चर्चितुर पेदोल्क
3
1 चर्चितुरोर पेदोल्ता काम बेय विलुवता आंद.
अदेन साटि बोरे आयि अद काम कीका इत्तेके, अद गोस्टि चोकोट्नय आंद.
इद गोस्टि बरोसा कीनल मंता.
2 पेदोल आय्वल बदे तप्ना डाग सेल्वक्ने मंदना.
वोन उंदिय बाय्को मंदना.
वोर चोकोट्ना बुदि वाले आसि मंदना.
वोर मंदा आसतुन आपुसा परना.
सम्दिर मान सीनल वोर मंदना.
वोर वातोर-सोत्तोना चोकोट-वायुट पूसि किय्वल आसि मंदना.
वोर बोदा करुसनल गिर मंदना.
3 वोर पेदोल आय्वल कल-पिदेडल आय्वा.
सिर्डल मंवा, बति सादु गुंते मंदना.
जग्डा-पोय्टल आय्वा.
लबड-लप्डते कोतङ कमय किय्वा.
4 तनकुन मानि कीनल मरि-मियडुन जरब्ने इर्सेर, रोतुन चोकोट ताकुस्वल आयना.
5 बोरे आयि तंवा कुटुंबतुन ताकुसा परोर वोर, बगवंतना चर्चितुरकुन बहन ताकुसा परनुर?
6 वोर पूना-पूनि बरोसा वाले आसि मंवा.
* बारितेके वोन रोपो गर्वा-गमंडि वायर्ते, सय्तंदुन दात सिक्सा बोगे माया लागर.
7 अचोरे आय्वा वोर बदे तप कीसि, सय्तंदा केय्दे अर्वक्ने, दुस्रुर सम्दिर्गटल चोकोट मान येच्चेर मंदना.
8 अह्ने चर्चितुर्गा मदत किय्वलिर गिर मानि कीनल मंदना.
रंड तीर्क वड्क्वा.
कल-पिदेडलिर आय्वा.
मोसेम कीसि, कोतङ कमय किय्वलिर आय्वा.
9 वूर सुदुड-पान वाले मन-दिल्ते मन्जि, बगवंतल बह्रि वेह्चि तोह्तङ सते गोस्टिन पोरो गट बरोसा इर्सि ताकना.
10 अव सम्दो गुन्क्ना परिक्सतगा बे-कसुर वालिर आतेकेन, चर्चितुर्गा मदत किय्वलिर इन्जेर वूरकुन नेमि किया वचो.
11 अह्ने वूरङ वेय्लोक गिर दुस्रुर मानि कीनल मंदना.
अव वेय्लोक बोने राङ्वक मंदना.
चोकोट्ना बुदिते मन्जि, सम्दो काम्क बरोसते कियना.
12 वूर मदत किय्वलिरकुन उंदिय बाय्को मंदना.
वूर तम्वा मरि-मियडुन अनि कुटुंबतुन चोकोट ताकुसा परना.
13 अहन वूर चोकोट्ना पोरोल कमय कीसि, येसु किरिस्तुना बरोसतगा गटि-दीर्या वालिर आंतेर.
बगवंतल बह्रि वेह्चि तोह्ता सतुन बारेते
14-15 नना वेय्ने निह्गा वायना इन्जेर आसते मंतोन.
उंदि मोका नना वाय्वल कोरुम आतेके, बगवंतना चर्चितुर बहन ताकना इंवलिक गोस्टिन निमे करि कियना इन्जेर इद चिटितगा लिहि कीसेर मंतोन.
बहंते रोतुन बुनदि अनि दारुम्क आदर आसि निलंतङो, अह्ने जीवते मंवल बगवंतना चर्चितुर सतेमुन आदर आसि निलंतेर.
16 बह्रि वेह्चि तोह्ता आत्मता बाव-बक्तिता सत करलेन बेय डगुर आंद:
किरिस्तु माय्नना रूप येत्तोर.
वोर नियत्नोर इन्जेर पवित्रा आत्मा निरुपन कीता.
बगवंतनुर दूतलिर वोन सूड्तेर.
बचि किय्वल आंदुर इन्जेर वोन बारेते पर्जत नड्डुम पचर आता.
ते दुनियतुर वोन पोरो बरोसा इर्तेर.
बगवंतल वोन मय्मते स्वर्ग्नगा वोतोर.