उजगिरि अरुस्वल 20

हजर साल्क राज ताकुस्वल

1 स्वर्गनल वोरोर दूतल रेय्सि वाय्वल सूड्तोन. वोना केय्दे अंत-लागो अद कोल डोडोता कुन्जि अनि बेय पेर्सा सकलि मत्ता. 2 ते अदेने वोर अद मारेल्क वाले मासुडुन पिय्सि, हजर (1,000) वर्सङ वेरि कोंडे मासि मंले, दोह्‍चि इर्तोर. इद मासुडुने तोत्तल मंवल तरस सेलेके, पसि किय्वल सेलेके, इन्जेर केयंतेर. 3 वोर दूतल, तान अद कोल डोडोतगा पेकि कीसि, कुन्जि डबा वाट्सि, तान पोरो मोर वाड्तोर. हजर साल्क निंदनल वेरि, सय्तन दुस्रोक जातिनुरकुन उंडे पसि किय्वक मंदना इन्जेर वोर दूतल इहिन कीतोर. अद आता पेजे जरसि कालम वेरि, सय्तंदुन सुटि किया लागर.

4 अद आता पेजे, येसुन बारेते गवा वेह्‍ततुन हिंदल अनि बगवंतना वचन पचर कीततुन हिंदल, दुस्रुरा केय्दे मरन आतुर वूरङ आत्मन सूड्तोन. वूर सम्दिर गिर अद जंवर्तुने आयि, ताना पुत्लतुने आयि पूजा किय्वक मत्तुर वूर आंदिर. वूर ताना मोरदुन तम्वङ कपक्नगन आयि, केय्क्नगन आयि वाटुस्मकि वूर आंदिर. वीरकुन तस्वा किय्वल अदिकार पुड्ता काड्कि, राजा-गादिन पोरो उच्चि दिस्तेर.

वीर सासि-नेंड्सि किरिसतुन बरोबर हजर वर्सङ राज ताकुस्वलिर आंदिर. 5-6 वीर लोकुर सासि-नेंड्वलिर्गटल मोदोडुर अनि आसिर्वाद येत्तुर वूर पवित्रा वालिर आंदिर. रेंडवा मरंतुन वीर पोरो अदिकार सेले. वीर बगवंतना अनि किरिस्तुना सेवा किय्वलिर कटोडलिर आसि, किरिसतुन सङा हजर वर्सङ राज ताकुसंतेर. इव हजर वर्सङ निंदनल वेरि दुस्रुर लोकुर बूरे नेंड्मकि.

सय्तन हारे माय्वल

7 हजर वर्सङ आता पेजे सय्तन वोन कोंडि कीसि, दोह्‍चि इर्सि मत्ता अद जागतल सुटे मांतोर. 8 वोर बह्‍रि वासि दर्तुरितङ नालुङ कोन्क्नगा मंवलिक सम्दो जातिनुरकुन, गोगु अनि मागोग इंवलिरकुन गिर लडेय किय्ले मीरि कींतोर. वीरा लेका कहा परुर अद सम्दुर्ता उस्के कडकुन अचोर मंदंता.

9 वूर लडेय किय्वलिर वासि, दर्तुरिता पय्टन बोमितगा पग्रे मातेर. अनि बगवंतनुर बक्तलिर मंवल जागतुन इत्तेके, बगवंतल लाड किय्वल नगुडुन, आगुटि कीतेर. बति स्वर्गनल तड्मि बूड रेय्सि वूरकुन डुंडुसि वाड्ता. 10 अस्के वूरकुन पसि किय्वल सय्तंदुन गंदोक्ने रमा रमा पोच्चेर मंवल गुंडम्नगा वाडि सिय्वल जर्ग्ता. अद जंवरतुन अनि लबड पर्वक्तन इदेन मोदोले अदेनगा वाट्वल जर्ग्ता. वूर रात-दिहा बस्केट वेसेर, अगा दुक्सा येच्चेरेन मंदंतेर.

मरन आतुर वूरा तस्वा

11 अस्के नना उंदि दव्रल पेर्सा राजा-गादितुन अनि तान पोरो उच्चि मंवल बगवंतन सूड्तोन. वोना नदुडल मक्ले दर्तुरितुन अनि हाबडुन जागा सेल्वा काड्कि, अव अगटल मयेडा आतङ. 12-13 अस्के सासि तम्गा मंवलिर सम्दिरकुन मरन अनि हव्लि किय्वल सूड्तोन. उंडे गिर नना गरिब्के आयि, हरिब्के आयि, मरन आसि तन्गा मंवलिर सम्दिरकुन सम्दुर हव्लि किय्वल सूड्तोन. ते वूर सम्दिर बगवंतना राजा-गादित मुने निल्सि दिस्तेर. अस्के ग्रंत्क कोलि किय्वल जर्ग्ता. बस्केट जीवते मंवलिरङ पोरोल्क लिहि कीसि मंवल जीवता ग्रंत गिर कोलि किय्वल जर्ग्ता. अव ग्रंत्क्नगा लिहि कीसि मंवलिक गोस्टिन पिय्सि, वूर कीतङ कामकुन पिय्सि, वूर मरन आतुरा तस्वा जर्ग्ता. 14 अस्के मरंतुन अनि साना लोकमुन तड्मिते पोच्चेर मंवल गुंडम्नगा वाट्वल जर्ग्ता. इद रेंडवा मरन आंद. 15 जीवते मंवलिरङ पोरोल्क मंवल जीवता ग्रंत्नगा पोरोल सेलोर वोर, हर वोरोन तड्मिता गुंडम्नगा वाट्वल जर्ग्ता.

उंडे करि कीका इंदकिते, www.koyang.in सूडा.