेके, बगवंतन सोङ तरुस्वल ताना लन्जेतनम इंवल, आङुर्क्ना कल सम्दो जातिनुर उटेर.
दर्तुरितुर राजलिर तान सङा पीर कीतेर.
दर्तुरितुर बेपरिदार्क ताना सुक-बोग्ने दनेवंतलिर आतेर”
इन्जेर वेह्तोर.
4 अस्के स्वर्गनल उंडे उंदि लेङ,
“ना लोकुर्निट!
मिरट तानङ पाप्क्नगा ईसा येत्वक मंले,
तान पोरो वाय्वलिक गंडल्क मी पोरो वाय्वक मंले,
तान्गटल बह्रि वरट.
5 बारितेके, तानङ पाप्क हाबडुन लाग्सेर मंतङ.
तानङ गल्ति कामकुन बारेते बगवंतल हेतु कीतोर.
6 अद मीकुन बहन कीतयो, अह्ने तान कीम्ट!
तानङ कामकुन पिय्सि रंड ईसङ सीम्ट!
अद मिस्डि कीसि सीता चंबुतगा रंड ईसङ अदिक मिस्डि कीसि सीम्ट!
7 अद, ‘नना रानिन मोडि डगुर-पांदे उद्वना आंदुन.
नना रांडे वेय्लोना आयोन.
दुक्सा इत्तेके असले सूडोन’ इन्जेर तंवा मंदे इत्ता.
अदेन साटि अद बचोर्ते पोक्डा गोस्टिङ वेह्तयो,
बचोर्ते सुक-बोग येत्तयो,
अचोर आपतिङ अनि दुक्सङ सीम्ट.
8 अदेन साटिने तान पोरो
मरन, दुक्सा अनि करु इंवलिक गंडल्क उंदिय दियत रोपो वांतङ.
तान तस्वा किय्वल पर्बु आय्वल बगवंतल सक्ति वाले आता काड्कि,
अद पूरो तड्मिते डुंडंता.
9 “तान सङा पीर कीसेर, सुक-बोग येच्चेर पिसि मत्तुर वूर दर्तुरितुर राजलिर, अद वेनेके तेद्वल पोयतुन सूड्सि, तम्वा साति पासेर आडंतेर.
10 अनि वूर अद येत्वल दुक्सतुन सूड्सि, बेय वेरिसि लङ निल्सि,
‘अय्यो!
पेर्सा नगुर आय्वल बबुलोंति!
ताकद वाले नगुडि!
उंदिय गंटत रोपो नी पोरो बगवंतना सिक्सा वासि अर्ता’
इन्जेर आडंतेर.
11 “अस्के दुनियतुर बेपरिदार्क गिर बबुलोन नगुडुन सूड्सि, बेय दुक्सते आडंतेर.
बारितेके तान्गा तम्वङ वस्तुङ येत्वलिर बोरे मंवक आंतेर.
12-13 अव वस्तुङ बव इत्तेके: सोने, कूरा, बारितङ कंकर्क, हीरङ-मोतिङ, बेय नुयलिक पाङुक, रगलिक-मस्रलिक कप्डिङ, कोस्ला नूदङ कप्डिङ, बारिता कटेते कीतङ वस्तुङ, येनितङ कोरेल्क्ने कीतङ सम्दो वस्तुङ, चोकोट्ना चेकते कीतङ वस्तुङ, पितुडे, लोकोंड्ने अनि सोबतङ बंडने तयर कीतङ सम्दो वस्तुङ, दाचेना चेका, ऊद, ऊद बत्तिङ, गमा गमा गाडि सिय्वल निय, आङुर्क्ना कल, ओलिवा निय, नुयल पिंडि, गोह्क, मूरङ, गोरेङ, कोडङ, रत्क, दासिर आय्ले माय्नलिरकुन गिर वोम्दिर.
बति इङेडल अवेन बोरे येतुर.
14 ते वूर बेपरिदार्क तान सङा,
‘निमे बेय पसंद किय्वलिक वस्तुङ निह्गटल परर आतङ.
नीवा दन-दव्लत अनि नीवा सुक-बोग येत्वल नासेडम आता.
नीवङ कडकुन अव उंडे बस्केन दिसोङ’
इन्जेर इत्तेर.
15-17 “अद नगुडुन हिंदल दनेवंतलिर आतुर वूर बेपरिदार्क, अद येत्वल तक्लिबुन सूड्सि, बेय वेरिसि लङ निल्सि,
‘अय्यो!
अद पेर्सा नगुडि!
बेय नुयलिक, रगलिक-मस्रलिक पाङुक पोंड्वनि,
सोनेते, बारितङ कंकर्क्ने अनि हीरङ-मोतिने सजे माय्वल नगुडि!
बति उंदिय गंटत रोपो चक नासेडम आति’
इन्जेर दुक्सते आडंतेर.
“रूकङ ताकुस्वलिर, रूकने यात्रा किय्वलिर, रूकतगा काम किय्वलिर अनि सम्दुरतुन हिंदल तम्वा जीतम कमय किय्वलिर सम्दिर गिर लङ निलंतेर.
18 अनि अद नगुर वेनेके वाय्वल पोया सूड्सि, ‘इद पेर्सा नगुडुन तेर डगुर बदे नगुर मंतय?’
इन्जेर इंतेर.
19 अनि वूर बेय दुक्सते, तम्वङ तलन पोरो दुबा तडिसेर,
‘अय्यो!
पेर्सा नगुडि!
सम्दुरतगा रूका मंवल हर वोरोर नी हिंदल दनेवंतल आतोर!
बति उंदिय गंटत रोपो चक नासेडम आति’
इन्जेर आडंतेर.
20 ‘बति स्वर्ग्नि!
बगवंतनुर बक्तलिर्निट!
अपोस्तुल्क्निट अनि पर्वक्तलिर्निट!
अद नगुर नासेडम आता काड्कि, आनंद येतट!
अद मीकुन उल्टा ताक्ततुन पिय्सि, बगवंतल तान बरोबर सिक्सा वाड्तोर’”
इन्जेर वोर दूतल वेह्तोर.
21 अद आता पेजे ताकद वाले वोरोर दूतल, जतत मोडिता पेर्सा बंडा तह्चि, सम्दुरतगा वाड्तोर.
अनि,
“इद तीर्दे पेर्सा नगुर आय्वल बबुलोन नासेडम आय्ले पेकि किय्वल जर्गंता.
अद उंडे बस्केन नदुडुन दिसो.
22 चोंड्का नेकुसेर वार्वलिक पाटङ,
सुलुडि अनि तुरङ उह्क्सेर वार्वलिरङ पाटङ,
उंडे बस्केन निह्गटल केन्जा वायोङ.
इङेडल काम किय्वल निह्गा बोरे दिसोर.
नोर्वल जतता आवज उंडे बस्केन निह्गटल केन्जा वायो.
23 डिवेता वेड्चि, इङेडल निह्गा उंडे जगर्ने पारो.
अनि पूना-पूनि मर्मिङ आतुरङ गोस्टिङ उंडे बस्केन निह्गटल केन्जा वायोङ.
बारितेके नीवा मायतगा अरुसि सम्दो जातिनुरकुन बूलि कीसि वाड्ति.
अदेन साटि दर्तुरित पोरो नीवुर बेपरिदार्के डगुक आतेर.
24 अद नगुडगा पर्वक्तलिरा नेतुर
अनि बगवंतनुर बक्तलिरा नेतुर दिस्ता.
दुनियतगा बगवंतना सेवतुन साटि जीवा सीतुर वूर सम्दिरा नेतुर अगा दिस्ता”
इन्जेर वेह्तोर.