स्वर्ग्नगा बगवंतना पार्तना-विंति किय्वल
19
1 अहन जर्ग्ता पेजे, स्वर्ग्नगा बेय वेले मांदि,
“बगवंतन डगुर-पान सीम्ट!
बचि किय्वल, मय्मा अनि ताकद मा बगवंतना केय्देन मंता.
2 निमे किय्वल तस्वा सतेम्ना अनि नायम्ना आंद.
तंवा पीर किय्वल गुंते दुनियतुन करब कीता अद लन्जेन,
वोर बगवंतल सिक्सा कीतोर.
तान्गटल तंवुर सेव्कलिरा नेतुडा बद्लि येत्तोर”
इन्जेर बेय जोर्ते इंवल केन्ज्तोन.
3 वूर सम्दिर उंडे उंदि जोका,
“बगवंतन डगुर-पान सीम्ट!
वेता अद पेर्सा नगुडल पोया बस्केन आग्वक पोरो सोन्जेरेन मंदंता”
इन्जेर इत्तेर.
4 वूर वीसा नाल्विर पेदोल्क राजा-गादितगा उच्चि मंवल बगवंतन गप्ने काल्क कर्सि, पार्तना-विंति कीतेर.
अद तीर्दे स्वर्ग्नगा मंवलिक अव नालुङ जीवङ गिर,
“आमेन!
बगवंतन डगुर-पान सीम्ट!”
इन्जेर पार्तना-विंति कीतङ.
5 अस्के राजा-गादितल उंदि लेङ,
“वोनुर सेव्कलिर आय्वलिर मिरट सम्दिर,
चुडुर-डगुर इंवल तेडा सेल्वक्ने मा बगवंतन डगुर-पान सीम्ट.
मा बगवंतन वेरिवलिर मिरट सम्दिर
वोन डगुर-पान सीम्ट”
इन्जेर केन्जा वाता.
गोरे पिला आय्वनङ मर्मिना जेवुन
6 नाकुन अद लेङ उंडे इहिन केन्जा वाता.
अद लेङ बेय वेले मांदिता, येता बोद्रता अनि गर्ज्वडुन मोडिता आवज मत्ता.
ते वूर,
“बगवंतन डगुर-पान सीम्ट.
सर्वा सक्तिवंतल मा पर्बु आय्वल बगवंतल,
मा पोरो राज ताकुसेर मंतोर.
7 मरट आनंद येत्कट.
कुसिते वोन डगुर-पान सीकट.
गोरे पिला आय्वनङ मर्मिङ आय्वलिक मंतङ.
वोन साटि नोव्रि तंवा तनय सजे मासि मंता.
8 बेय दव्रलिक अनि चक मंवलिक नुयलिक पाङुक
तान पोंड्ले सिय्वल जर्ग्ता”
इव पाङुक बव इत्तेके, बगवंतनुर बक्तलिर कीतङ नियत्नङ काम्क आंदुङ.
इन्जेर वेह्वल केन्ज्तोन.
9 अद आता पेजे दूतल ना सङा, “इद लिहि कीम.
बतल इत्तेके, गोरे पिला आय्वना मर्मिना जेवुन किय्ले कबुर अंद्तुर वूर, आसिर्वाद येतंतेर.
इव करलेन बगवंतनङ गोस्टिङ आंदुङ” इन्जेर वोर वेह्तोर.
10 इद गोस्टि केन्ज्ता पेजे, नना पार्तना-विंति कीका इन्जेर दूतनङ कालकुन पोरो अर्तोन.
बति वोर ना सङा, “अहन किय्मा.
नना नी बरोबर्तोर सेव्कनय आंदुन.
येसुना सतेमुन बारेते गवा वेह्वलिर दादलिर-बायिकुन सङा मंवना आंदुन.
निमे बगवंतनय पार्तना-विंति कीम.
आत्मता सक्तिते दादलिर-बायिक अद गवतुन वेह्चेर मंतेर” इन्जेर वेह्तोर.
दव्रल कोडत पोरो उच्चि मंवल
11 अस्के स्वर्ग कोले मासि मंवल सूड्तोन.
नाकुन अचनक उंदि दव्रल कोडा दिस्ता.
तान पोरो उच्चि मंवना पोरोल, “बरोसा वाले, सतेवंतल” इन्जेर केयंतेर.
वोर नायम्ने तस्वा कीसेर लडेय कींतोर.
12 वोनङ कड्क तड्मितङ जारकुन मोडि मत्तङ.
वोना तलत पोरो वेले किरिट्क मत्तङ.
वोन पोरो उंदि पोरोल लिहि कीसि मत्ता.
अद पोरोल्दा अर्तम वोन तपुसि, दुस्रोन बोने टावा सेले.
13 वोर नेतुडगा मुडुस्ता पाङुड पोंड्सि मत्तोर.
अनि वोन, “बगवंतना वचन” इंवल पोरोल दोस्वल जर्ग्ता.
14 वोन पेजेय, स्वर्ग्नगा मंवलिर सिपायिर बेय दव्रलिक अनि चक मंवलिक नुयलिक पाङुक पोंड्सि, दव्रलिक कोडन पोरो उच्चि पेसितेर.
15 सम्दो जातिनुरकुन हारि किय्ले, वोना तोड्दल दार तल्वर बह्रि वाता.
वोर देसलकुन पोरो बेय कडक राज ताकुसंतोर.
सर्वा सक्ति वाले बगवंतना बेय सोङ इंवलिक आङुर्क्नङ पंडिन नारिता बंडतगा दीव्संतोर.
16 वोना पाङुड पोरो अनि वोना मांडित पोरो,
“पर्बुरोर पर्बु अनि राजलिरोर राजल”
इन्जेर लिहि कीसि मंता.
17 अस्के पोड्द्नगा निल्सि मंवल वोरोर दूतन सूड्तोन.
वोर वडिदे परिवलिक पिटेन सङा, “वरट!
बगवंतल सिय्वल जेवुन किय्ले, मीरे मासि वरट!
18 मिरट वाकिट्ते राजलिरङ, सिपायिरुर अदिकारिरङ, सिपायिरङ, कोडनङ, कोडन ताकुस्वलिरङ, लोकुरङ, दासिरङ, दासिर आयुर वूरङ, डगुक वालिरङ अनि चुडुक वालिरङ इहिन वीर सम्दिरङ सविङ तिंले मीकुन पुटंतङ” इन्जेर इत्तोर.
19 अद आता पेजे अद जंवर, दुनियतुर राजलिर, वूरेर सिपायिर सम्दिर मीरे मासि, कोडत पोरो उच्चि मंवन सङा अनि वोनुर सिपायिर सङा लडेय किय्ले तयर आतेर.
20 बति अद जंवरतुन दोह्चि वाट्वल जर्ग्ता.
अद जंवरतुन हिंदल आसि, मय्मतङ निसनिङ तोह्तोर वोर, लबड पर्वक्तन गिर दोह्चि वाट्वल जर्ग्ता.
वोर इव मय्मतङ निसनिने, अद जंवर्ता मोर वालिरकुन अनि ताना पुत्लतुन पूजा कीतुरकुन पसि कीसेर वातोर.
कोडतगा उच्चि मंवल, वीर सम्दिरकुन गंदोक्ने रमा रमा पोच्चेर मंवल तड्मिता गुंडम्नगा जीतोये वाड्तोर.
21 अद कोडत पोरो मंवना तोड्दल वाता अद तल्वर्ते कड्मतुरकुन जक्वल जर्ग्ता.
पिटेङ वासि, वीर सम्दिरङ सविन पेटिमेन तित्तङ.