पार्तनतुन बारेते वेह्वल
2
1-2 नना मोदोल नीकुन वेह्वल बतल इत्तेके, सम्दिर लोकुर साटि, राजलिर अनि अदिकारिर वूर सम्दिर हिंदल आसि, बगवंतन कोरना, पार्तनङ, विनंतिङ कियना.
अनि दनेवाद्क गिर वोर बगवंतन वेहना.
अस्केन मरट सांतिते, बाव-बक्तिते, बगवंतन डगुर-पान सीसेर पिसा परंतट.
3 इहिन किय्वल चोकोट्ना आंद अनि माकुन बचि किय्वल बगवंतन आनंद सींता.
4 पर्जा सम्दिर बचे मायना अनि सतुन बारेते करि कियना इन्जेरेन बगवंतल इचा कींतोर.
5 अद सत बतल इत्तेके: बगवंतल वोरोरे मंतोर.
अह्ने बगवंतनगा माय्नलिरकुन मीरि किय्वल सुर्वेर्तल गिर वोरोरे मंतोर.
वोरे येसु किरिस्तु इंवल मायनल आंदुर.
6 वेरे येसु सम्दिरा मुक्तितुन साटि, तंवा तना अर्पना आसि कंडि कीतोर.
इदेना गवा बरोबर वकत्ने माकुन तोह्तोर.
7 इदेन साटिने पचर किय्वन दात, अपोस्तुल्तुन दात यूदुल्क आयुर वूरकुन बरोसा अनि सतेमुन बारेते वेह्ले बगवंतल नाकुन नेमि कीतोर.
इद लबड आयो, सतेमे आंद.
8 अदेन साटि हर चर्चिनुर माय्नलिर सोङ वाय्वक्ने अनि लोल्लिङ-जग्डङ किय्वक्ने, तम्वङ पवित्रा केय्क तह्चि,* पार्तना कियना इन्जेर कोरंतोन.
9-10 अह्ने बक्तलिक वेय्लोक गिर मान सीनल सादा कप्डिङ पोंडना.
अव वेय्लोक चोकोट्नङ काम्क कीसि, तम्वा बाव-बक्तितुन तोहना.
अचोरे बति सोनेतङ हार्क-वेर्क, मुतेल्क, बारितङ कप्डिङ, तीर-तीर्दङ वेनिङ वाट्वले माकुन सोबा सींतङ इंवा.
11 वेय्लोक दब मन्जेर बर्पुर मांदे सम्दो करियना.
12 वेय्लोक बोदा वेह्लेने आयि, माय्नन पोरो अदिकार ताकुस्लेने आयि, नना वोपोन.
वेय्लोक सिरिप दब केन्जना.
13 बारितेके बगवंतल मोदोल आदमुन अनि पेजेय हवन गडि कीतोर.
14 अदे आय्वा मोदोल पसे माय्वल आदम आयोर.
बति अद वेय्लो पसे मासि पाप्नगा अर्ता.
15 तेर बति वेय्लो बरोसते, पेर्मते, पवित्रा मन्जेर मंदुन आपुसा पर्तेके, बालेंततुन हिंदल* अद बचे मांता.